بۇگىن ق ر پارلامەنتى ماجىلىسىندە «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» دەگەن تاقىرىپتا پارلامەنتتىك تىڭداۋ ءوتىپ جاتىر.
وتىرىس بارىسىندا «رۋحاني جاڭعىرۋ» باعدارلاماسى اياسىندا ق ر پرەزيدەنتىنىڭ جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيا جۇمىس توبىنىڭ ۇسىنىستارىن تالقىلاۋدا.
پارلامەنتتىك تىڭداۋدا ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين لاتىن الىپبيىنە كوشۋ تەك قازاق تىلىنە قاتىستى ەكەنىن اتاپ ءوتتى.
«مەملەكەتتىك تىلگە قاتىستى رەفورما مەملەكەتتىڭ ءتىل ساياساتىنا قاتىستى وزگەرىستەردى قاراستىرمايدى. بۇل تۋرالى ەلباسى قىسقا ءارى ناقتى ايتقان بولاتىن. ءاليپبيدى وزگەرتۋ تەك قازاق تىلىنە قاتىستى. لاتىن اليپبيىنە كوشۋى تەك قازاق ءالىپبيى مەن ورفوگرافيا ەرەجەسىن رەفورمالاۋعا بايلانىستى. بۇل ءتىل فونەتيكاسى مەن گرافيكاسىن اراسىندا ءتيىستى بايلانىستى ورناتۋعا مۇمكىندىك بەرەدى. وسىلايشا، لاتىن ءالىپبيىن ەنگىزۋ ەلدىڭ ىشكى ماسەلەسىن شەشۋگە، مەملەكەتتىك ءتىلدى دامىتۋعا باعىتتالعان»، - دەدى ءتوراعا.
ونىڭ ايتۋىنشا، ورىس تىلىندە شىعاتىن باسىلىمدار بۇرىنعىشا كيريليسادا شىعا بەرەدى.
«ەلباسى اتاپ وتكەندەي، لاتىن ءالىپبيىن كوشۋ ورىس تىلىنەن، كيريليسادان باس تارتۋدى بىلدىرمەيدى. لاتىن الىپبيىنە كوشۋ تەك قازاق تىلىنە قاتىستى. ال ورىس تىلىندە شىعاتىن باسىلىمدار بۇرىنعىشا شىعا بەرەدى. ياعني قازاقستاننىڭ ءورىستىلدى تۇرعىندارى ءۇشىن كيريليسا قالادى»، - دەدى نۇرلان نىعماتۋلين.
پارلامەنتتىك تىڭداۋعا پرەمەر-مينيستر ورىنباسارى ەربولات دوسايەۆ، سەنات جانە ءماجىلىس دەپۋتتارى، وبلىس اكىمدەرىنىڭ ورىنباسارلارى، جوو رەكتورلارى قاتىسۋدا.
سونداي-اق، تالقىلاۋعا ءالىپبي جوباسىن ازىرلەۋشى احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ جانە ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ باسشىلارى، عىلىم جانە مادەنيەت قايراتكەرلەرى، عالىمدار مەن ساراپشىلار، قوعامدىق ۇيىمدار مەن ب ا ق وكىلدەرى شاقىرىلدى.
ايتا كەتەيىك، مەملەكەتتىك ءتىلدى جاڭعىرتۋ قاجەتتىلىگى، ونىڭ ىشىندە لاتىن گرافيكاسىنا ءوتۋ تۋرالى مەملەكەت باسشىسى نۇرسۇلتان نازاربايەۆتىڭ «قازاقستان-2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا اتاپ وتكەن.
ق ر پرەزيدەنتى ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا 2017 جىلدىڭ سوڭىنا دەيىن جاڭا گرافيكاداعى ءالىپبيىنىڭ ءبىرىڭعاي ستاندارتىن قابىلداۋدى، ال 2018 جىلى وقۋ ادەبيەتتەرىندە دايىندىقتى باستاۋ مىندەتىن قويعان بولاتىن.
پارلامەنتتىك تىڭداۋ قورىتىندىسى بويىنشا ءتيىستى ۇسىنىمدار قابىلدانادى دەپ ۇيعارىلعان.
دەرەككوز: baq.kz
