جۇزدەسۋدە «نۇرلى جەر» مەملەكەتتىك تۇرعىن ءۇي باعدارلاماسىنىڭ باعىتتارىنىڭ ءبىرى – كرەديتتىك تۇرعىن ءۇي قۇرىلىسىن دامىتۋ ماسەلەلەرى قارالىپ، قولجەتىمدى باسپانا ماسەلەسىن شەشۋ جاعدايلارى ءسوز بولدى.
اتالعان بانكتىڭ وڭىرىمىزدەگى جەتەكشىسى سالاداعى اتقارىلعان ءبىرقاتار جۇمىستاردىڭ بارىسىن بايانداپ، الداعى جوسپارلارىمەن ءبولىستى. اتاپ ايتقاندا، بۇگىنگى تاڭدا «تۇرعىن ءۇي قۇرىلىس جيناق بانكى» اق-نىڭ وڭتۇستىك فيليالى «باسپانا» مەكەمەسىمەن قول قويۋ شارالارىن جۇرگىزۋدە. 2018 جىلدىڭ 1 جەلتوقساننان باستاپ بانك ۇجىمى ەلباسى بەكىتكەن "7-20-25" باعدارلاماسى بويىنشا ءتيىستى جۇمىستاردى ىسكە اسىرا باستايدى.
سونىمەن بىرگە، باسقوسۋدا ق.سەيتمامبەتوۆ اكىمگە وبلىس تۇرعىندارى ءۇشىن وتە ءتيىمدى دە، ىڭعايلى بولاتىن ۇسىنىسىن جەتكىزدى. العاشقى سالىمسىز-اق، باسپانالى بولۋعا بولاتىن جوبادا قاراپايىم حالىقتىڭ جاعدايى ەسكەرىلگەن. مۇنان بولەك، اكىمدىك تاراپىنان تۇرعىن ءۇي قۇرىلىس جيناق جۇيەسى بويىنشا ءتۇسىندىرۋ جۇمىستارىن جۇرگىزۋدە قولداۋ كورسەتۋدى سۇرادى.
وسىناۋ ۇسىنىس، تىلەكتەرگە قانىققان ايماق باسشىسى، ەڭ باستىسى، باسپانالاردىڭ قولجەتىمدى بولۋى قاجەتتىگىن ايتىپ، «7-20-25» باعدارلاماسىن وڭىرىمىزدە مىقتاپ قولعا الۋ ءۇشىن تۇسىندىرمە جۇمىستارىن كەڭىنەن جۇرگىزۋدى ءتيىستى باسقارما باسشىلارىنا تاپسىردى.
وسى جىلى «7-20-25» باعدارلاماسىن وبلىستا ىسكە اسىرۋ ماقساتىندا، تۇركىستان قالاسىندا جەكە سالۋشى جانە «تۇركىستان» اكك» اق-ى ارقىلى 6 كوپقاباتتى تۇرعىن ءۇيدىڭ (288 پاتەر، 15،6 مىڭ ش.م.) قۇرىلىسى باستالعان بولاتىن. بۇل پاتەرلەردى 2019 جىلى پايدالانۋعا تاپسىرۋ جوسپارلانىپ، بارلىق ۇيلەردى «7-20-25» باعدارلاما ارقىلى تاراتۋ كوزدەلۋدە.
«7-20-25» باعدارلاماسى ارقىلى سالىنعان تۇرعىن ۇيلەردى تاراتۋ تۇركىستان وبلىسىنىڭ ەنەرگەتيكا، تۇرعىن ۇي-كوممۋنالدىق شارۋاشىلىق باسقارماسى ارقىلى جۇرگىزىلەدى.
سونىمەن قاتار، «تۇرعىن ءۇي قۇرىلىس جيناق بانكى» اق-ى باسشىلىعىنىڭ مالىمەتىنە سايكەس 2019 جىلى تۇركىستان وبلىسىنىڭ ورتالىعى – تۇركىستان قالاسىنان بانكتىڭ وبلىستىق فيليالى اشىلاتىن بولادى.
تۇركىستان وبلىسى اكىمىنىڭ باسپا ءسوز قىزمەتى
