كەڭەس ءتوراعاسى جۇلدىز سۇلەيمەنوۆانىڭ ايتۋىنشا، «Nur Otan» پارتياسىنىڭ ءبىلىم بەرۋ سالاسىنداعى سايلاۋالدى ۋادەلەرىن ورىنداۋ، ەڭ الدىمەن ۇلتتىق جوبادا cايلاۋالدى باعدارلاما تارماقتارىنىڭ ساپالى كورىنىس تابۋىنا تىكەلەي بايلانىستى.
وسى ورايدا ءبىلىم جانە عىلىم ۆيسە-مينيسترى شولپان كارينوۆا قۇجاتتىڭ جوباسىندا «Nur Otan» پارتياسى سايلاۋالدى باعدارلاماسىنىڭ 11 تارماعى ەنگىزىلگەنىن العا تارتتى. بۇدان باسقا «BILIMDI ŪLT» ۇلتتىق جوباسىنا ءبىلىم بەرۋ سالاسىنا قاتىستى تاعى 30 تارماقتى ەنگىزۋ كوزدەلىپ وتىر. ال سايلاۋالدى باعدارلامانىڭ عىلىمدى دامىتۋعا قاتىستى باسقا باعىتتارىن عىلىم جونىندەگى ۇلتتىق جوباعا قوسۋ جوسپارلانىپ وتىر.
سونداي-اق، ۆيسە-مينيستر 2021-2025 جىلدارعا ارنالعان ۇلتتىق جوبانىڭ 4 باعىتى، 5 مىندەتى، 15 ناتيجەلى كورسەتكىشىنە توقتالدى. ونىڭ ايتۋىنشا، بۇگىندە 2-6 جاس ارالىعىنداعى بالالاردى مەكتەپكە دەيىنگى تاربيەمەن قامتاماسىز ەتۋ تومەن (77%) دەڭگەيدە.
سوندىقتان جوبادا مەكتەپكە دەيىنگى تاربيە مەن وقىتۋدىڭ قولجەتىمدىلىگىن قامتاماسىز ەتۋ دەڭگەيىن «Nur Otan» پلاتفورماسىندا كوزدەلگەندەي 95 پايىزعا جەتكىزۋ قاراستىرىلعان.
كەڭەس ءتوراعاسى جۇلدىز سۇلەيمەنوۆا ۆەدومستۆو وكىلىنە ورتا ءبىلىم بەرۋ جۇيەسىندەگى ءبىلىمنىڭ ساپاسىنا، اۋىل مەكتەپتەرىندەگى ينفراقۇرىلىمدى دامىتۋعا، اۋىل مەن قالا مەكتەپتەرىنىڭ اراسىنداعى الشاقتىقتى مەيلىنشە ازايتۋعا قاتىستى ءبىرقاتار سۇراقتار قويدى.
وقۋشىلاردىڭ ءبىلىم جەتىستىكتەرىن باعالاۋ جونىندەگى حالىقارالىق باعدارلاما (PISA) زەرتتەۋلەرىنىڭ قورىتىندىلارى بۇگىندە قازاقستاندا تەك قالا مەن اۋىل وقۋشىلارىنىڭ اراسىنداعى ءبىلىم ساپاسىنىڭ ايىرماشىلىقتارىن عانا ەمەس، سونىمەن قاتار ءوڭىرارالىق تا ارتتا قالۋشىلىق بار ەكەنىن كورسەتكەن.
مىسالى، قىزىلوردا، ماڭعىستاۋ، اقتوبە وبلىستارىندا قالا مەكتەپتەرىنىڭ كورسەتكىشتەرى پاۆلودار، قوستاناي، سولتۇستىك جانە شىعىس قازاقستان وبلىستارىنداعى اۋىل مەكتەپتەرىنەن تومەن. ال پاۆلودار، قوستاناي مەن شىعىس قازاقستان وبلىستارىندا قالالىق جانە اۋىلدىق مەكتەپتەر اراسىنداعى بىلىمدە الشاقتىق كورىنىپ وتىر.
– سوندىقتان ءوڭىرارالىق جانە اۋىل مەن قالا مەكتەپتەرىندەگى ءبىلىم ساپاسىنداعى الشاقتىقتى ازايتۋ – جوباداعى نەگىزگى ماقساتتاردىڭ ءبىرى. سونداي-اق، مەكتەپتەردى جايلى جانە ءقاۋىپسىز ەتۋ، زاماناۋي ءبىلىم بەرۋ ورتاسىمەن قامتاماسىز ەتۋدە ينفراقۇرىلىمدىق ماسەلەلەر ءالى دە وزەكتى بولىپ وتىر. سوڭعى 5 جىلدا 471 مەكتەپ سالىنىپ، پايدالانۋعا بەرىلدى. ءبىراق بۇل جەتكىلىكسىز. ورىن تاپشىلىعى الداعى ۋاقىتتا 256 مىڭعا دەيىن جەتەدى دەپ بولجانىپ وتىر. ەلىمىزدە مەكتەپتەردىڭ 137ء-سى ءۇشاۋىسىمدا، 5095ء-ى ەكىاۋىسىمدا جۇمىس ىستەيدى. اپاتتى جاعدايداعى 34 مەكتەپ بار. 248 ءبىلىم وشاعى ساماننان سالىنعان. وسى ماسەلەلەردى شەشۋ ءۇشىن «Nur Otan» پارتياسىنىڭ سايلاۋالدى باعدارلاماسىنا سايكەس الداعى 5 جىلدا 800 مەكتەپ سالۋ جوسپارلانعان. بۇل ماسەلە ۇنەمى ۇكىمەت پەن پارتيانىڭ باقىلاۋىندا، – دەدى ش.كارينوۆا.
