جيىن بارىسىندا ق ر سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسەت تۇرىسوۆ جول كارتاسىندا 2021 جىلعا كوزدەلگەن نەگىزگى 4 كورسەتكىش بويىنشا بارلىق ءىس-شارانىڭ جۇزەگە اسقانىن العا تارتتى. ءتىپتى، كەيبىر ينديكاتورلار اسىرا ورىندالعان.
«قازىرگى تاڭدا مەملەكەتتىك قىزمەتتەردىڭ 92%-ى ەلەكتروندى تۇردە كورسەتىلدى. ازاماتتاردىڭ ەلەكتروندىق قىزمەتتەردى ءوز بەتىنشە الۋ كورسەتكىشى 2018 جىلعى 31 ميلليوننان 2021 جىلى 63 ميلليونعا دەيىن ءوستى. حقكو، egov، egov mobile جانە بانكتەردىڭ قوسىمشالارى ارقىلى دا مەملەكەتتىك قىزمەتتەر كورسەتۋ ارنالارىن ۇلعايتۋ جۇمىسى جۇرگىزىلۋدە. ازاماتتاردىڭ بارلىق مەملەكەتتىك قىزمەتتەردى ءبىر تەرەزەدەن الۋ مۇمكىندىگىن قامتاماسىز ەتۋ وسى جىلى 92%-عا، حقكو-ىن ازاماتتارعا ونلاين-كەڭەس بەرۋگە قايتا باعدارلاۋ 20%-عا ورىنداۋ كوزدەلسە، بۇل جوسپار سايكەسىنشە 96 جانە 22%-عا ارتىعىمەن ورىندالدى»، - دەدى ۆيسە-مينيستر.
ونىڭ ايتۋىنشا، ازاماتتارعا مەملەكەتتىك ورگاندارعا ءوز وتىنىشتەرىن ەلەكتروندى تۇردە جولداۋعا مۇمكىندىك بەرەتىن «e-Otinish» اقپاراتتىق جۇيەسى قازىرگى تاڭدا بارلىق مەملەكەتتىك ورگانداردا ەنگىزىلىپ، تاجىريبەدەن وتكىزىلۋدە. سونىمەن قاتار، الەۋمەتتىك سالادا تولەمدەردىڭ 14 ءتۇرى پرواكتيۆتى فورماتتا ىسكە اسىرىلدى. ماسەلەن، تۋۋدى تىركەۋ بويىنشا قىزمەت 3 جىلدان بەرى پرواكتيۆتى تۇردە كورسەتىلەدى. ياعني، ازاماتتار ۇيدەن شىقپاي-اق SMS حابارلاما ارقىلى تۋۋ تۋرالى كۋالىكتى راسىمدەي الادى. جىل سوڭىنا دەيىن جەرلەۋگە ارنالعان ءبىرجولعى تولەمدى دە پرواكتيۆتى تاعايىنداۋدى ىسكە اسىرۋ كوزدەلىپ وتىر.
سالاداعى جاڭالىقتاردىڭ ءبىرى – «ەgov mobile» موبيلدىك قوسىمشاسىنداعى «سيفرلىق قۇجاتتار» قىزمەتى. بۇل قىزمەت ازاماتتارعا قاعاز جۇزىندەگى بالاماسىنىڭ ورنىنا ساندىق قۇجاتتاردى ۇسىنۋعا مۇمكىندىك بەرەدى. بۇگىندە سيفرلىق قۇجاتتاردى پايدالانۋشىلار سانى – 5 985 431.
كەڭەس مۇشەسى مايرا ايسينا جىل سايىن 20 ميلليونعا دەيىن قىزمەت كورسەتەتىن اتالعان سالا حالىقتىڭ تالقىسى مەن سىنىنا ەڭ كوپ ۇشىرايتىنىن العا تارتتى. ول ماسەلەسىن شەشۋ ءۇشىن تۇرعىنداردىڭ ءالى دە تالاي مەكەمەنىڭ تابالدىرىعىن توزدىرىپ، ۇزىنسونار كەزەكتە تۇراتىنىن، مۇنىڭ سوڭى ءتۇرلى جانجالعا ۇلاسىپ جاتاتىنىن جاسىرمادى.
«بۇل پروبلەمانى شەشۋ سيفرلىق دامۋ مينيسترلىگىنىڭ قۇزىرىنا كىرەتىن قىزمەت كورسەتۋ سالاسىن عانا تۇراقتى دامىتۋمەن شەكتەلمەگەنى ءجون. ەڭ باستىسى، قىزمەتتەردى ەلەكتروندى تۇردە ۇسىنۋعا قاتىستى بارلىق مەملەكەتتىك ورگانداردىڭ قارىم-قاتىناسىن وزگەرتۋ قاجەت. ويتكەنى ولاردىڭ اقپاراتتىق جۇيەلەرىنىڭ تيىمدىلىگى كوڭىل كونشىتپەيدى. بۇگىندە مەملەكەتتىك سەكتوردا 400 اقپاراتتىق جۇيە جۇمىس ىستەيدى. ءارقايسىنىڭ دەرەك بازاسى ۇلكەن. ءبىراق ساپاسى وتە تومەن. دەرەكتەردى قولمەن ەنگىزۋگە بايلانىستى كوپتەگەن قاتە جىبەرىلگەن جانە جۇيەلەردىڭ كوپشىلىگى سول دەرەكتەردى قايتالايدى. سوندىقتان بۇل جەردە ءبىرتۇتاس قۇرىلىمدىق ءتاسىل قاجەت. ارينە، بۇگىندە ول بار، ءبىراق مەملەكەتتىك ورگاندار تاراپىنان مۇددەلىلىك جوق»، - دەدى م.ايسينا.
