پارتيا ءتوراعاسىنىڭ ءبىرىنشى ورىنباسارى باۋىرجان قىدىرعال ۇلى ءوز پاراقشاسىندا الداعى مىندەتتەر تۋرالى باياندادى. «پارتيامىزدىڭ دەپۋتاتتىق كورپۋسى العاشقى كۇننەن باستاپ سايلاۋالدى ۋادەلەردى ىسكە اسىرۋعا كىرىستى. ءبىزدىڭ سايلاۋالدى باسىمدىقتارىمىز «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا حالىقپەن، ونىڭ ىشىندە شالعاي ەلدى مەكەندەر تۇرعىندارىمەن جان-جاقتى تالقىلاۋ قورىتىندىسى بويىنشا قالىپتاستىرىلدى. تەك پرايمەريز بارىسىندا عانا ءبىز ازاماتتاردان 20 مىڭنان استام ۇسىنىس جينادىق. بۇدان بولەك ۇگىت-ناسيحات كەزدەسۋلەرى كەزەڭىندە تاعى 42 مىڭنان اسا امانات ءتۇستى. ولاردىڭ 65%-تەن استامى ايماقتىق باعدارلامالاردى بەكىتۋ كەزىندە ەسكەرىلدى. ەلباسى، پارتيا ليدەرى نۇرسۇلتان نازاربايەۆ ايتقانداي، «Nur Otan» دەپۋتاتتارى ءاربىر وڭىردە، قالا مەن اۋداندا بارلىق سايلاۋالدى مىندەتتەمەلەردىڭ ورىندالۋىنا جۇيەلى باقىلاۋدى قامتاماسىز ەتۋى ءتيىس»، – دەدى ب.قىدىرعالي ۇلى.
تۇركىستان وبلىسى بويىنشا دا 17 سايلاۋلدى باعدارلاما ازىرلەندى. ءاربىر اۋدان، قالانىڭ ءوز جوسپارى بەكىتىلدى. جول كارتاسى ازىرلەنىپ، دەپۋتاتتارىمىزبەن ءتيىستى جۇمىستار جۇرگىزىلدى. ءبىز ءاربىر اۋدان، قالانىڭ وزەكتى پروبلەمالارىن ساراپتاپ، ونى باعدارلاماعا ەنگىزدىك. ۇگىت-ناسيحات كەزەڭىندە تۇركىستان وبلىسىنىڭ سايلاۋالدى شتابتارىنىڭ قوعامدىق قابىلداۋ بولمەلەرىنە تۇرعىنداردان 2256 ۇسىنىس پەن امانات كەلىپ ءتۇستى. ونىڭ 21 پايىزى الەۋمەتتىك قولداۋ، 14،5 پايىزى تۇرعىن ۇي-كوممۋنالدىق شارۋاشىلىققا قاتىستى. سونىمەن بىرگە ۇسىنىس-تىلەكتەردىڭ 14 پايىزى تۇرعىن ءۇي جانە جەر ماسەلەسىن كوتەرسە، جۇمىسپەن قامتۋ ماسەلەسى بويىنشا دا اماناتتار كەلىپ ءتۇستى. ۇسىنىستار مەن اماناتتار پارتيالىق باقىلاۋعا الىندى. ونىڭ ءبىرازى سايلاۋالدى باعدارلاماعا ەنگىزىلگەن.
ەندى ءبىز وسى باعدارلامالاردى جۇزەگە اسىرۋ بويىنشا ناقتى ىستەردى قولعا الامىز. بۇگىندە تۇركىستان وبلىستىق ءماسليحاتىندا «Nur Otan» پارتياسىنىڭ 37 وكىلى بار. ءبىزدىڭ فراكسيا باسىم داۋىسقا يە ءارى وسى سەنىمنىڭ قۇنى جوعارى ەكەنىن تەرەڭ تۇسىنەدى. جالپى وبلىستىق، اۋداندىق جانە قالالىق ءماسليحاتتاردى قوسقاندا وبلىسىمىزدا «Nur Otan» پارتياسى 320 مانداتتىڭ 80 پايىزىن، ياعني 263 ورىندى يەلەندى. تۇركىستان وبلىستىق ءماسليحاتىنداعى «Nur Otan» پارتياسى فراكسياسىنىڭ قۇرامى 60%-كە جاڭاردى.
ەل پرەزيدەنتى قاسىم-جومارت توقايەۆ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن تانىستىرعاندا بىزگە ناقتى مىندەتتەر جۇكتەدى. باعدارلامانى ورىنداۋ – نازارىمىزدا. الداعى 5 جىلدا تۇركىستان وبلىسىن 7 باعىت بويىنشا دامىتۋدى جوسپارلاپ وتىرمىز.
ولار:
- ەكونوميكالىق تۇراقتى ايماق؛
- جايلى ايماق؛
- الەۋمەتتىك باعدارلانعان ايماق؛
- جاستارعا ارنالعان ايماق؛
- مادەنيەتى مەن تاريحى باي ايماق؛
- اشىق جانە ەسەپ بەرەتىن جەرگىلىكتى ورگاندار؛
- ءقاۋىپسىز ايماق.
وڭىردە ءتۋريزمدى دامىتۋ ارقىلى تۋريستەر سانىن 1،5 ەسەگە كوبەيتۋ، ياعني، 2 ميلليونعا جەتكىزۋ جوسپارلانعان. ول ءۇشىن تۇركىستان قالاسى مەن وڭىردەگى وزگە دە تۋريستىك نىساندارعا قولداۋ كۇشەيەدى. «Nur Otan» پارتياسى 2025 جىلعا دەيىن 124،9 مىڭ جاڭا جۇمىس ورنىن (جىلىنا ورتا ەسەپپەن 24،9 مىڭ) اشۋ مىندەتىن قويادى، ونىڭ ىشىندە 67،5 مىڭ تۇراقتى. ناتيجەسىندە وبلىس بويىنشا ورتاشا جالاقىنى 149،4 مىڭ تەڭگەگە دەيىن ارتتىرۋ جوسپارلانۋدا. كاسىپكەرلىك پەن اۋىل شارۋاشىلىعىن دامىتۋ باعىتىندا دا جۇيەلى جوسپارلار بار. ءوڭىر جۇرتشىلىعىن ساپالى جول مەن تازا اۋىز سۋمەن، «كوگىلدىر وتىنمەن» قامتۋ ماسەلەسى دە باستى نازارىمىزدا بولادى. نۇروتاندىقتار وزدەرىنە جۇكتەلگەن جاۋاپكەرشىلىكتى بىلەدى جانە وسى باعىتتا جۇمىس جۇرگىزەدى. ءاربىر دەپۋتاتقا ءتيىستى تاپسىرما بەرىلىپ، جۇمىس جوسپارى تۇسىندىرىلگەن. حالىق قالاۋلىلارى جەرگىلىكتى اتقارۋشى بيلىكپەن بىرگە ەل سەنىمىن اقتاۋعا بار كۇشىن سالادى.
بەيسەن تاجىبايەۆ، «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى، وبلىستىق ءماسليحاتتاعى فراكسيا جەتەكشىسى.
