Reseı áskeri «elden ketýi tıis, tek sodan keıin ǵana beıbit prosesti qalpyna keltirý múmkin bolady» dedi Podolák. Onyń sózinen Reuters agenttigi úzindi keltiredi.
Ol talaptardyń arasynda Máskeý aneksıalap alǵan Qyrymnyń bar-joǵyn aıtpady.
Qyrym men Donbastyń bir bóligi 24 aqpanǵa deıin de reseıshil kúshterdiń qolynda bolǵan. Osyǵan deıin Ýkraına basshysy Vladımır Zelenskıı Reseı áskeri 23 aqpan kúngi pozısıasyna oralsa ǵana kelissózge baratynyn aıtqan. Podolák sekildi Zelenskıı de Máskeýge Ýkraına terıtorıasyn bermeıtinin aıtqan.
Podoláktyń sózine qaraǵanda, áskerin elden shyǵarmaǵan Reseı úzilis jasaǵan saıyn kúshin qalpyna keltirip, burynǵydan beter ekpindi soqqymen oralady. Prezıdent keńesshisi Kıevtiń pozısıasy barǵan saıyn "qataıyp" bara jatqanyn moıyndady. Osyǵan deıin Reseı taraby beıbit kelissóz is júzinde múlde júrgizilip jatqan joq degen edi.
Podolák birqatar batys elderiniń atysty dereý toqtatý týraly úndeýin "aqylǵa qonymsyz"sanaıdy. Osyǵan deıin Italıanyń burynǵy premer-mınıstri Sılvıo Berlýskonı sondaı málimdeme jasaǵan. New York Times basylymy Ýkraına joǵaltyp alǵan terıtorıasyn endi qaıtara almaıdy dep tujyrymdaǵan. Mıhaıl Podolák Reseı "aýyr jeńiliske ushyraýy úshin" Batys Ýkraınany qoldaı berýi tıis dep esepteıdi.
Ýkraınada soǵystyń júrip jatqanyna úsh aıǵa jýyqtady.
Reseı bıligi ony "arnaıy operasıa" dep ataǵan. Reseı áskeri Ýkraınanyń ońtústigindegi birqatar oblystardy baqylaýyna alyp, olardyń Azov teńizimen baılanysyn úzgen. Olar Kıevten ketýge májbúr boldy. Qazir shaıqas Ýkraına shyǵysyndaǵy negizinen Lýgansk jáne Donesk oblystarynda júrip jatyr.
