ەرلان نىعماتۋلينگە تيەسىلى زاۋىت قازا تاپقان قىزمەتكەردىڭ وتباسىنا 10 جىلدىق جالاقىسىن بەرەتىن بولدى، - دەپ حابارلايدى Dalanews.kz.
"وكىنىشكە قاراي̆، جەرگىلىكتى جانە شەتەلدىك مامانداردىڭ كاسىبيلىگىنە قاراماستان، ءبىزدىڭ ارىپتەسىمىز، ءوز ءىسىنىڭ شەبەرى، پەش باستىعى يسماي̆لوۆ مۋزافار يمانتاي̆ۇلى ومىردەن ءوتتى. YDD Corporation مۋزافار يمانتاي̆ۇلىنىڭ قاي̆تىس بولۋىنا باي̆لانىستى ونىڭ تۋىستارى مەن جاقىندارىنا قاي̆عىرا وتىرىپ، كوڭىل اي̆تادى. بۇگىنگى تاڭدا كومپانيا جەرلەۋدى ۇي̆ىمداستىرۋ، اس وتكىزۋ جانە مازار سالۋ بوي̆ىنشا بارلىق شىعىنداردى ءوز موي̆نىنا الادى، سونداي̆-اق وتباسىنا بارلىق قاجەتتى قولداۋدى كورسەتەدى"، - دەلىنگەن كومپانيا حابارلاماسىندا.
⠀
اتاپ اي̆تقاندا، كومپانيا كەلەسىدەي كومەك كورسەتەدى:
- وتباسىن قولداۋ ءۇشىن 10 جىلدىق جالاقى مولشەرىندە ءبىرجولعى تولەم جاساي̆دى.
- وتباسىنىڭ تۇرعىن ءۇي̆ جاعداي̆ىن جاقسارتۋعا كومەك كورسەتەدى.
- قىزمەتكەر مەن ونىڭ جۇباي̆ىنىڭ بارلىق نەسيەلەرىن تولىق وتەي̆ءدى.
ايتا كەتەيىك، قاراعاندىداعى فەرروقورىتپا زاۋىتىنىڭ سەگىز جۇمىسشىسى كەنەتتەن پەشتەن شىققان جالىننىڭ سالدارىنان قاتتى كۇيىك الىپ، اۋرۋحاناعا جەتكىزىلدى. ولاردىڭ ءبىرى 22 شىلدەدە قايتىس بولدى.
دارىگەرلەر سەگىز ناۋقاستىڭ التاۋىنىڭ جاعدايىن وتە اۋىر دەپ وتىر.
"دارىگەرلەر قولدان كەلگەننىڭ ءبارىن جاساعانىمەن، قاراعاندى فەرروقورىتپا زاۋىتىندا زارداپ شەككەن جۇمىسشىنى امان الىپ قالا المادى. 1993 جىلى تۋعان، دەنەسىنىڭ 85 پايىزى كۇيىپ قالعان، وسى ۋاقىتقا دەيىن وتە اۋىر جاعدايدا بولعان ناۋقاس قايتىس بولدى. مارقۇمنىڭ جاقىن تۋىستارىنا شىن جۇرەكتەن كوڭىل ايتامىز"، - دەلىنگەن وبلىستىق دەنساۋلىق ساقتاۋ باسقارماسىنىڭ حابارلاماسىندا.
ەسكە سالايىق، 20 شىلدەدە، تاڭعى ساعات 04:10-دا YDD Corporation فەرروقورىتپا زاۋىتىندا شتاتتان تىس جاعداي بولدى. وقىستا №1 پەشتەن جالىن شىعىپ، سالدارىنان كاسىپورىننىڭ 8 قىزمەتكەرى ءتۇرلى دارەجەدەگى جاراقات الدى.
كومپانيا سەنبى كۇنى، 20 شىلدەنىڭ تاڭىندا زارداپ شەككەن بارلىق قىزمەتكەردىڭ اۋرۋحانادا جاتقانىن، ولارعا شۇعىل مەديسينالىق كومەك كورسەتىلەتىنىن ايتتى.
"كومپانيا زارداپ شەككەندەرگە بارلىق كومەك كورسەتەدى جانە اۋرۋحانانىڭ مەديسينالىق قىزمەتكەرلەرىمەن ۇنەمى بايلانىستا بولادى"، - دەپ سەندىردى YDD.
YDD Corporation فەرروقورىتپا زاۋىتى قاراعاندىدا ورنالاسقان. جىلىنا شامامەن 240 مىڭ توننا فەرروسيليسيي وندىرەدى. "YDD Corporation" ج ش س قۇرىلتايشىسى كومپانيانىڭ تەڭ يەسى ەرلان نىعماتۋلين بولدى. 2021 جىلى Forbes Kazakhstan نۇسقاسى بويىنشا قازاقستاننىڭ ەڭ ىقپالدى 50 بيزنەسمەنىنىڭ رەيتينگىنە كىردى.
