Shtabtyń negizgi mindeti – sý tasqynyna qarsy is-sharalardy júrgizý jáne azamattardyń qaýipsizdigin qamtamasyz etý jónindegi qyzmetti úilestirý.
Shtab basshysy – Premer-Ministr Oljas Bektenov, Premer-Ministrdiń orynbasary Qanat Bozymbaev shtab basshysynyń orynbasary bolyp taǵaiyndaldy. Shtab quramyna Prezident Ákimshiliginiń basshylyǵy, ortalyq jáne jergilikti atqarýshy organdardyń basshylary kirdi.
Otyrysta Memleket basshysynyń tapsyrmalarynyń oryndalý barysy jáne sý tasqynyna qarsy is-sharalardy kúsheitý sharalary týraly ministrler men óńirlerdiń ákimderi tyńdaldy.
Sý qoimalary men ózenderdegi jaǵdaiǵa monitoring júrgizilýde. Qazirgi ýaqytta Aqtóbe, Sazdy, Ashysý, Jartas sý qoimalary tranzittik rejimde jumys istep tur, belsendi túrde sý jiberý júzege asyrylýda. Qarǵaly sý qoimasy jinaqtaý rejiminde. Ákimdikter sý tasqynynyń qaýpi joǵary óńirlerde aldyn alý sharalaryn júrgizip jatyr. Qajet bolǵan jaǵdaida qosymsha kúshter men quraldar jiberiledi.
«Memleket basshysy sý tasqynyna qarsy is-sharalardy qanaǵattanarlyqsyz dep synǵa aldy. Qazirden bastap apattan keltirilgen zalaldyń kólemin baǵalaýdy bastap, zardap shekken adamdarǵa dereý materialdyq kómek kórsetýge kirisý kerek. Sondai-aq bolashaqta mundai aýqymdy sý tasqynynyń aldyn alý úshin keshendi sharalar ázirleý qajet. Ár óńirde naqty is-qimyl jospary bolýǵa tiis», — dep atap ótti Shtab tóraǵasy Oljas Bektenov.
