وڭتۇستىك قازاقستان وبلىسىندا حالىقتى ءوز ەركىمەن جۇمىس كۇشى جەتىسپەيتىن سولتۇستىك وڭىرلەرگە كوشىرۋ جۇمىستارى جاندانىپ كەلەدى.  ۇگىت-ناسيحات جۇرگىزۋ ماقساتىندا وڭىرىمىزگە پاۆلودار وبلىسىنان ءبىر توپ دەلەگاسيا كەلدى.

توپ قۇرامىندا دۇنيەجۇزى قازاقتارى قاۋىمداستىعىنىڭ پاۆلودار وبلىستىق فيليالىنىڭ باسشىسى زاۋت بولات، اقسۋ قالاسى، قالقامان اۋىلدىق وكرۋگىنىڭ اكىمى وردا ەرمەكبايەۆ، ەكىباستۇز قالاسى، سولنەچنىي اۋىلدىق وكرۋگىنىڭ اكىمى مارجان الشيمبايەۆا، اقسۋ قالاسى، قىزىلجار اۋىلدىق وكرۋگىنىڭ اكىمى جەڭىس ابىكەن، ماي اۋدانى، مالايسارى اۋىلدىق وكرۋگىنىڭ اكىمى جانار كوماشيەۆا، ەكىباستۇز قالاسى اكىمدىگىنىڭ اۋىلشارۋاشىلىعى ءبولىمىنىڭ باس مامانى ايگەرىم شاكيربەكوۆالار بار.

ۇگىت-ناسيحات جۇرگىزۋدى ماقسات تۇتقان توپ الدىمەن تولەبي اۋدانىنا اتباسىن بۇردى. اۋداننىڭ اۋىل-ايماعىن ارالاپ، حالىقپەن جۇزدەسكەن دەلاگاسيا سولتۇستىككە كوشۋگە نيەتتى ازاماتتارعا مەملەكەت تاراپىنان ۇسىنىلاتىن باسىمدىقتار مەن جەڭىلدىكتەردى بايانداپ بەردى. جيىنعا قاتىسۋشىلارعا پاۆلودار وبلىسىنداعى جۇمىس كۇشىن تالاپ ەتىپ وتىرعان ەلدى-مەكەندەر تۋرالى قىسقاشا بەينەروليك كورسەتىلدى.  بوس جۇمىس ورىنداردىڭ دەنىن مەملەكەتتىك قىزمەت، ءبىلىم سالاسى، دەنساۋلىق ساقتاۋ، اۋىلشارۋاشىلىعى سالالارىنداعى ماماندىقتار قۇرايدى.

«بىزدە سوڭعى جىلدارى مامان تاپشىلىعى قاتتى سەزىلىپ وتىر. اسىرەسە، مەملەكەتتىك قىزمەت تۇرلەرىنە ماماندار جەتىسپەيدى. بۇل رەتتە بالاباقشا، مەكتەپ مۇعالىمدەرى، دەنساۋلىق ساقتاۋ سالاسىندا ەڭبەك ەتەم دەۋشىلەرگە ەسىگىمىز ايقارا اشىق. ەڭ باستىسى – سولتۇستىككە كوشۋگە نيەتتى مامانداردىڭ ءوز ىنتا –جىگەرى، قىزىعۋشىلىعى بولسا، قابىلداۋعا دايارمىز»، دەدى اقسۋ قالاسى، قالقامان اۋىلدىق وكرۋگىنىڭ اكىمى وردا ەرمەكبايەۆ.

جالپى، پاۆلودار وبلىسى ەگىس ەگۋمەن، مال شارۋاشىلىعىمەن اينالىسۋعا دا وتە قولايلى. ول جاقتاعى اۋىلدى جەرلەردە باسپانا باعاسى دا اسا قىمبات ەمەس. وسى جايتتارعا توقتالعان توپ مۇشەلەرى تولەبيلىكتەردى پاۆلودار وبلىسىنا قونىس اۋدارىپ، جۇمىسقا ورنالاسىپ، جەكە كاسىپكەرلىكپەن اينالىسۋعا شاقىردى.

پاۆلودار وبلىسىنىڭ كەلگەن تاعى ءبىر توپ تۇلكىباس اۋدانىنىڭ تۇرعىندارىمەن كەزدەستى. اۋدان اكىمشىلىگىنىڭ كىشى ءماجىلىس زالىندا وتكەن جيىنعا باس-اياعى 42 ادام قاتىسىپ، اتالعان وبلىستاعى بوس جۇمىس ورىندارىنىڭ جاي-كۇيىنەن حاباردار بولدى. جينالعانداردىڭ ىشىنەن 4 وتباسى پاۆلودار وبلىسىنا قونىس اۋدارۋعا نيەتتى ەكەندىكتەرىن جەتكىزدى.

ايتا كەتەيىك، 2017 جىلدىڭ 10 ايىندا تۇلكىباس اۋدانىنان پاۆلودار وبلىسىنىڭ ەرتىس اۋدانىنا 3 وتباسى، سولتۇستىك قازاقستان وبلىسىنىڭ اققايىڭ اۋدانىنا 1 وتباسى ءوز ەركىمەن قونىس اۋدارعان.  قونىس اۋدارعان وتباسىلاردىڭ مۇشەلەرى تۇراقتى جۇمىسقا ورنالاسىپ، بالالارى مەكتەپ-بالاباقشالارعا ورنالاستىرىلعان.

 

وقو اكىمىنىڭ باسپا ءسوز قىزمەتى