كەڭەستە قىزمەت كورسەتۋدىڭ بەلگىلەنگەن مەرزىمىن ساقتاماۋ، مەرزىمىن وتكىزىپ الۋ، ودان باس تارتۋ سياقتى كوپتەگەن كەمشىلىكتەر دە مەملەكەتتىك ورگانداردىڭ كىناسىنەن ورىن الاتىنى ايتىلدى. ماسەلەن، وتكەن جىلى بەس مەملەكەتتىك ورگان: ىشكى ىستەر، ەڭبەك، ءبىلىم، يندۋستريا مينيسترلىكتەرى مەن جەرگىلىكتى اتقارۋشى ورگانداردىڭ قىزمەت كورسەتۋ مەرزىمىن وتكىزىپ الۋ كورسەتكىشى 99،2%-دى قۇراعان. ال قىزمەت كورسەتۋدىڭ بەلگىلەنگەن مەرزىمىن ساقتاماۋ كوبىنە-كوپ تەحنيكالىق اقاۋعا بايلانىستى ورىن السا، وتكەن جىلى 9 مەملەكەتتىك ورگاننىڭ اقپاراتتىق جۇيەسىندە 243 ساعاتقا ىركىلىس بولعان. قىزمەت كورسەتۋدەن باس تارتۋ كورسەتكىشى دە 90%-دان اسادى.
وسى ورايدا، پارتيالىقتار اقپاراتتىق جۇيەلەر ارقىلى مەملەكەتتىك قىزمەتتى بارلىق مەملەكەتتىك ورگان كورسەتكەنىمەن، ولاردىڭ ەشقايىسى دەرەكتەردىڭ وزەكتىلىگى، ىركىلىستەر، قاتەلەر ءۇشىن جاۋاپكەرشىلىك المايتىنىنا نازار اۋداردى. ياعني، اقپاراتتىق جۇيەلەردە ساپاسىز قىزمەت كورسەتكەنى ءۇشىن مەملەكەتتىك ورگانداردىڭ جاۋاپكەرشىلىگى ناقتى بەكىتىلمەگەن. ال سول كەزدە، اقپاراتتىق جۇيەلەردىڭ جۇمىسىنا، ونى جەتىلدىرۋگە قازىنادان ميللياردتاعان قاراجات بولىنەدى.
«سوندىقتان ورتالىق جانە جەرگىلىكتى اتقارۋشى ورگانداردىڭ جاۋاپكەرشىلىگىن زاڭنامالىق تۇرعىدا ارتتىرۋ قاجەت. سيفرلىق دامۋ مينيسترلىگىنە بارلىق قىزمەت كورسەتۋشىلەردىڭ اقپاراتتىق جۇيەلەرىنىڭ جۇمىس قابىلەتىن باقىلاۋ فۋنكسياسىن بەرگەن ءجون»، - دەدى م.ايسينا.
كەڭەس ءتوراعاسى، ءماجىلىس دەپۋتاتى ايدوس سارىم «ازاماتتارعا ارنالعان ۇكىمەت» مك قىزمەتكەرلەرى جالاقىسىنىڭ تومەندىگى، ولاردىڭ ءتۇرلى الەۋمەتتىك باعدارلامالاردىڭ يگىلىگىن كورە الماي وتىرعانىن العا تارتىپ، ۆيسە-مينيستردەن وسى باعىتتا ۆەدومستۆانىڭ قولعا العان ىستەرى تۋرالى سۇرادى. سيفرلىق دامۋ ۆيسە-مينيسترى اسەت تۇرىسوۆ مينيسترلىك قىزمەتكەرلەردى ىنتالاندىرۋ ءۇشىن جۇمىسىن جاقسى اتقارعانداردى قارجىلاي كوتەرمەلەۋ شارالارىن جوسپارلاپ وتىرعانىن جەتكىزدى.
«ماتريسا.كz» مەديا-توبىنىڭ جەتەكشىسى سەرىك مامبەتوۆ ەلەكتروندى قىزمەتتەر تۋرالى جۇرتشىلىقتى كەڭىنەن حاباردار ەتۋ تۋرالى ۇسىنىسىن ايتتى. سەبەبى، كوپتەگەن مەملەكەتتىك قىزمەتتەردى ەلەكتروندى تۇردە الۋعا بولاتىنىن ەكىنىڭ ءبىرى بىلە بەرمەيدى.
جيىن سوڭىندا سالا قىزمەتكەرلەرىن الەۋمەتتىك قامسىزداندىرۋ، كادر تاپشىلىعى ماسەلەسىن شەشۋ، مەملەكەتتىك ورگانداردىڭ جاۋاپكەرشىلىگىن ارتتىرۋ جانە جوعارى ستاندارتتارعا ساي قىزمەت كورسەتۋ باعىتتارىندا سيفرلىق دامۋ مينيسترلىگىنە ءوز ۇسىنىستارىڭ جولداۋ ۇسىنىلدى.
