Ol Shámshievti áldekimderdiń qasaqana óltirgenine senimdi. Máskeýdegi táýelsiz saraptama ortalyǵy osyndai uiǵarymǵa kelgen. Saraptama nátijesin jariia etken saiasatker, marqumnyń jelke tusynda áldebir aýyr zatpen urǵannan paida bolǵan isik anyqtalǵan deidi.
Saldarynan Shámshiev esinen tanyp qalǵan, budan bólek marqumnyń alqymynda alaqan izderi bar, soǵan qaraǵanda ony bireýler býyndyrǵan bolýy múmkin.
Sói degen Sanjar Boqaev:
"Shámshiev sýitsid jasaǵan joq, onyń ajaly adamnan keldi. Tergeýshiler bir jyl boiy marqumnyń týǵan-týystaryn adastyryp kelgen. Onyń denesindegi aiǵaqtar Shámshievtiń ózdiginen asylyp ólmegenin rastaidy. Máskeýlik sarapshylar mundai uiǵarymǵa kelgen qazaqstandyq áriptesterdiń sheshimin joqqa shyǵaryp otyr. Ilgeridegi faktilerdi esepke ala kele, onyń óz-ózine qol jumsamaǵanyn kóremiz", – dedi.
Saiasatker osy oraida Bas prokýratýra men IIM-nen jańa saraptamanyń nátijesin tergeý isine engizýdi talap etýde. Tergeýdiń ózin "qylmys" sanatyna kóshirip, isti qaita qaraý qajet.
Shámshievti qasaqana óltirgen bolsa, quqyq qorǵaý organdary buǵan tapsyrys berýshi men oryndaýshyny anyqtaýǵa mindetti.
Onyń pikirinshe, osy iske tumsyq tyqqan yqpaldy sheneýniktiń biri – istiń ádiletti tergelýin qalamaidy, olai bolsa óziniń bylyǵy áshkere bolady dep alańdaidy.
"Sol sebepti sońǵy saraptama nátijesin qaperge almai, istiń "qylmystyq" sanatqa kóshýine kedergi keltirip otyr", – deidi Boqaev.
Nazarbaevtyń sút kenjesi Áliia Nazarbaeva ielik etken atyshýly "Operator ROP-tyń" atqarýshy direktory Rýslan Shámshievtiń byltyrǵy jyldyń 26 qazanynda sýitsid jasaǵany habarlanǵan edi. Buryn Shámshiev "Azamattarǵa arnalǵan úkimet" memlekettik korporatsiiasynda, kólik prokýratýrasynda, sondai-aq keden organdarynda jumys istegen. Astana politsiiasy "óz-ózine qol jumsaýǵa jetkizý" baby boiynsha is qozǵaǵan.
...
Buǵan deiin "Operator ROP"- taǵy qarjy jymqyrý isine bailanysty sot otyrysynda aiyptalýshylardyń biri, kompaniianyń eks-qarjy direktory Rústem Temirbek Áliia Nazarbaevany sotqa shaqyrýdy talap etken.
Áliia Nazarbaeva "Operator ROP" kompaniiasynyń quryltaishysy bolǵan. Temirbektiń sózinshe, Nazarbaevanyń aqsha alǵanyn dáleldeitin qujattar bar.
Sot otyrysynda Rústem Temirbek Áliia Nazarbaevanyń Recycling Company arqyly 5,8 milliard teńge, ózge de kompaniialar arqyly taǵy 5 milliard teńge alǵanyn málimdedi.
"Eger tergeý Nazarbaeva Áliianyń aqshany bir qaltasynan ekinshi qaltasyna salýyn urlyq dep eseptese, nege ony tym bolmaǵanda kýáger retinde tergemeidi. Árine, Elbasynyń qyzyn tergeýge shaqyrý Antikordyń qolynan kelmeidi", – dedi Temirbek.
Sondai-aq aiyptalýshylardyń biri ýkrainalyq Svetlana Korotenkonyń advokaty eks-prezidenttiń kishi qyzy quryltaishy retinde aqshanyń jumsalýyna qatysty sheshimder qabyldaǵanyn aitady.
"Osy is boiynsha tyiym salynǵan zaýyt Nazarbaevaǵa tiesili. Zaýyt zańsyz aqshaǵa salynǵandyqtan, tárkilenýi ǵajap emes. Ol iske múldem aralasyp jatqan joq. Degenmen buǵan deiin birneshe ret Áliia Nazarbaevadan jaýap alýdy talap etkenbiz", – deidi Korotenkonyń qorǵaýshysy.
