Búgin QR Parlamenti Májilisinde «Memlekettik tildiń latyn grafikasyndaǵy álipbiiniń biryńǵai standartyn engizý máseleleri týraly» degen taqyrypta parlamenttik tyńdaý ótip jatyr.
Otyrys barysynda «Rýhani jańǵyrý» baǵdarlamasy aiasynda QR Prezidentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiia jumys tobynyń usynystaryn talqylaýda.
Parlamenttik tyńdaýda QR Parlamenti Májilisiniń tóraǵasy Nurlan Nyǵmatýlin latyn álipbiine kóshý tek qazaq tiline qatysty ekenin atap ótti.
«Memlekettik tilge qatysty reforma memlekettiń til saiasatyna qatysty ózgeristerdi qarastyrmaidy. Bul týraly Elbasy qysqa ári naqty aitqan bolatyn. Álipbidi ózgertý tek qazaq tiline qatysty. Latyn álipbiine kóshýi tek qazaq álipbii men orfografiia erejesin reformalaýǵa bailanysty. Bul til fonetikasy men grafikasyn arasynda tiisti bailanysty ornatýǵa múmkindik beredi. Osylaisha, latyn álipbiin engizý eldiń ishki máselesin sheshýge, memlekettik tildi damytýǵa baǵyttalǵan», - dedi tóraǵa.
Onyń aitýynsha, orys tilinde shyǵatyn basylymdar burynǵysha kirilitsada shyǵa beredi.
«Elbasy atap ótkendei, latyn álipbiin kóshý orys tilinen, kirilitsadan bas tartýdy bildirmeidi. Latyn álipbiine kóshý tek qazaq tiline qatysty. Al orys tilinde shyǵatyn basylymdar burynǵysha shyǵa beredi. Iaǵni Qazaqstannyń orystildi turǵyndary úshin kirilitsa qalady», - dedi Nurlan Nyǵmatýlin.
Parlamenttik tyńdaýǵa Premer-ministr orynbasary Erbolat Dosaev, Senat jáne Májilis depýttary, oblys ákimderiniń orynbasarlary, JOO rektorlary qatysýda.
Sondai-aq, talqylaýǵa álipbi jobasyn ázirleýshi Ahmet Baitursynov atyndaǵy til bilimi institýtynyń jáne Sh. Shaiahmetov atyndaǵy tilderdi damytýdyń respýblikalyq úilestirý-ádistemelik ortalyǵynyń basshylary, ǵylym jáne mádeniet qairatkerleri, ǵalymdar men sarapshylar, qoǵamdyq uiymdar men BAQ ókilderi shaqyryldy.
Aita keteiik, Memlekettik tildi jańǵyrtý qajettiligi, onyń ishinde latyn grafikasyna ótý týraly Memleket basshysy Nursultan Nazarbaevtyń «Qazaqstan-2050» strategiiasy qalyptasqan memlekettiń jańa saiasi baǵyty» atty Qazaqstan halqyna joldaýynda atap ótken.
QR Prezidenti óziniń «Bolashaqqa baǵdar: rýhani jańǵyrý» baǵdarlamalyq maqalasynda 2017 jyldyń sońyna deiin jańa grafikadaǵy álipbiiniń biryńǵai standartyn qabyldaýdy, al 2018 jyly oqý ádebietterinde daiyndyqty bastaý mindetin qoiǵan bolatyn.
Parlamenttik tyńdaý qorytyndysy boiynsha tiisti usynymdar qabyldanady dep uiǵarylǵan.
Derekkóz: baq.kz
