ول شەمشيەۆتٸ ەلدەكٸمدەردٸڭ قاساقانا ٶلتٸرگەنٸنە سەنٸمدٸ. مەسكەۋدەگٸ تەۋەلسٸز ساراپتاما ورتالىعى وسىنداي ۇيعارىمعا كەلگەن. ساراپتاما نەتيجەسٸن جارييا ەتكەن ساياساتكەر, مارقۇمنىڭ جەلكە تۇسىندا ەلدەبٸر اۋىر زاتپەن ۇرعاننان پايدا بولعان ٸسٸك انىقتالعان دەيدٸ.
سالدارىنان شەمشيەۆ ەسٸنەن تانىپ قالعان, بۇدان بٶلەك مارقۇمنىڭ القىمىندا الاقان ٸزدەرٸ بار, سوعان قاراعاندا ونى بٸرەۋلەر بۋىندىرعان بولۋى مٷمكٸن.
سٶي دەگەن سانجار بوقاەۆ:
"شەمشيەۆ سۋيتسيد جاساعان جوق, ونىڭ اجالى ادامنان كەلدٸ. تەرگەۋشٸلەر بٸر جىل بويى مارقۇمنىڭ تۋعان-تۋىستارىن اداستىرىپ كەلگەن. ونىڭ دەنەسٸندەگٸ ايعاقتار شەمشيەۆتٸڭ ٶزدٸگٸنەن اسىلىپ ٶلمەگەنٸن راستايدى. مەسكەۋلٸك ساراپشىلار مۇنداي ۇيعارىمعا كەلگەن قازاقستاندىق ەرٸپتەستەردٸڭ شەشٸمٸن جوققا شىعارىپ وتىر. ٸلگەرٸدەگٸ فاكتٸلەردٸ ەسەپكە الا كەلە, ونىڭ ٶز-ٶزٸنە قول جۇمساماعانىن كٶرەمٸز", – دەدٸ.
ساياساتكەر وسى ورايدا باس پروكۋراتۋرا مەن ٸٸم-نەن جاڭا ساراپتامانىڭ نەتيجەسٸن تەرگەۋ ٸسٸنە ەنگٸزۋدٸ تالاپ ەتۋدە. تەرگەۋدٸڭ ٶزٸن "قىلمىس" ساناتىنا كٶشٸرٸپ, ٸستٸ قايتا قاراۋ قاجەت.
شەمشيەۆتٸ قاساقانا ٶلتٸرگەن بولسا, قۇقىق قورعاۋ ورگاندارى بۇعان تاپسىرىس بەرۋشٸ مەن ورىنداۋشىنى انىقتاۋعا مٸندەتتٸ.
ونىڭ پٸكٸرٸنشە, وسى ٸسكە تۇمسىق تىققان ىقپالدى شەنەۋنٸكتٸڭ بٸرٸ – ٸستٸڭ ەدٸلەتتٸ تەرگەلۋٸن قالامايدى, ولاي بولسا ٶزٸنٸڭ بىلىعى ەشكەرە بولادى دەپ الاڭدايدى.
"سول سەبەپتٸ سوڭعى ساراپتاما نەتيجەسٸن قاپەرگە الماي, ٸستٸڭ "قىلمىستىق" ساناتقا كٶشۋٸنە كەدەرگٸ كەلتٸرٸپ وتىر", – دەيدٸ بوقاەۆ.
نازارباەۆتىڭ سٷت كەنجەسٸ ەلييا نازارباەۆا يەلٸك ەتكەن اتىشۋلى "وپەراتور روپ-تىڭ" اتقارۋشى ديرەكتورى رۋسلان شەمشيەۆتٸڭ بىلتىرعى جىلدىڭ 26 قازانىندا سۋيتسيد جاساعانى حابارلانعان ەدٸ. بۇرىن شەمشيەۆ "ازاماتتارعا ارنالعان ٷكٸمەت" مەملەكەتتٸك كورپوراتسيياسىندا, كٶلٸك پروكۋراتۋراسىندا, سونداي-اق كەدەن ورگاندارىندا جۇمىس ٸستەگەن. استانا پوليتسيياسى "ٶز-ٶزٸنە قول جۇمساۋعا جەتكٸزۋ" بابى بويىنشا ٸس قوزعاعان.
...
بۇعان دەيٸن "وپەراتور روپ"- تاعى قارجى جىمقىرۋ ٸسٸنە بايلانىستى سوت وتىرىسىندا ايىپتالۋشىلاردىڭ بٸرٸ, كومپانييانىڭ ەكس-قارجى ديرەكتورى رٷستەم تەمٸربەك ەلييا نازارباەۆانى سوتقا شاقىرۋدى تالاپ ەتكەن.
ەلييا نازارباەۆا "وپەراتور روپ" كومپانيياسىنىڭ قۇرىلتايشىسى بولعان. تەمٸربەكتٸڭ سٶزٸنشە, نازارباەۆانىڭ اقشا العانىن دەلەلدەيتٸن قۇجاتتار بار.
سوت وتىرىسىندا رٷستەم تەمٸربەك ەلييا نازارباەۆانىڭ Recycling Company ارقىلى 5,8 ميلليارد تەڭگە, ٶزگە دە كومپانييالار ارقىلى تاعى 5 ميلليارد تەڭگە العانىن مەلٸمدەدٸ.
"ەگەر تەرگەۋ نازارباەۆا ەلييانىڭ اقشانى بٸر قالتاسىنان ەكٸنشٸ قالتاسىنا سالۋىن ۇرلىق دەپ ەسەپتەسە, نەگە ونى تىم بولماعاندا كۋەگەر رەتٸندە تەرگەمەيدٸ. ەرينە, ەلباسىنىڭ قىزىن تەرگەۋگە شاقىرۋ انتيكوردىڭ قولىنان كەلمەيدٸ", – دەدٸ تەمٸربەك.
سونداي-اق ايىپتالۋشىلاردىڭ بٸرٸ ۋكراينالىق سۆەتلانا كوروتەنكونىڭ ادۆوكاتى ەكس-پرەزيدەنتتٸڭ كٸشٸ قىزى قۇرىلتايشى رەتٸندە اقشانىڭ جۇمسالۋىنا قاتىستى شەشٸمدەر قابىلداعانىن ايتادى.
"وسى ٸس بويىنشا تىيىم سالىنعان زاۋىت نازارباەۆاعا تيەسٸلٸ. زاۋىت زاڭسىز اقشاعا سالىنعاندىقتان, تەركٸلەنۋٸ عاجاپ ەمەس. ول ٸسكە مٷلدەم ارالاسىپ جاتقان جوق. دەگەنمەن بۇعان دەيٸن بٸرنەشە رەت ەلييا نازارباەۆادان جاۋاپ الۋدى تالاپ ەتكەنبٸز", – دەيدٸ كوروتەنكونىڭ قورعاۋشىسى.