وسى كۇنگە دەيىن 86 جوو-دا پەداگوگ ماماندار دايارلانىپ كەلسە، ەندىگى جەردە پەداگوگتاردى ساپاسىز دايىندايتىن ۋنيۆەرسيتەتتەردىڭ ليسەنزياسى قايتارىپ الىنادى. بازالىق پەداگوگيكالىق جوو-ى بەلگىلەنىپ، سولارعا عانا ءتيىستى مەملەكەتتىك تاپسىرىس بەرىلەدى.
ساپالى پەداگوگ مامانداردى دايارلاۋ ماقساتىندا قولعا الىنعان تاعى ءبىر شارا رەتىندە ۆيسە-مينيستر پەداگوگيكالىق ماماندىقتارعا ءبىلىم دەڭگەيى جوعارى مەكتەپ بىتىرۋشىلەر عانا قابىلداناتىندىعىن اتادى.
پەداگوگيكالىق ماماندىقتارعا ءتۇسۋ ءۇشىن شەكتى بالل بىلتىر 70 بولسا، بيىل ول 75 بالعا دەيىن كوتەرىلگەن. ەندى وسى 75 باللمەن تۇسكەن جاستار پەداگوگيكا ماماندىعىندا بۇرىنعىدان باسقا، جوعارلاتىلعان تالاپ بويىنشا دايىندالعان باعدارلامامەن وقيدى. مۇندا ساپالى ابيتۋرەنت، ساپالى ستۋدەنت، كەيىن ساپالى پەداگوگ بولىپ شىعادى دەگەن لوگيكا جاسالىپ وتىر.
جيىن بارىسىندا الەمنىڭ جەتەكشى عىلىمي ورتالىقتارىنا 500-دەن كەم ەمەس قازاقستاندىق عالىمدى تاعىلىمدامادان وتۋگە جىبەرۋ ماسەلەسى دە ورتاعا سالىندى. مۇندا قارجىلىق جانە جالپى جۇمىستىڭ مازمۇنىنا بايلانىستى ماسەلەلەر بار.
ۆيسە-مينيستر كەلتىرگەن مالىمەتتەرگە سۇيەنسەك، قازىرگى تاڭدا «بولاشاق» باعدارلاماسى شەڭبەرىندە «عالىمدار» ساناتى بويىنشا تاعىلىمدامادان ءوتۋ ءۇشىن ءبىرىنشى كونكۋرستىق ىرىكتەۋگە بارلىعى 8 ۇمىتكەر قاتىسىپ، 7 ادامعا ستيپەنديا تاعايىندالعان. ەكىنشى تاعايىنداۋعا 50 ۇمىتكەردەن قۇجات قابىلدانعان.
حالىقارالىق باعدارلامالار ورتالىعىنىڭ پرەزيدەنتى اينۇر كارىبوزوۆانىڭ ايتۋىنشا، شەت ەلدە تاعىلىمدامادان ءوتىپ كەلگەن ازاماتتاردىڭ جۇمىس ورنى ساقتالادى جانە ولار كەلىسىمشارتپەن بەكىتىلگەن مەرزىمدە ەلگە ورالىپ، تاعىلىمداما شەڭبەرىندە العان ماماندىعى بويىنشا ءوز جۇمىس بەرۋشىسىندە 3 جىل ەڭبەك ءوتىلىن قامتاماسىز ەتۋى ءتيىس.
جيىن سوڭىنا تامان Nur Otan پارتياسىنىڭ سايلاۋالدى باعدارلاماسى جول كارتاسىنىڭ ءبىلىم جانە عىلىم سالاسىن دامىتۋعا ارنالعان تارماقتارىنىڭ ورىندالۋ بارىسى تۋرالى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆتىڭ ەسەبى تىڭدالىپ، ايماق اكىمدىگىنە ءبىرقاتار ۇسىنىمدار بەرىلدى.
اتاپ ايتقاندا، ءبىلىم بەرۋ نىساندارىنىڭ قۇرىلىسى، 1000 مەكتەپتى جاڭعىرتۋ، مەكتەپتەردى 100% بىلىكتى كادرلارمەن، جوعارى جىلدامدىقتاعى ينتەرنەت جەلىسىمەن قامتاماسىز ەتۋ جانە قالا مەن اۋىل مەكتەپتەرى اراسىنداعى الشاقتىقتى ازايتۋ ماسەلەلەرىنىڭ ساپالى ورىندالۋىن قامتاماسىز ەتۋ ۇسىنىلدى.
جيىن قورىتىندىسى بويىنشا ءبىلىم جانە عىلىم مينيسترلىگىنە پارتيانىڭ سايلاۋالدى باعدارلاماسى رەسپۋبليكالىق جول كارتاسىنىڭ بارلىق تارماقتارىن «BILIMDI ŪLT» ۇلتتىق جوباسىنا قوسۋ ماسەلەسىن قاراۋ، سونداي-اق، مەكتەپتەردى سالۋ مەن جاڭعىرتۋدى، 2021 جىلعا ارنالعان ينديكاتورلارعا سايكەس پاندىك كابينەتتەردى قامتاماسىز ەتۋدى قارجىلاندىرۋ بويىنشا جەرگىلىكتى اتقارۋشى ورگاندارمەن جۇمىستى كۇشەيتۋ ۇسىنىلدى.
