«ونەرلى ولكە» وبلىستىق ونەر فەستيۆالى اياسىنداعى تۇركىستان قالاسىنىڭ مادەنيەت كۇندەرى قورىتىندىلاندى. «كەرۋەن ساراي» تۋريستىك كەشەنىندە وتكەن گالا-كونسەرتكە قالا اكىمى نۇربول تۇراشبەكوۆ قاتىسىپ، ساحنا تورىندە جۇرتشىلىققا جىلى لەبىزىن ءبىلدىردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بيىل تۇركىستان – تۇركى مەملەكەتتەرىنىڭ تۋريزم استاناسى مارتەبەسىن يەلەندى. مەملەكەت باسشىسى قاسىم-جومارت توقايەۆ تۇركى وركەنيەتىن جاڭعىرتۋدى تۇركىستاندى الەمگە تانىتۋدان باستاۋ كەرەك دەپ، كونە شاھارعا ەرەكشە ءمان بەرىپ كەلەدى. قالامىز الداعى ۋاقىتتا دا باۋىرلاس ەلدەرگە ورتاق رۋحاني استانا رەتىندە دامي بەرەتىنى ءسوزسىز، – دەدى قالا باسشىسى.
مادەني شاراعا قالا تۇرعىندارى مەن قوناقتارى، وبلىستىق جانە قالالىق ءماسليحات دەپۋتاتتارى مەن زيالى قاۋىم وكىلدەرى قاتىستى. گالا-كونسەرتتە ەلىمىزگە تانىمال ەسترادا جۇلدىزدارى زاتتىبەك كوپبوسىن ۇلى مەن كەڭەس ءالىمجان ءان شىرقاپ، قالىڭ كوپشىلىككە كوتەرىڭكى كوڭىل-كۇي سىيلادى.
كونسەرتتىك باعدارلامادا «ياسسى» حالىقتىق بي ءانسامبلى مىڭ بۇرالا بي بيلەپ، قالالىق مادەنيەت ءۇيىنىڭ ونەرپازدارى قوڭىر ۇنمەن تۇركىستان اسپانىن سازعا بولەدى. ونەر سۇيەر قاۋىم انشىلەرمەن قوسىلا ءان ايتىپ، مەرەكەلىك كەشتىڭ ءسانىن كىرگىزدى.
ايتا كەتەيىك، ەكى كۇنگە سوزىلعان مادەنيەت كۇندەرى بارىسىندا ەتنواۋىلدا ۇلتتىق قۇندىلىقتار ناسيحاتتالىپ، ءتول ونەرىمىز پاش ەتىلدى. كەلەسى كوشتى 23-24 تامىز كۇندەرى جەتىساي اۋدانىنىڭ ونەرپازدارى جالعايدى.
