سپيكەرلەردىڭ ايتۋىنشا، جۇمىس ساپاردىڭ باستى ماقساتى دۇنيەدەگى الدىڭعى قاتارلى مەديسيناسى دامىعان ەلدەردىڭ ءبىرى سانالاتىن وڭتۇستىك كورەيا مەملەكەتىنىڭ مەديسينالىق كومەك كورسەتۋ جۇيەسىنىڭ جۇمىسىمەن تانىسۋ. بريفينگتە ءوز ويىمەن بولىسكەن سارىاعاش اۋداندىق اۋرۋحاناسىنىڭ باس دارىگەرى، توپ جەتەكشىسى يبراگيم تاشيەۆ وڭىردەن بارعان دەلەگاسيالار كومپيۋتەرلىك-اقپاراتتىق جۇيەنىڭ جۇمىس تارتىبىمەن، مەديسيالىق ساقتاندىرۋ جۇيەسىنىڭ ەرەكشەلىكتەرىمەن، ينسۋلت العان ناۋكاستارعا كورسەتىلەتىن كومەك، ينسۋلتان كەيىنگى رەابيليتاسيا جۇمىستارىن ۇيىمداستىرۋ ماسەلەلەرىمەن تانىسقانىن اتاپ ءوتتى.
«ءبىز ەڭ الدىمەن 3 اۋرۋحانادان تۇراتىن سەم مەديسينالىق كلينيكاسىنىڭ جۇمىسىمەن تانىسۋدان باستادىق. گوسپيتالدا مەديسينانىڭ بارلىق سالالارى بويىنشا بولىمشەلەر بار، جانە ولار كاسىبي ماماندارمەن زاماناۋي مەديسينالىق قۇرال-جابدىقتارمەن قامتاماسىز ەتىلگەن. سونداي-اق، زاماناۋي تالاپتارعا ساي كەلەتىن ەمدەۋ كەشەندەرى قاتارىنا كىرەتىن ادجۋ ۋنيۆەرسيتەتتىك كلينيكاسىنىڭ جۇمىسىن كوردىك. وندا بار-جوعى 80 ستۋدەنت ءدارىس الادى. كلينيكا ۇجىمىنىڭ ايتۋىنشا، بۇل ۇزدىك مەديسينالىق مامانداردى دايىنداۋدىڭ كەپىلى ەكەن»، - دەيدى يبراگيم تاشيەۆ.
[caption id="attachment_30422" align="aligncenter" width="800"]
سۋرەت اۆتورى: ازات ديداربەك[/caption]
مۇنىمەن قوسا وڭتۇستىكقازاقستاندىق 20 دارىگەر كەنگيدو پروۆينسياسىنىڭ ۆيسە-مەرى مەن دەنساۋلىق ساقتاۋ ءمينيسترىنىڭ قابىلداۋىندا بولدى. وندا قوس تاراپ پروۆينسيا مەديسينا سالاسىنىڭ جەتىستىكتەرى مەن مەديسينالىق ساقتاندىرۋ جۇيەسىنىڭ جۇمىسى جايلى ءسوز قوزعاعان.
باسپا ءسوز كونفەرەنسياسىندا ءسوز العان شاردارا اۋداندىق ەمحاناسىنىڭ باس دارىگەرى جانار وسپانوۆا مەديسينالىق ساقتاندىرۋ جۇيەسىن ەندىرۋدە ەلۋ جىلدىق تاجىريبە بار وڭتۇستىك كورەيانىڭ جۇيەسىن وڭىرىمىزدە جۇزەگە اسىرۋعا بولاتىنىن ايتتى.
ارىس اۋداندىق ورتالىق اۋرۋحاناسىنىڭ باس دارىگەرى ەرعالي الىمبايەۆتىڭ ايتۋىنشا، وڭتۇستىك كورەيادا سەۋل ۋنيۆەرسيتەتتىك اۋرۋحاناسىنان باسقا بارلىق گوسپيتالدار تولىعىمەن جەكەمەنشىك ەكەن. ونداعى مەديسينالىق كومەكتىڭ بارلىعى، ونىڭ ىشىندە جەدەل جاردەم قىزمەتى دە اقىلى تۇردە كورسەتىلەدى. ال، ساقتاندىرۋ قورىنا ازاماتتار ءوزىنىڭ 20 پايىز تابىسىن وتكىزىپ وتىرادى ەكەن. سول سەبەپتەن، كلينيكالاردىڭ جاڭا قۇرال سايماندارمەن جابدىقتالىپ، پاسيەنتتەرگە زاماناۋي ۇلگىدە دياگنوستيكالىق جانە ەمدىك كومەك كورسەتۋىنە مۇمكىندىك بار.
جالپى ساپار قورىتىندىسىمەن دارىگەرلەر وبلىستا حالىق اراسىندا سانيتارلىق اعارتۋ جۇمىستارىن جانداندىرۋ، بمسك دەڭگەيىن كوتەرۋ، اۋداندىق اۋرۋحانالاردا رەابيليتاسيا بولىمشەلەرىن اشۋ، ءينسۋلتتىڭ الدىن الۋ جانە رەابيليتاسيلىق كومەكتى جانداندىرۋ جانە وسى جۇمىستارعا قوعامدىق ۇيىمدار مەن اكىمشىلىك قىزمەتكەرلەردى جۇمىلدىرۋ بويىنشا جۇمىستاردى دامىتۋ قاجەت دەپ تۇيگەن.
ايتا كەتەيىك، وسى جىلدىڭ ءساۋىر ايىندا وڭتۇستىك كورەيا رەسپۋبليكاسىنىڭ ءبىر توپ ۇزدىك دارىگەرلەرى شىمكەنتتە ەلىمىزدىڭ ءار وڭىرىنەن كەلگەن مەديسينا ماماندارىنا ماستەر-كلاسستار وتكىزىپ، ءدارىس وقىپ، تاجىريبەلەرىمەن بولىسكەن ەدى. وندا وڭتۇستىك كورەيانىڭ الدىڭعى قاتارلى 4 كلينيكاسىمەن ىنتىماقتاستىقتى ارتتىرۋ ماقساتىندا وڭتۇستىك قازاقستان وبلىسىنىڭ دەنساۋلىق ساقتاۋ باسقارماسى مەن كورەيا رەسپۋبليكاسى دەنساۋلىق ساقتاۋ يندۋسترياسىن دامىتۋ ينستيتۋتى (KHIDI) اراسىندا تۇزىلگەن ىنتىماقتاستىق مەموراندۋمىنا قول قويىلعان بولاتىن.
وقو اكىمىنىڭ باسپا ءسوز قىزمەتى
