Top quramynda Dúnıejúzi qazaqtary qaýymdastyǵynyń Pavlodar oblystyq fılıalynyń basshysy Zaýt Bolat, Aqsý qalasy, Qalqaman aýyldyq okrýginiń ákimi Orda Ermekbaev, Ekibastuz qalasy, Solnechnyı aýyldyq okrýginiń ákimi Marjan Alshımbaeva, Aqsý qalasy, Qyzyljar aýyldyq okrýginiń ákimi Jeńis Ábiken, Maı aýdany, Malaısary aýyldyq okrýginiń ákimi Janar Komasheva, Ekibastuz qalasy ákimdiginiń aýylsharýashylyǵy bóliminiń bas mamany Aıgerim Shakırbekovalar bar.
Úgit-nasıhat júrgizýdi maqsat tutqan top aldymen Tólebı aýdanyna atbasyn burdy. Aýdannyń aýyl-aımaǵyn aralap, halyqpen júzdesken delagasıa soltústikke kóshýge nıetti azamattarǵa memleket tarapynan usynylatyn basymdyqtar men jeńildikterdi baıandap berdi. Jıynǵa qatysýshylarǵa Pavlodar oblysyndaǵy jumys kúshin talap etip otyrǵan eldi-mekender týraly qysqasha beınerolık kórsetildi. Bos jumys oryndardyń denin memlekettik qyzmet, bilim salasy, densaýlyq saqtaý, aýylsharýashylyǵy salalaryndaǵy mamandyqtar quraıdy.
«Bizde sońǵy jyldary maman tapshylyǵy qatty sezilip otyr. Ásirese, memlekettik qyzmet túrlerine mamandar jetispeıdi. Bul rette balabaqsha, mektep muǵalimderi, densaýlyq saqtaý salasynda eńbek etem deýshilerge esigimiz aıqara ashyq. Eń bastysy – soltústikke kóshýge nıetti mamandardyń óz ynta –jigeri, qyzyǵýshylyǵy bolsa, qabyldaýǵa daıarmyz», dedi Aqsý qalasy, Qalqaman aýyldyq okrýginiń ákimi Orda Ermekbaev.
Jalpy, Pavlodar oblysy egis egýmen, mal sharýashylyǵymen aınalysýǵa da óte qolaıly. Ol jaqtaǵy aýyldy jerlerde baspana baǵasy da asa qymbat emes. Osy jaıttarǵa toqtalǵan top músheleri tólebılikterdi Pavlodar oblysyna qonys aýdaryp, jumysqa ornalasyp, jeke kásipkerlikpen aınalysýǵa shaqyrdy.
Pavlodar oblysynyń kelgen taǵy bir top Túlkibas aýdanynyń turǵyndarymen kezdesti. Aýdan ákimshiliginiń kishi májilis zalynda ótken jıynǵa bas-aıaǵy 42 adam qatysyp, atalǵan oblystaǵy bos jumys oryndarynyń jaı-kúıinen habardar boldy. Jınalǵandardyń ishinen 4 otbasy Pavlodar oblysyna qonys aýdarýǵa nıetti ekendikterin jetkizdi.
Aıta keteıik, 2017 jyldyń 10 aıynda Túlkibas aýdanynan Pavlodar oblysynyń Ertis aýdanyna 3 otbasy, Soltústik Qazaqstan oblysynyń Aqqaıyń aýdanyna 1 otbasy óz erkimen qonys aýdarǵan. Qonys aýdarǵan otbasylardyń músheleri turaqty jumysqa ornalasyp, balalary mektep-balabaqshalarǵa ornalastyrylǵan.
OQO ákiminiń baspasóz qyzmeti
