الماتى تۇرعىنى ابدۋللا روزىباكييەۆ كوشەسىنىڭ اتاۋىن مۇحتار شاحانوۆتىڭ ەسىمىنە اۋىستىرۋدى ۇسىنىپ، پەتيسيا جاريالادى. باستاما اۆتورى بۇل ۇسىنىستى اقىننىڭ ەل مادەنيەتى مەن رۋحانياتىنا سىڭىرگەن ەڭبەگىمەن نەگىزدەيدى، دەپ حابارلايدى Dalanews.kz.
اتالعان پەتيسيا GosRating.com پلاتفورماسىندا جاريالانعان. قۇجات ماتىنىندە مۇحتار شاحانوۆتىڭ شىعارماشىلىعى مەن قوعامدىق قىزمەتى ۇلتتىق قۇندىلىقتاردى دارىپتەۋدە ايرىقشا ءرول اتقارعانى جازىلعان. وسىعان بايلانىستى، اۆتور كوشە اتاۋىن وزگەرتۋ ارقىلى تۇلعانىڭ ەڭبەگىن لايىق تۇردە ۇلىقتاۋدى ۇسىنادى.
سونداي-اق پەتيسيادا كوشە اتاۋلارىن جاڭارتۋ – تاريحي جادتى قالىپتاستىرۋ مەن ماڭىزدى تۇلعالاردى ناسيحاتتاۋدىڭ ءبىر جولى ەكەنى اتالىپ وتكەن.
قۇجاتقا قول قويۋ نەمەسە قارسى داۋىس بەرۋ مۇمكىندىگى بار. ءتيىستى شەشىم قابىلداۋ ءۇشىن پەتيسيا بەلگىلى ءبىر دەڭگەيدە قولداۋ جيناۋى ءتيىس.
پىكىر بىلدىرگىسى كەلگەن ازاماتتار پەتيسياعا ونلاين تۇردە قاتىسا الادى.
