ەڭبەكقور جاس بۇل ءونىم ءتۇرىن ءوسىرۋدى الەۋمەتتىك جەلى ارقىلى ۇيرەنىپ، قىزىعۋشىلىعى ارتقان.
بالاسىنىڭ كاسىپكەرلىككە دەگەن ۇمتىلىسىن بايقاعان اناسى ونى تورتكول اۋىلدىق وكرۋگىندە اتالعان كاسىپپەن اينالىساتىن قارشىعا ارىسبەكقىزىنا تاجىريبە الماسۋعا الىپ بارعان. 37 جىلدان بەرى وسى كاسىپپەن اينالىسىپ كەلە جاتقان كاسىپكەر تالابى تاۋداي جاسقا ءوز بىلگەنىن ۇيرەتكەن.
وسىلايشا وزىنە كەرەكتى اقپارات العان دىنمۇحامەد ساڭىراۋقۇلاق وسىرۋگە كىرىسىپ، ناتيجەسىندە 25 كۇندە دايىن ءونىم العان.
– ءاۋ باستا 50 مىڭ تەڭگەگە ساڭىراۋقۇلاق ۇرىعىن، 10 مىڭ تەڭگەگە قاۋىز ساتىپ الدىم. ال سۋ، گاز شىعىندارىنا جوبامەن 10 مىڭ تەڭگەدەي قارجى جۇمسالدى.
ارنايى بولمە ىشىنە ەككەن ۇرىقتاردان 63 بلوك (مەشوچەك) ءونىم شىقتى. دايىن ءونىمنىڭ ءبىر كەلىسىن 1000 تەڭگەدەن ساتىلىمعا شىعارۋدامىز. ءبىر بلوكتاعى ساڭىراۋقۇلاق 20 كۇندە ءپىسىپ، 2- 4 كەلىگە دەيىن ءونىم الامىز. نەگىزىندە ءبىر بلوك 4 رەت تازا ءونىم بەرەدى. ونىڭ العاشقى 3 ءونىمى ساتىلىمعا شىعارىلسا، سوڭعىسى كونسەرۆىگە جابىلادى، – دەيدى جاس اگرونوم.
الداعى كۇندەرى بالا اگرونوم مەملەكەت تاراپىنان قايتارىمسىز گرانت الۋ ارقىلى ۇيىرگەلىك جەرىندەگى كاسىبىن دامىتۋدى كوزدەپ وتىر.
