ق ر پرەزيدەنتى اكىمشىلىگىنىڭ كەلىسىمىمەن جانە وڭتۇستىك قازاقستان وبلىسى اكىمىنىڭ وكىمىمەن وبلىس اكىمىنىڭ ءبىرىنشى ورىنباسارى  قىزمەتىنە الىپبەك شارىپبەك ۇلى وسەربايەۆ تاعايىندالدى.

ايماق باسشىسى جاڭا ورىنباسارىنا ءوز سالاسىنداعى وزەكتى ماسەلەلەرگە ساراپتاما جاساپ، الداعى اتقارىلاتىن جۇمىستار بويىنشا ناقتى ءىس-شارا جوسپارىن جاساۋدى تاپسىردى.

بۇعان دەيىن وسى قىزمەتتى اتقارعان دارحان امانگەلدى ۇلى ساتىبالدى شەتەلگە وقۋعا كەتۋىنە بايلانىستى ءوز ءوتىنىشى نەگىزىندە جۇمىستان بوساتىلدى. وڭىردە قىزمەت اتقارعان جىلدارى ىشىندەگى جەمىستى جۇمىسى ءۇشىن د.ساتىبالدىعا وبلىس اكىمى ج.تۇيمەبايەۆ العىسىن ءبىلدىرىپ، «وبلىسقا سىڭىرگەن ەڭبەگى ءۇشىن» مەدالىمەن ماراپاتتادى.

ءا.ش.وسەربايەۆ 1961 جىلى تۋىلعان، ءبىلىمى جوعارى، ماماندىعى بويىنشا بىلىكتىلىگى ينجەنەر-حيميك-تەحنولوگ.

ەڭبەك جولىن 1983 جىلى قاراعاندى اسبەست-سەمەنت ونىمدەرىن شىعاراتىن زاۋىتىنىڭ ءماشينيستى رەتىندە باستاعان. 1986-2014 جىلدارى تۇركىستان قالاسى قۇرىلىس دەتالدارى مەن كونسترۋكسيالارى كومبيناتى زەرتحاناسىنىڭ ينجەنەرى، ماستەرى، ەكونوميستى، سەح باستىعى، باس ينجەنەرى، «قۋات سۋيندۋستريا» اق، «KazakhConstruction Industry» اق  تۇركىستان قالاسى رۋداسىز ماتەريالدار كومبيناتى فيليالدارىنىڭ ديرەكتورى، تۇركىستان قالالىق ءماسليحاتى حاتشىسىنىڭ مىندەتىن اتقارۋشى، تۇركىستان قالاسى قۇرىلىس ءبولىمىنىڭ مەڭگەرۋشىسى، كەنتاۋ، تۇركىستان قالاسى اكىمىنىڭ ورىنباسارى، تۇركىستان قالاسىنىڭ اكىمى، وبلىستىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى لاۋازىمدارىن اتقارعان.

2014 جىلدىڭ قىركۇيەك ايىنان باستاپ بۇگىنگە دەيىن وڭتۇستىك قازاقستان وبلىسى تۇركىستان قالاسىنىڭ اكىمى بولىپ قىزمەت ەتىپ كەلدى.

وقو اكىمىنىڭ باسپا ءسوز قىزمەتى