تاۋەلسىزدىكتىڭ العاشقى جىلدارى 1990-91 جىلدارى نامىستى، جىگەرلى ەدى قازاق. ءقازىر جىگەرىنە قۇم قۇيعانداي، جاسىق. كەيدە ويلايمىن، حالىق بارىنەن جالىقتى عوي دەيمىن.
وتىرىكتەن، جاعىمپازدىقتان، پاراقورلىقتان، ءبىلىمسىز اكىم، باستىقتاردان – بارىنەن شارشادى عوي دەپ ويلايمىن.
زيالى قاۋىم دا بىر-بىرىنە مۇددەلەس ەمەس. ءبىرىن ءبىرى جاۋ كورەدى. دۇشپان سانايدى. مۇنداي پيعىلمەن قالاي ۇشپاققا جەتپەكپىز. بىلمەيمىن؟
تاۋەلسىزدىك العانىمىزعا 26 جىل تولدى. ءبىلىم سالاسىندا جىل سايىن رەفورما. مەكتەپتە نەمەرەلەرىم وقيدى. سولاردىڭ ميى اشىپ كەتتى.
ال مەن باستاۋىش سىنىپتا جاتتاعان ولەڭدى ءالى ۇمىتقان جوقپىن. قازىرگى بالالار كەشە وقىعانىن بۇگىن ۇمىتادى. نەگە؟ بىلىمدەگى جۇيە دۇرىس ەمەس. بالانىڭ ميى قوقىس جاشىگى سياقتى، وعان انانى دا، مىنانى دا قۇيىپ جاتىر، توگىپ جاتىر. بالانىڭ ءتىلىن بىلەتىن پەداگوگ جوق. سونىڭ كەسىرىنەن بالا تۇگىلى، ءبىزدىڭ ميىمىز جەتپەيتىن وقۋلىقپەن مەنىڭ نەمەرەلەرىمنىڭ باسى اشىپ ءجۇر.
11 جاسار نەمەرەمە ۇيگە مىنانداي تاپسىرما بەرىپتى: «مىنا سوزدەردىڭ ىشىنەن جەرگىلىكتى ەرەكشەلىگى بار، جالپى ەرەكشەلىگى بار سوزدەردى انىقتاڭدار» دەگەن. الگىنىڭ ەكەۋىن مەن تابا المادىم.
77 جاسىما شەيىن وبلىس-ايماقتاردى ارالاعام، جەرگىلىكتى ەرەكشەلىكتى بىلەتىن، جازۋشىمىن. عىلىمي ەرەكشەلىكتى دە بىلەمىن. ال 11 جاسار قىز بالا ءوزىنىڭ ۇيىندەگى «جەرگىلىكتى» سوزدەن باسقانى قايدان بىلەدى؟
اتىراۋداعى ءسوزدى، ماڭعىستاۋداعى، قىزىلجارداعى ەلدىڭ قالاي سويلەيتىنىن قايدان بىلەدى؟
وقۋلىققا سونى كىرگىزىپ قويعان. ونى وقۋشى تۇگىلى، ستۋدەنت تە، ءمۇعالىمنىڭ ءوزى دە تۇسىنبەيدى. وسىنداي وقۋلىق بولا ما؟! بۇل – ۇلتتى ۇيىتۋ ەمەس، ءىرىتۋ.
قازىرگى وقۋلىقتاردا ءادىسناما جوق. ءادىسناما جوق جەردە، وقۋلىق تا بولمايدى.
مۇنداي جاۋلىقتى دۇشپان دا جاسامايدى قازاققا. ساباقتاستىق، ءداستۇر دەگەن اتىمەن جوعالدى. ءبىر ءمينيستردىڭ رەفورماسىن ەكىنشىسى وزگەرتە بەرەدى.
ەكىنشىسىنىڭ جاڭالىعىن ءۇشىنشىسى الىپ تاستايدى. ءبىرىن ءبىرى مويىندامايدى. ودان ەڭ الدىمەن وقۋشى زارداپ شەگەدى. نەمەرەم قاتارلى وقۋشىلارعا جانىم اشيدى، ولار ءبىلىم مينيسترلەرىنىڭ ەكسپەريمەنتىنە اينالدى.
سول مينيسترلەردىڭ بالالارى وسى وقۋلىقپەن وقيدى دەگەنگە كۇمانىم بار.
- جازۋشى بەكسۇلتان نۇرجەكەيەۆتىڭ
"قالا مەن دالا" گازەتىنە بەرگەن سۇحباتىنان ءۇزىندى
(جالعاسى بار)
