وتكەن جىلدىڭ باسىندا Oxford Birsöz Initiative اتتى باستاما قازاق ءتىلىن وقىتۋ مەن دامىتۋعا باعىتتالعان ارنايى باعدارلامانى ىسكە قوستى.
الەمدەگى ەڭ بەدەلدى وقۋ ورىندارىنىڭ ءبىرى – وكسفورد ۋنيۆەرسيتەتىنىڭ (University of Oxford) بازاسىندا ورنالاسقان بۇل اكادەميالىق ورتالىق تۇركىتانۋ، سونداي-اق ءوڭىر تىلدەرى مەن مادەنيەتىن زەرتتەۋ سالاسىنا ماماندانعان.

ورتالىق وكسفورد، ۇلىبريتانياداعى وزگە دە وقۋ ورىندارى مەن حالىقارالىق سەرىكتەستەر اراسىنداعى اكادەميالىق بايلانىستى نىعايتۋعا بەلسەندى تۇردە اتسالىسىپ كەلەدى. Oxford Birsöz Initiative احمەت بايتۇرسىن ۇلى ينستيتۋتىمەن بىرلەسكەن مەموراندۋم نەگىزىندە جۇزەگە اسقان ەدى. جوبا اياسىندا قازاق ءتىلىن حالىقارالىق اكادەميالىق ورتادا زەرتتەۋ مەن دامىتۋ جۇمىستارى جۇرگىزىلىپ جاتىر.

سوڭعى ۋاقىتتا قازاق تىلىنە دەگەن قىزىعۋشىلىق ارتقان. بۇل شەتەلدىك ستۋدەنتتەر، زەرتتەۋشىلەر مەن دياسپورا وكىلدەرى اراسىندا قازاق ءتىلىن، ادەبيەتىن جانە قازاقستاننىڭ مادەني مۇراسىن ۇيرەنگىسى كەلەتىندەردىڭ سانىنىڭ كوبەيۋىنەن بايقالادى.

بۇرىن وكسفورد ۋنيۆەرسيتەتىندە تەك تۇرىك ءتىلى وقىتىلعان. كەيىنىرەك ازەربايجان ءتىلى بويىنشا باعدارلاما ەنگىزىلدى. ال بۇگىندە تولىققاندى قازاق تىلىنە ارنالعان اكادەميالىق پلاتفورما قالىپتاستىرۋ جۇمىستارى قولعا الىنىپ وتىر. بۇل قادام قازاق ءتىلى مەن مادەنيەتىنىڭ حالىقارالىق جوعارى ءبىلىم جۇيەسىندەگى ورنىن كۇشەيتۋگە زور مۇمكىندىك بەرەدى.

وسى باستاما اياسىندا جوباعا 2025 جىلدىڭ كۇزىندە 3 ايعا تانىمال جۋرناليست، مەديامەنەدجەر جانە قوعام قايراتكەرى ءلايلا سۇلتان قىزى شاقىرىلدى. شەتەلدىك ستۋدەنتتەرمەن ءتۇرلى زەرتتەۋلەر وتكىزىپ، قازاق ءتىلىناڭ اۋقىمدىلىعىن ارتتىرىپ، دارەجەسىن كوتەرۋ ماقساتىندا ارنايى Speaking Club اشۋدى دا جوسپارلاپ وتىر.

بۇل كلۋب ستۋدەنتتەرگە قازاق تىلىندە ەركىن سويلەۋدى تاجىريبەدەن وتكىزىپ قانا قويماي، قازاقستاننىڭ زاماناۋي مادەنيەتىمەن جاقىنىراق تانىسۋعا مۇمكىندىك بەرەدى.

«قازاق ءتىلى – جاي عانا مادەني مۇرا ەمەس، ول – ءبىزدىڭ بولمىسىمىز. ول ءبىزدىڭ دۇنيەتانىمىمىزدى، ويلاۋىمىزدى، ەتيكامىزدى قالىپتاستىرادى. بۇگىندە وسى ءتىلدى حالىقارالىق اكادەميالىق ورتادا دامىتۋ مۇمكىندىگىنە يە بولۋ مەن ءۇشىن مانساپ ەمەس، شىنايى ميسسيا. قازاق تىلىندە سويلەۋ عانا ەمەس، وزگەلەردىڭ دە ونى ۇيرەنگىسى كەلەتىندەي جاعداي جاساۋ ماڭىزدى. بۇل – مەن ءۇشىن بولاشاققا سەنىم مەن وتكەنگە قۇرمەتتىڭ بەلگىسى»، – دەيدى جۋرناليست.

ءلايلا سۇلتان قىزى – قازاقستانداعى العاشقى ءقازاقتىلدى جۋرناليستەردىڭ ءبىرى. ول قازاق ءتىلىن ترەندكە اينالماي تۇرىپ-اق دامىتۋعا ۇلەس قوسقان. راديو، تەلەديدار جانە مادەني جوبالار ارقىلى ۇلتتىق ءتىلدى ناسيحاتتاۋعا قوسقان ەڭبەگى كاسىبي ورتادا دا، قوعام اراسىندا دا جوعارى باعالانىپ كەلەدى. ونىڭ Oxford Birsöz Initiative جوباسىنا قاتىسۋى – تەك جەكە ۇلەسىنىڭ مويىندالۋى عانا ەمەس، سونىمەن قاتار قازاق تىلىنە دەگەن حالىقارالىق قىزىعۋشىلىقتىڭ ارتقانىن بىلدىرەدى.