ۋكراينا پرەزيدەنتى كەڭسەسىنىڭ كەڭەسشىسى، رەسەيمەن كەلىسسوز بويىنشا ۋكراين دەلەگاسياسىنىڭ مۇشەسى ميحيل پودولياك رەسەي ۋكراينا اۋماعىنان اسكەرىن اكەتپەيىنشە كييەۆ اتىستى توقتاتۋ تۋرالى كەلىسىمگە بارمايتىنىن ايتتى، – دەپ حابارلايدى ازاتتىق.

رەسەي اسكەرى «ەلدەن كەتۋى ءتيىس، تەك سودان كەيىن عانا بەيبىت پروسەستى قالپىنا كەلتىرۋ مۇمكىن بولادى» دەدى پودولياك. ونىڭ سوزىنەن Reuters اگەنتتىگى ءۇزىندى كەلتىرەدى.

ول تالاپتاردىڭ اراسىندا ماسكەۋ اننەكسيالاپ العان قىرىمنىڭ بار-جوعىن ايتپادى.

قىرىم مەن دونباستىڭ ءبىر بولىگى 24 اقپانعا دەيىن دە رەسەيشىل كۇشتەردىڭ قولىندا بولعان. وسىعان دەيىن ۋكراينا باسشىسى ۆلاديمير زەلەنسكيي رەسەي اسكەرى 23 اقپان كۇنگى پوزيسياسىنا ورالسا عانا كەلىسسوزگە باراتىنىن ايتقان. پودولياك سەكىلدى زەلەنسكيي دە ماسكەۋگە ۋكراينا تەرريتورياسىن بەرمەيتىنىن ايتقان.

پودولياكتىڭ سوزىنە قاراعاندا، اسكەرىن ەلدەن شىعارماعان رەسەي ءۇزىلىس جاساعان سايىن كۇشىن قالپىنا كەلتىرىپ، بۇرىنعىدان بەتەر ەكپىندى سوققىمەن ورالادى. پرەزيدەنت كەڭەسشىسى كييەۆتىڭ پوزيسياسى بارعان سايىن "قاتايىپ" بارا جاتقانىن مويىندادى. وسىعان دەيىن رەسەي تارابى بەيبىت كەلىسسوز ءىس جۇزىندە مۇلدە جۇرگىزىلىپ جاتقان جوق دەگەن ەدى.

پودولياك ءبىرقاتار باتىس ەلدەرىنىڭ اتىستى دەرەۋ توقتاتۋ تۋرالى ۇندەۋىن "اقىلعا قونىمسىز"سانايدى. وسىعان دەيىن يتاليانىڭ بۇرىنعى پرەمەر-مينيسترى سيلۆيو بەرلۋسكوني سونداي مالىمدەمە جاساعان. New York Times باسىلىمى ۋكراينا جوعالتىپ العان تەرريتورياسىن ەندى قايتارا المايدى دەپ تۇجىرىمداعان. ميحايل پودولياك رەسەي "اۋىر جەڭىلىسكە ۇشىراۋى ءۇشىن" باتىس ۋكراينانى قولداي بەرۋى ءتيىس دەپ ەسەپتەيدى.

ۋكراينادا سوعىستىڭ ءجۇرىپ جاتقانىنا ءۇش ايعا جۋىقتادى.

رەسەي بيلىگى ونى "ارنايى وپەراسيا" دەپ اتاعان. رەسەي اسكەرى ۋكراينانىڭ وڭتۇستىگىندەگى ءبىرقاتار وبلىستاردى باقىلاۋىنا الىپ، ولاردىڭ ازوۆ تەڭىزىمەن بايلانىسىن ۇزگەن. ولار كييەۆتەن كەتۋگە ءماجبۇر بولدى. ءقازىر شايقاس ۋكراينا شىعىسىنداعى نەگىزىنەن لۋگانسك جانە دونەسك وبلىستارىندا ءجۇرىپ جاتىر.