"نۇر-مۇقاسان" توبىنىڭ جاڭا مۇشەسى عالىمجان سۇلەيمەن توپتىڭ بۇرىنعى ءانشىسى، تانىمال جۇلدىز مۇقاسان شاحزادايەۆتان وڭباي تاياق جەگەنىن ايتتى. بۇل جاعداي بايلانىستى Dalanews.kz توپ مۇشەسى نۇرلان قونىسبايەۆتىڭ پىكىرىن سۇراپ حابارلاستى.

نۇرلاس قونىسبايەۆ داۋلى وقيعاعا پىكىر بىلدىرۋدەن باس تارتىپ، زاڭگەر ينگا يمانبايعا حابارلاسۋ كەرەك ەكەنىن ايتتى.

زاڭگەر ينگا يمانبايدىڭ ايتۋىنشا، عالىمجان سۇلەيمەندى الدا وتا كۇتىپ تۇر.

"مۇقاسان شاحزادايەۆ تاراپىنان اياۋسىز سوققىعا جىعىلعان قورعاۋىمداعى ازامات – تانىمال ءانشى ءارى اكتەر عالىمجان مىرزامەن كەزدەستىم. ونىڭ قازىرگى جاعدايى وتە اۋىر. دارىگەرلەر قولىنىڭ سىنعانىن، مۇرنىنىڭ سىنعانىن، بەتىنىڭ قاتتى ىسىپ-كوگەرگەنىن راستادى. الداعى كۇندەرى مۇرنىنا جاراقاتتان كەيىنگى كۇردەلى وتا جاسالماق. بۇل تەك دەنساۋلىققا كەلگەن زيان ەمەس. بۇل – ادامنىڭ ومىرىنە، ەڭبەگىنە، شىعارماشىلىعىنا جاسالعان قاستىق. عالىمجان مىرزا ءدال ءقازىر ءتۇسىرىپ جاتقان ءفيلمىنىڭ جۇمىسى توقتاپ تۇر. ونىڭ كەسىرىن 40 ادامنان تۇراتىن ءبۇتىن ءبىر كينو توبى تارتىپ وتىر. سەبەبى بەت-الپەتى قاتتى جاراقاتتانعان ادام كامەرا الدىنا شىعۋعا جارامايدى. بۇل – ناعىز ماسقارا جاعداي. ەڭ سوراقىسى – مادەنيەت سالاسىنىڭ وكىلدەرى ءوز ارىپتەسىن جابىلىپ ۇرىپ، ەسىنەن تاندىرىپ جىبەرگەنى. بۇل – ونەر ادامىنا عانا ەمەس، جالپى قوعامعا جاسالعان جابايىلىق، ادامشىلىقتان بەزگەن ارەكەت"، - دەدى ادۆوكات.

ەسكە سالايىق، كەشە تانىمال ءانشى مۇقاساننىڭ ۇستىنەن قىلمىستىق ءىس قوزعالعانى بەلگىلى بولدى. 

22 قاراشادا ناۋرىزباي اۋداندىق پوليسيا باسقارماسىنا جەرگىلىكتى تۇرعىن ازامات م. جانە وزگە دە بىرنەشە تۇلعالار تاراپىنان وعان دەنە جاراقاتىن سالۋ دەرەگى بويىنشا ارىزبەن جۇگىنگەن.

"بۇل دەرەك بويىنشا قىلمىستىق ءىس قوزعالدى. وقيعانىڭ بارلىق ءمان-جايىن انىقتاۋعا باعىتتالعان كەشەندى تەرگەۋ ءىس-شارالارى جۇرگىزىلىپ جاتىر. تەرگەۋ ناتيجەلەرى بويىنشا قازاقستان رەسپۋبليكاسىنىڭ زاڭناماسىنا سايكەس ءتيىستى شارالار قابىلدانادى"، - دەپ جازىلعان الماتى قالاسى پوليسيا دەپارتامەنتىنىڭ باسپا ءسوز قىزمەتى حابارلاماسىندا.

بۇعان دەيىن ءىستىڭ ءمان-جايىن جازعان ەدىك. عالىمجان سۇلەيمەننىڭ ايتۋىنشا، داۋدىڭ ءبارى توپ ورىنداعان اننەن شىققان. ماسەلەنى شەشۋ ءۇشىن عالىمجان ەسىمدى ءانشى شاحزادايەۆتىڭ ۇيىنە بارعان. الايدا سوققىعا جىعىلعان. "پوليسيا مۇقاساندى ەمەس، مەنى الىپ كەتتى" دەيدى. ال ءقازىر "نۇر-مۇقاسان" توبىنىڭ مۇشەسى زاڭگەرلەردىڭ كومەگىنە جۇگىنىپ، "جۋان جۇدىرىقتى" ءانشىنى جاۋاپقا تارتقىسى كەلەدى.