ەكى مەملەكەتتىڭ 30 جىلدىق دوستىق قارىم-قاتىناسى اياسىندا وتكەن كەزەكتى ينۆەستيسيالىق فورۋمعا ونلاين فورماتتا قاتىسقان تۇركىستان وبلىسى اكىمى ءومىرزاق شوكەيەۆ ءوڭىر الەۋەتىنە باسىمدىلىق بەردى.
جيىنعا قاتىسۋشى اقش، بىرىككەن اراب امىرلىكتەرى مەن گەرمانيانىڭ حالىقارالىق ساراپشىلارىن وبلىستىڭ مەملەكەت بويىنشا ينۆەستيسيا تارتۋدا العى قاتاردا بولۋىنىڭ سەبەپتەرىن دە اتاپ ءوتتى.
2020 جىلى گەرمانيا، ليتۆا، ۋكراينا، پولشا، لاتۆيا، ەستونيا، تۇركيا، مولدوۆا، ورتالىق ازيا مەن تمد-عا كورشىلەس ەلدەردىڭ نارىعىنا وڭتايلاندىرىلعان ەكسپورتپەن 1،8 ميلليارد اقش دوللارى سوماسىنا اۋىل شارۋاشىلىعى ءونىمىن شىعارا بىلگەن تۇركىستان ءوڭىرىنىڭ امەريكالىق نارىققا دا دايار ەكەنىن جانە وسى باعىتتا قىزىعۋشىلىق تانىتۋشىلار تابىلاتىنىنا سەنىم ءبىلدىردى.
گەوگرافيالىق ورنى ەرەكشە تۇركىستان اۋماعىنان شىعاتىن ونىمدەردىڭ ءبىر اپتالىق ۋاقىتتا جۇڭگو ەلىنە، ەۋروپاعا جەتكىزىلۋ مۇمكىندىگى – ءار الۋان سالادا ينۆەستيسيا قۇيىپ، كاسىپ جەتىلدىرۋ تابىستىلىعىنىڭ بىردەن-بىر كورسەتكىشى. مەملەكەت تاراپىنان ينۆەستورلارعا ارنالعان سالىقسىز جانە وزگە جەڭىلدىكتەر قاراستىرىلعان باعدارلامالارى ءوڭىر الەۋەتىن ارتتىرۋدا ءوز سەپتىگىن بەرەدى.
ەۋرازيا جاۋھارى ورنالاسقان تۇركىستان قالاسىن تۋريزم ورتالىعى رەتىندە قالىپتاستىرۋ شەشىمىن قابىلداعان تۇڭعىش پرەزيدەنت – ەلباسى نۇرسۇلتان ءابىش ۇلىنىڭ ىقپالىمەن اتقارىلعان ءۇش جىلدىق جۇمىس جەمىسىمەن تانىستىرىپ وتكەن ءوڭىر باسشىسى، قازىرگى كەزەڭ – جەرگىلىكتى تۋريزم سالاسىنا قىزىعۋشىلىق تانىتۋدىڭ ەڭ وڭتايلى كەزەڭى ەكەنىن دە ايتىپ ءوتتى.
ايتا كەتەيىك، 14-17 ماۋسىم ارالىعىندا ق ر سىرتقى ىستەر مينيسترلىگى، قازاقستان رەسپۋبليكاسىنىڭ اقش-تاعى ەلشىلىگى، "KAZAKH INVEST "ۇك" اق جانە اقش ساۋدا-ونەركاسىپتىك پالاتاسى ونلاين فورماتتا ۇيىمداستىرعان قازاقستان-امەريكا ەكونوميكالىق فورۋمى وتۋدە.
