نۇر-سۇلتان اكىمدىگىنىڭ رەسمي سايتىنىڭ مالىمەتى بويىنشا، بيىل بايقاۋ ەل تاۋەلسىزدىگىنىڭ 30 جىلدىعىنا ورايلاستىرىلدى.
ءىس-شارا سانيتارلىق نورمالاردى ساقتاي وتىرىپ وتكىزىلدى. قاتىسۋشىلاردىڭ قاۋىپسىزدىگىن قامتاماسىز ەتۋ ءۇشىن امفيتەاترعا كىرۋ "Ashyq" قوسىمشاسى ارقىلى جۇزەگە اسىرىلدى.
ايتا كەتۋ كەرەك، "مەرەيلى وتباسى" ۇلتتىق كونكۋرسىن وتكىزۋگە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ 2013 جىلى وتباسىلىق قۇندىلىقتاردى دارىپتەۋ جانە وتباسى ينستيتۋتىنىڭ مارتەبەسىن ارتتىرۋ ماقساتىندا باستاماشىلىق جاساعان بولاتىن.
جىلدان جىلعا ونىڭ قاتىسۋشىلارىنىڭ سانى ارتىپ كەلەدى.
ماسەلەن، 2018 جىلى بايقاۋ كوميسسياسىنىڭ قاراۋىنا 51 ەلوردالىق وتباسى ءوتىنىم بەرسە، 2019 جىلى 60-تان استام ءوتىنىم تۇسكەن.
بيىل "مەرەيلى وتباسى-2021" بايقاۋىنا قاتىسقىسى كەلگەن وتباسىلار سانى 120-عا جەتتى. ولاردىڭ قاتارىندا كوپبالالى وتباسىلار، ەڭبەك اۋلەتتەرى، كاسىپكەرلەر جانە ت.ب. بار.
وسىلايشا، كوميسسيا شەشىمىمەن كوپبالالى شىعارماشىلىق وتباسى ساماربايەۆتار ۇلتتىق بايقاۋدىڭ قالالىق كەزەڭىنىڭ جەڭىمپازى بولىپ تانىلدى. سۇڭعات پەن الما 4 قىز بەن ۇل تاربيەلەپ وتىر. وتباسىنىڭ بارلىق مۇشەسى سپورتتى جاقسى كورەدى، سالاۋاتتى ءومىر سالتىن ۇستانادى.
وتاعاسى – ينجەنەر مامانى، 4 ءتىلدى مەڭگەرگەن. زايىبى الما – جۋرناليستيكا سالاسىنداعى PhD دوكتورى، اعا وقىتۋشى، جاقىندا عانا وتباسىلىق قۇندىلىقتار تۋرالى «باقىتتى كەلىنشەك» كىتابى جارىق كورگەن. وتباسى كونكۋرستىڭ رەسپۋبليكالىق كەزەڭىنە قاتىسۋعا دايىندالۋدا.
ەكىنشى ورىندى پەداگوگ نوسييەۆتەر اۋلەتى مەن ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ ماماندارى – بەكەنوۆتار وتباسى ءوزارا ءبولىستى.
"مەرەيلى وتباسى-2021" كونكۋرسىنىڭ قولا جۇلدەسىن وماروۆتار وتباسى مەن التى بالا تاربيەلەپ وتىرعان، كاسىپكەرلەردەن قۇرالعان وشاقبايەۆ وتباسى جەڭىپ الدى.
جەڭىمپازدارعا ديپلومداردى ق ر پرەزيدەنتىنىڭ كەڭەسشىسى، ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسافت جونىندەگى ۇلتتىق كوميسسيا ءتوراعاسىنىڭ ورىنباسارى مارجان اكىمجانوۆا مەن ەلوردا اكىمىنىڭ ورىنباسارى اسحات ورالوۆ تابىس ەتتى.
اسحات ورالوۆ قالا اكىمىنىڭ اتىنان قالالىق بايقاۋعا قاتىسقانى ءۇشىن العىس ءبىلدىردى. كوميسسيانىڭ شەشىمى بويىنشا ۇزدىك وتباسىلار اقشالاي سىيلىقتارمەن جانە ەلوردا اكىمىنىڭ العىس حاتتارىمەن ماراپاتتالدى.
ۇلتتىق كونكۋرستىڭ جەڭىمپازدارىن ەلوردانىڭ تانىمال ارتىستەرى مەن شىعارماشىلىق ۇجىمدارى قۇتتىقتادى.
ايتا كەتەيىك، نۇر-سۇلتاندا وتباسى ينستيتۋتىنا ەرەكشە كوڭىل بولىنەدى، وتباسىلارعا جان-جاقتى قولداۋ كورسەتىلەدى.
وسىلايشا، ەكى جىل بۇرىن ەلوردادا "جانۇيا" وتباسى ينستيتۋتىن قولداۋ ورتالىعى اشىلدى، وندا "ءبىر تەرەزە" قاعيداتى بويىنشا قالا تۇرعىندارى ءتۇرلى مامانداردان، زاڭگەرلەردەن باستاپ پسيحولوگتارعا دەيىن كەڭەس الا الادى، الەۋمەتتىك قولداۋ، تۇرعىن ءۇي، جۇمىس جانە ت.ب. الۋ سۇراقتارىمەن جۇگىنە الادى.
مۇندا وتباسىلار ءۇشىن ءتۇرلى باعىتتار بويىنشا ءىس-شارالار وتكىزىلەدى، ونىڭ ىشىندە پسيحولوگيالىق جانە موتيۆاسيالىق ترەنينگتەر، جۇمىسقا ورنالاستىرۋ جانە كامەلەتكە تولماعانداردىڭ قۇقىعىن قورعاۋ بويىنشا ءتۇسىندىرۋ جۇمىستارى، بيزنەس جۇرگىزۋ بويىنشا ماستەر-كلاستار جانە ت.ب.
سونداي-اق، كوپبالالى وتباسىلاردىڭ ءار بالاسىنا مەملەكەت الەۋمەتتىك كومەك بولەدى. وقۋ جىلىنا دايىندىق بارىسىندا قالادا جالپىعا مىندەتتى وقۋ باعدارلاماسى جانە «مەكتەپكە جول» قايىرىمدىلىق اكسياسى وتكىزىلەدى. كومەككە مۇقتاج وقۋشىلارعا مەكتەپكە قاجەت كەرەك-جاراقتارى، ريۋكزاكتار، مەكتەپ كيىمدەرى جانە ت.ب. بەرىلەدى.
سونىمەن قاتار، كوپبالالى جانە حالىقتىڭ الەۋمەتتىك وسال توپتارىنا جاتاتىن وتباسىلار ەلوردادا جالعا بەرىلەتىن تۇرعىن ءۇي الۋ ءۇشىن كەزەككە تۇرا الادى.
بۇدان باسقا، كوپبالالى، تولىق ەمەس جانە مۇمكىندىگى شەكتەۋلى بالالاردى تاربيەلەپ وتىرعان وتباسىلار ءۇشىن "باقىتتى وتباسى" تۇرعىن ءۇي باعدارلاماسى جۇمىس ىستەيدى، وعان قاتىسۋشىلار تۇرعىن ءۇي ساتىپ الۋعا بۇرىن-سوڭدى بولماعان تومەن مولشەرلەمە بويىنشا قارىز الا الادى.
