بۇگىن ماڭعىستاۋ وبلىسى اكىمى نۇرلان نوعايەۆتىڭ توراعالىعىمەن وتكەن اپپارتتىق جيىندا وڭىردەگى قۇرىلىس ماسەلەلەرى مەن سول سالاداعى جوبالاردىڭ ىسكە اسىرىلۋى تالقىلاندى، – دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

جيىن بارىسىندا وبلىستىق قۇرىلىس، ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى اينۇر مانكەشوۆا وڭىردە جۇزەگە اسىرىلىپ جاتقان الەۋمەتتىك قۇرىلىس نىساندارى تۋرالى اقپارات بەردى.

2022 جىلدىڭ ءبىرىنشى توقسانىنىڭ قورىتىندىسى بويىنشا وبلىستا 247،7 مىڭ شارشى مەتر باسپانا پايدالانۋعا بەرىلدى. بيىلعى جىلدىڭ سوڭىنا دەيىن 1 ميلليون 50 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانۋدا. ونىڭ ىشىندە 3،9 مىڭ ش.م. جالعا بەرىلەتىن 72 پاتەرلىك تۇرعىن ءۇي اعىمداعى جىلدىڭ 3 توقسانىندا يەلەرىنە تابىستالادى.

ايماق باسشىسى نۇرلان نوعايەۆ سالىنىپ جاتقان نىسانداردىڭ سانىنا ەمەس، ساپاسىنا باسا نازار اۋدارۋ كەرەكتىگىن اتاپ ءوتتى.

– كورسەتكىشتەر ءۇشىن جۇمىس ىستەۋدىڭ قاجەتى جوق. ناتيجەسىن بارلىعىمىز كورىپ وتىرمىز. سالىنىپ جاتقان نىسانداردىڭ ساپاسىنا قاتىستى شاعىمدار وتە كوپ. وسى ماسەلەنى باسقارما باسشىسى، قالا، اۋدان اكىمدەرى باقىلاۋدا ۇستاۋى قاجەت، – دەدى نۇرلان نوعايەۆ.

اپپاراتتىق جيىنىندا اقتاۋ قالاسىنىڭ اكىمى نۇرداۋلەت قيلىباي قالادا سالىنىپ جاتقان قۇرىلىس نىساندارى تۋرالى باياندادى.

بۇگىنگى تاڭدا وبلىس ورتالىعىندا 116 كوپقاباتتى تۇرعىن ءۇيدىڭ قۇرىلىس-مونتاجداۋ جۇمىستارى جۇرگىزىلۋدە.

دەگەنمەن، كاسىپكەرلەردىڭ قۇرىلىس جۇمىستارىن رۇقساتسىز باستاپ كەتكەن فاكتىلەرى بار.

وتكەن جىلى قالاداعى تۇرعىن ءۇي قۇرىلىسىنا ۇلەسكەرلەردى زاڭسىز تارتۋ جانە سالىنىپ جاتقان تۇرعىن ۇيلەردى جارنامالاعانى ءۇشىن «مەگا تەحنولوگيا كومپانياسى» ج ش س (17 شاعىن اۋداندا ورنالاسقان «اقەسپە» تك)،  «كاسپيستروي» ج ش س (17 شاعىن اۋداندا ورنالاسقان «فوريۋ» تك)،  «كازسترويپرەميۋم-2007» ج ش س (20ا شاعىن اۋدانىندا ورنالاسقان «توميريس» تك) ، «قازاق مەتالل» ج ش س (17 شاعىن اۋداندا ورنالاسقان «باقىت مەكەنى» تك) مەكەمەلەرىنە بارلىعى 4 اكىمشىلىك حاتتاما تولتىرىلدى.

جيىن سوڭىندا ايماق باسشىسى جاۋاپتى تۇلعالارعا ءبىرقاتار ناقتى تاپسىرمالار جۇكتەدى.