ەڭ الدىمەن، ايماق باسشىسى "قۇرىق-اقتاۋ" تاس جولىنىڭ 20-شى شاقىرىمىندا جۇمىسى تۇرالاپ قالعان جىلىجاي اۋماعىن ارالادى. "ەكو پروداكشن" سەرىكتەستىگى بيىل جالپى اۋدانى 460 گەكتار بولاتىن جەردىڭ 3 گەكتارىنا قيار، قىزاناق جانە قۇلپىناي ەگۋدى جوسپارلاپ وتىر. كاسىپكەر ءوز ءىسىن دوڭگەلەتۋ ءۇشىن ينفراقۇرىلىم جۇرگىزۋگە كومەك سۇرادى. وبلىس اكىمى نۇرلان نوعايەۆ وڭىردە جىلىجاي سالۋمەن اينالىسقىسى كەلەتىن كاسىپكەرلەردى جان-جاقتى قولداۋ قاجەتتىگىن اتاپ ءوتتى.
سونداي-اق، ايماق باسشىسى قۇرىق اۋىلىندا ورنالاسقان قىزىلقۇم ەلدى مەكەنىندەگى "رىسبەك" شارۋا قوجالىعىنىڭ جۇمىسىمەن تانىستى. كاسىپكەر جالپى اۋماعى اۋماعى 32 گا جەردىڭ 6 گا ءجۇزىم، الما جەمىس اعاشتارىن وتىرعىزسا، 3 گا جەرگە جىلىجاي سالعان. سونداي-اق، تامشىلاتىپ سۋارۋ تەحنولوگياسى بويىنشا جوڭىشقا، ارپا ەگىپ، مال ازىعىن دايىنداۋدى جولعا قويعان. كاسىپكەر ءوز ءونىمىن جەتىباي، مۇنايشى، قۇرىق اۋىلدارىندا جانە اقتاۋ قالاسىندا ساتادى.
جالپى اۋدان بويىنشا 1645 جەكە قوسالقى شارۋاشىلىق جانە 655 شارۋا قوجالىعى تىركەلگەن، ونىڭ 41ء-ى ەگىنشىلىكپەن اينالىسادى. سونىمەن قاتار، جالپى اۋدانى 2،9 گا بولاتىن 22 فەرمەرلىك جىلىجاي بار. وتكەن جىلى 122،5 گا كوكونىس تۇقىمدارى سەبىلىپ، ناتيجەسىندە 3117،5 توننا ءونىم الىندى. ال، بيىل 130 گەكتارعا كوكونىس ەگىپ، 4000 تونناعا جۋىق ءونىم الۋ جوسپارلانىپ وتىر.
نۇرلان نوعايەۆ ورتالىق مادەنيەت ۇيىندە قاراقيا اۋدانىنىڭ تۇرعىندارىمەن كەزدەسۋ وتكىزدى. ەسەپ بەرۋ كەزدەسۋىندە اۋدان اكىمى قىدىربەردى بەكوۆ 2021 جىلى اتقارىلعان جۇمىستار تۋرالى بايانداما جاساپ، 2022 جىلعا ارنالعان مىندەتتەر تۋرالى ايتتى. نۇرلان نوعايەۆ ءوز كەزەگىندە تۇرعىنداردىڭ سۇراقتارىنا جاۋاپ بەرىپ، ولاردىڭ ۇسىنىستارىن تىڭدادى. كەزدەسۋدە اۋدان تۇرعىندارى اۋىز سۋمەن قامتاماسىز ەتۋ، حالىقتى جۇمىسپەن قامتۋ، قاڭعىباس يتتەردى اتۋ، سپورت زالىن، كارىزدىك تازارتۋ قۇرىلىسىن سالۋ ماسەلەلەرىن كوتەردى. نۇرلان نوعايەۆ، ءوز كەزەگىندە كوتەرىلگەن ماسەلەلەر باسىمدىقتارىنا قاراي جۇيەلى تۇردە شەشىلەتىنىن اتاپ ءوتتى.
