بۇگىن تۇركىستان وبلىسىنىڭ اكىمى نۇرالحان كوشەروۆ تۇركىستان قالاسىنىڭ ىشكى كوشەلەرىن جوندەۋ جوبالارىمەن تانىسىپ، قالاداعى جوندەۋ جۇمىستارى ءجۇرىپ جاتقان كوشەلەردى كوردى. قالا اكىمى ازىمبەك پازىلبەك ۇلى مەن جاۋاپتى باسشىلار قۇرىلىسى ءجۇرىپ جاتقان جانە ەندى باستالاتىن جوبالار تۋرالى باياندادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسى اكىمى بەيىمبەت مايلين كوشەسىنە كەلىپ، «ب.مايلين كوشەسىن رەكونسترۋكسيالاۋ» جوباسىن كوردى. بۇگىندە اتالعان قۇرىلىستىڭ جوبالىق-سمەتالىق قۇجاتى دايىن. بيىل جۇزەگە اسادى دەگەن جوسپار بار. تاپسىرىس بەرۋشى – تۇركىستان قالاسى اكىمدىگىنىڭ «جولاۋشىلار كولىگى جانە اۆتوكولىك جولدارى ءبولىمى» مەملەكەتتىك مەكەمەسى. جولدىڭ ۇزىندىعى – 1،96 شاقىرىم. جوبا قۇنى – 1 705،8 ملن تەڭگە.
نۇرالحان كوشەروۆ ءا.جانگەلدين كوشەسىنە بارىپ، وسىندا سالىنۋى جوسپارلانعان كوپىردىڭ جوباسىمەن تانىستى. كوپىردىڭ ۇزىندىعى 1،02 شاقىرىم بولسا، جولدىڭ ەنى – 14 مەتر بولادى دەپ جوسپارلانعان. قۇرىلىس قۇنى – 4 453،9 ملن تەڭگە. ءوڭىر باسشىسى اتالعان جوبانى قايتا پىسىقتاپ، جۇيەلەۋدى تاپسىردى.
وبلىس اكىمىنە جوبالىق-سمەتالىق قۇجاتى جاسالعان ءارى قارجىنى تالاپ ەتەتىن جول قۇرىلىسى نىساندارىنىڭ جوبالارى ۇسىنىلدى. ولار جان-جاقتى سارالانىپ، قارجىلاندىرۋعا ۇسىنىلماق. ءوڭىر باسشىسى قۇرىلىس جۇمىستارىن ساپالى اتقارۋدى، ءاربىر مەردىگەردىڭ جۇمىسىن قاداعالاۋدى تاپسىردى. سونىمەن بىرگە قالانىڭ دامۋىنا وڭ سەرپىن بەرەتىن جوبالارعا باسىمدىق بەرۋ كەرەكتىگىن ايتتى.
بۇگىندە تۇركىستان قالاسى اۋماعىندا 845 شاقىرىمدى قۇرايتىن 875 كوشە بار. 2024 جىلى جاقسى جانە قاناعاتتى جاعدايداعى جولدىڭ ۇزىندىعى 430،1 شاقىرىمعا (50،9%) جەتكەن. بيىل جالپى قاشىقتىعى 138،5 شاقىرىمدى قۇرايتىن 159 كوشەگە ورتاشا جوندەۋ جۇمىستارىن جۇرگىزۋ جوسپارلانۋدا. ونىڭ 95،4 شاقىرىمدى قۇرايتىن 94 كوشەسىندە ۆەدومستۆالىق ساراپتامانىڭ وڭ ناتيجەسى الىنىپ، 30 كوشەسىندە جوندەۋ جۇمىستار باستاۋ العان.
سونىمەن قاتار قازىرگى تاڭدا 43،1 شاقىرىمدى قۇرايتىن 65 كوشەگە ورتاشا جوندەۋ جۇمىستارىن جۇرگىزۋ ماقساتىندا سمەتالىق قۇجاتتاما ازىرلەنىپ، ۆەدومستۆالىق ساراپتامادان وتكىزىلۋدە.
جالپى جوعارىدا اتالعان جۇمىستار تولىق اياقتالعاننان كەيىن، 845 شاقىرىم جولدىڭ 568،6 شاقىرىمى اسفالت جابىندىسىمەن قامتىلىپ، جاقسى جانە قاناعاتتى جاعدايداعى جولداردىڭ ۇلەسىن 67،3% جەتكىزۋ جوسپارلانۋدا.
