ورال قالاسىندا اۋىل شارۋاشىلىعى سالاسىنداعى ماڭىزدى وقيعالاردىڭ ءبىرى – «AUYL FEST. قوي شارۋاشىلىعى – 2025» تۇڭعىش حالىقارالىق فورۋمى ءوز جۇمىسىن باستادى،- دەپ حابارلايدى Dalanews.kz
فورۋمنىڭ اشىلۋ سالتاناتىنا باتىس قازاقستان وبلىسىنىڭ اكىمى ناريمان تورەعالييەۆ، ق ر پارلامەنتى ءماجىلىسىنىڭ اگرارلىق كوميتەتتىڭ ءتوراعاسى، «اۋىل» پارتياسىنىڭ ءتوراعاسى سەرىك ەگىزبايەۆ، قازاقستان رەسپۋبليكاسى پرەمەر-مينيسترىنىڭ كەڭەسشىسى ەرالى توقجانوۆ، ق ر پارلامەنتى ءماجىلىسىنىڭ دەپۋتاتى قاراقات ابدەن، ق ر اۋىل شارۋاشىلىعى ۆيسە-مينيسترى امانعالي بەردالين جانە مينيسترلىكتەردەن وكىلدەر قاتىستى.
سونىمەن قاتار فورۋم جۇمىسىنا وتاندىق ساراپشىلارمەن قاتار رەسەي فەدەراسياسى، جۇڭگو حالىق رەسپۋبليكاسى، ۆەنگريا، فرانسيا جانە يران يسلام رەسپۋبليكاسىنان كەلگەن حالىقارالىق قوناقتار، عالىمدار مەن اۋىل شارۋاشىلىعى سالاسىنىڭ ماماندارى قاتىسۋدا.
فورۋم اياسىندا قوي شارۋاشىلىعى ونىمدەرىنىڭ ساپاسىن ارتتىرۋ، جاڭا تەحنولوگيالاردى ەنگىزۋ، مال شارۋاشىلىعىنداعى يننوۆاسيالىق تاسىلدەر، ەكولوگيالىق تۇراقتىلىق پەن ەكسپورتتىق الەۋەتتى كەڭەيتۋ باعىتتارى كەڭىنەن تالقىلانباق.
«مەملەكەت باسشىسى قاسىم-جومارت كەمەل ۇلى توقايەۆ ءوز سوزدەرىندە اۋىلدىڭ الەۋەتىن ارتتىرۋعا ەرەكشە نازار اۋدارىپ كەلەدى جانە 2025 جىلدى «جۇمىسشى ماماندىقتارى جىلى» دەپ جاريالاعان بولاتىن. بۇل باستاما – ەڭبەك ادامىنىڭ مارتەبەسىن كوتەرىپ، ناقتى ءوندىرىس پەن كاسىپتىك-تەحنيكالىق ءبىلىم بەرۋ سالاسىنا جاڭا سەرپىن بەرۋگە باعىتتالعان ماڭىزدى قادام»، – دەدى وبلىس اكىمى ناريمان تورەعالييەۆ.
«AUYL FEST. قوي شارۋاشىلىعى – 2025» حالىقارالىق فورۋمىندا عىلىمي-پراكتيكالىق كونفەرەنسيالار، كورمەلەر، تاجىريبە الماسۋ الاڭدارى ۇيىمداستىرىلماق.
فورۋمنىڭ باستى ماقساتى – اۋىل شارۋاشىلىعى سالاسىنداعى ىنتىماقتاستىقتى نىعايتۋ، زاماناۋي تەحنولوگيالاردى ەنگىزۋ ارقىلى وتاندىق قوي شارۋاشىلىعىنىڭ باسەكەگە قابىلەتتىلىگىن ارتتىرۋ.
