تۇركىستان وبلىسىنىڭ اكىمى ءومىرزاق شوكەيەۆ گەرمانيا فەدەراتيۆتىك رەسپۋبليكاسىنىڭ توتەنشە جانە وكىلەتتى ەلشىسى تيلو كليننەر باستاعان گەرمان ەكونوميكا وداعىنىڭ دەلەگاتتارىمەن كەزدەستى.

كەزدەسۋدە دەلەگاسيا باسشىسى تيلو كليننەر گەرماندىق كومپانيالار سيفرلاندىرۋ، ەلەكتر قۋاتىن ءوندىرۋ، جىلىتۋ جۇيەسى مەن تۋريزم سالاسىندا ينۆەستيسيا سالۋعا نيەتتى ەكەندەرىن جەتكىزدى.

ماسەلەن، گەرمانيادا ەنەرگەتيكا سالاسىندا 15 جىلدان جۇمىس ىستەپ كەلە جاتقان «ILF Business Consult» كومپانياسىنىڭ اتقارۋشى ديرەكتورى ادرەاس لينكە تۇركىستان وڭىرىندە جاسىل ەكونوميكاعا نەگىزدەلگەن كۇن ەنەرگياسىنان قۋات وندىرەتىن گيبريتتى ەلەكتر ستانساسىنىڭ قۇرىلىسىن جۇرگىزىپ، ارنايى پارك قۇرۋعا دايىن ەكەندىگىن ايتتى.  ال «Bosch» كاسىپورىننىڭ وكىلى ۆلاديمير كولومىسىن كومپانيا جىلىتۋ جۇيەسىنە قاجەتتى قازاندىقتارمەن قامتاماسىز ەتىپ، قالانى سۋمەن قامتۋ جۇيەسىنە تولىق سۇيەمەلدەۋ جاسايتىنىن جەتكىزدى. سونداي-اق، گەرماندىق «Petroline» حولدينگىنىڭ باس ديرەكتورى اندرەاس شتۋمپف قوقىستى قايتا وڭدەۋ مەن سۋ جۇيەسىن تازارتۋعا ارنالعان  جابدىقتارمەن قامتاماسىز ەتۋگە نيەتتى ەكەندىگىن ايتتى.

وبلىس اكىمى دەلەگاسيا ولكىلدەرىنە العىسىن ءبىلدىرىپ، ەكىجاقتى ارىپتەستىك ورنايتىنىن جەتكىزدى.

– تۇركىستاندا قازىرگى تاڭدا باس جوسپار ناقتىلاندى، عاسىر جوباسى باستالدى. قۇرىلىس، سۋمەن قامتۋ، جىلىتۋ جۇيەسى مەن جول سالاسىنا ينۆەستيسيا سالۋعا بولادى. ارنايى ەكونوميكالىق ايماقتار بار، سوندا زاۋىتتارىڭىزدى سالۋعا بولادى. گەرماندىق تەحنولوگيانى الەم مويىندايدى، سوندىقتان ارىپتەستىك ورنايدى دەپ ويلايمىن. باستىسى، جوبالار ەكولوگيالىق تازا، ساپالى، باعاسى قولجەتىمدى بولۋى كەرەك، – دەدى ءومىرزاق ەستاي ۇلى.

 

 

تۇركىستان وبلىسى اكىمىنىڭ باسپا ءسوز قىزمەتى