ولجاس بەكتەنوۆ سۋ تاسقىنىنا قارسى شتابتىڭ وتىرىسىن وتكىزدى

جاربول كەنت ۇلى 31 ناۋ. 2024 11:54 1425

شتابتىڭ نەگىزگى مىندەتى – سۋ تاسقىنىنا قارسى ءىس-شارالاردى جۇرگىزۋ جانە ازاماتتاردىڭ قاۋىپسىزدىگىن قامتاماسىز ەتۋ جونىندەگى قىزمەتتى ۇيلەستىرۋ.

شتاب باسشىسى – پرەمەر-مينيستر ولجاس بەكتەنوۆ، پرەمەر-مينيستردىڭ ورىنباسارى قانات بوزىمبايەۆ شتاب باسشىسىنىڭ ورىنباسارى بولىپ تاعايىندالدى. شتاب قۇرامىنا پرەزيدەنت اكىمشىلىگىنىڭ باسشىلىعى، ورتالىق جانە جەرگىلىكتى اتقارۋشى ورگانداردىڭ باسشىلارى كىردى.

وتىرىستا مەملەكەت باسشىسىنىڭ تاپسىرمالارىنىڭ ورىندالۋ بارىسى جانە سۋ تاسقىنىنا قارسى ءىس-شارالاردى كۇشەيتۋ شارالارى تۋرالى مينيسترلەر مەن وڭىرلەردىڭ اكىمدەرى تىڭدالدى.

تج ايماقتارىنان بارلىعى 11 306 ادام ەۆاكۋاسيالاندى. ۋاقىتشا ورنالاستىرۋ بەكەتتەرىندە 5 456 ادام بار. سۋ شايىپ كەتكەن 40 اۆتوجولدى، كوپىردى جانە 39 جول توسەمىن قالپىنا كەلتىرۋ جۇمىستارى باقىلاۋعا الىندى. كولىك قاتىناسى توقتاپ قالعان ەلدى مەكەندەرمەن بايلانىس ورناتىلىپ، اكىمدىكتەر ازىق-تۇلىك پەن دارى-دارمەكتىڭ قاجەتتى قورلارىن دايىندادى. تج ايماقتارىنداعى حالىققا كومەك كورسەتۋ تاۋلىك بويى، ونىڭ ىشىندە اۋە كەمەلەرىنىڭ كومەگىمەن جۇزەگە اسىرىلۋدا. جۇمىسقا 7 مىڭنان استام ادام، 2 مىڭنان استام تەحنيكا، ونىڭ ىشىندە سۋ ايداۋ قۇرالدارى، ءجۇزۋ جانە اۋە كەمەلەرى تارتىلدى.

سۋ قويمالارى مەن وزەندەردەگى جاعدايعا مونيتورينگ جۇرگىزىلۋدە. قازىرگى ۋاقىتتا اقتوبە، سازدى، اششىسۋ، جارتاس سۋ قويمالارى ترانزيتتىك رەجيمدە جۇمىس ىستەپ تۇر، بەلسەندى تۇردە سۋ جىبەرۋ جۇزەگە اسىرىلۋدا. قارعالى سۋ قويماسى جيناقتاۋ رەجيمىندە. اكىمدىكتەر سۋ تاسقىنىنىڭ ءقاۋپى جوعارى وڭىرلەردە الدىن الۋ شارالارىن جۇرگىزىپ جاتىر. قاجەت بولعان جاعدايدا قوسىمشا كۇشتەر مەن قۇرالدار جىبەرىلەدى.

تج سالدارىنان قيراعان ۇيلەردى قالپىنا كەلتىرۋ جۇمىستارى مەن سالۋعا ق ر ۇكىمەتى مەن جەرگىلىكتى اتقارۋشى ورگانداردىڭ رەزەرۆتەرىنەن قاراجات بولىنەتىن بولادى. ءۇيى اپاتتى دەپ تانىلعان زارداپ شەككەن ازاماتتاردىڭ ءتىزىمىن جەرگىلىكتى اكىمدىكتەر جاسايدى.

«مەملەكەت باسشىسى سۋ تاسقىنىنا قارسى ءىس-شارالاردى قاناعاتتانارلىقسىز دەپ سىنعا الدى. قازىردەن باستاپ اپاتتان كەلتىرىلگەن زالالدىڭ كولەمىن باعالاۋدى باستاپ، زارداپ شەككەن ادامدارعا دەرەۋ ماتەريالدىق كومەك كورسەتۋگە كىرىسۋ كەرەك. سونداي-اق بولاشاقتا مۇنداي اۋقىمدى سۋ تاسقىنىنىڭ الدىن الۋ ءۇشىن كەشەندى شارالار ازىرلەۋ قاجەت. ءار وڭىردە ناقتى ءىس-قيمىل جوسپارى بولۋعا ءتيىس»، — دەپ اتاپ ءوتتى شتاب ءتوراعاسى ولجاس بەكتەنوۆ.


ۇسىنىلعان
سوڭعى جاڭالىقتار
x