بۇدان كەيىن وبلىس اكىمى قۇرىق اۋىلىندا ازاماتتاردى جەكە قابىلدادى.
سونداي-اق، ايماق باسشىسى قاراقيا كاسىپتىك كوللەدجىنىڭ جۇمىسىمەن تانىستى. وندا جەتى ماماندىق بويىنشا ءبىلىم الادى: اۆتوموبيل شارۋاشىلىعى، اۋىل شارۋاشىلىعى، ۆەتەريناريا جانە ەكولوگيا، بايلانىس، تەلەكوممۋنيكاسيا جانە اقپاراتتىق تەحنولوگيالار، ساۋلەت جانە قۇرىلىس، تىگىن ءوندىرىسى جانە كيىم ۇلگىلەۋ. وقۋ ورنىندا 200 ورىندىق جاتاقحانا جۇمىس ىستەيدى. بۇگىنگى تاڭدا بارلىعى 394 ستۋدەنت ءبىلىم الۋدا. 2021 جىلى كوللەدجدى 118 تۇلەك ءبىتىرىپ، ونىڭ 84ء-ى ماماندىعى بويىنشا جۇمىسقا ورنالاستى.
كوللەدج جۇمىسىمەن تانىسقان ايماق باسشىسى اۋدان جاستارىمەن كەزدەسۋ وتكىزدى. كەزدەسۋ بارىسىندا جاستار وبلىس اكىمىنە وزدەرىن قىزىقتىرعان سۇراقتارىن قويىپ، ءوز ۇسىنىستارىن ايتتى. جاستار كوتەرگەن ماسەلەلەر نەگىزىنەن الەۋمەتتىك ماسەلەلەرگە قاتىستى بولدى. ءوڭىر باسشىسى بۇگىنگى بولاشاق ءبىلىمدى، ساۋاتتى، باسەكەگە قابىلەتتى جاستاردىڭ قولىندا ەكەنىن اتاپ ءوتىپ، جاستاردى ازاماتتىق قوعامدى دامىتۋعا قاتىسۋعا شاقىردى.
- مەملەكەت باسشىسى قاسىم-جومارت توقايەۆ جاۋاپتى تۇلعالارعا ازاماتتىق قوعامدى دامىتۋ، ونىڭ الەۋەتىن نىعايتۋ ءۇشىن بار كۇش-جىگەرىن سالۋدى تاپسىردى. ازاماتتىق قوعام نەعۇرلىم كۇشتى بولسا، ەل سوعۇرلىم كۇشتى بولادى. ول ءۇشىن ءقازىر بارلىق جاعداي جاسالعان، جوسپارىمىزدى جۇزەگە اسىرۋ عانا قالادى، - دەدى نۇرلان نوعايەۆ.
وبلىس اكىمى قۇرىق اۋىلىندا ورنالاسقان "اكسون مەد" وڭالتۋ جانە قايتا بەيىمدەۋ ورتالىعىندا بولدى. وندا 40 ادام جۇمىس ىستەيدى.
ورتالىق ءتۇرلى وپەراسيادان كەيىنگى جانە جۇرەك-قان تامىر، بەل-ومىرتقا اۋرۋلارى مەن سپورتتىق جاراقاتتاردى وڭالتۋ، قالپىنا كەلتىرۋ قىزمەتىن كورسەتەدى.
مەكەمەدە قيمىل جاتتىعۋلارىنا، سۋمەن، توكپەن، تۇزبەن ەمدەۋگە، پارافينمەن ەمدەۋگە جانە فيزيوتەراپياعا ارنالعان ارنايى كابينەتتەر جۇمىس ىستەيدى. ورتالىقتىڭ كۇنىنە 200-گە دەيىن ەمدەلۋشىنى قابىلداۋ مۇمكىندىگى بار.
