ەسكە سالا كەتسەك، 2016 جىلى تۇڭعىش پرەزيدەنت كۇنىنە وراي ورناتىلعان تالدىقورعان قالاسىنداعى نۇرسۇلتان نازاربايەۆتىڭ ەسكەرتكىشى قاڭتار كوتەرىلىسى كەزىندە قۇلاتىلعان بولاتىن. ونسىز دا ەلىمىزدى جىلدار بويى توناپ كەلگەن بيلىككە نارازى حالىقتىڭ اشۋعا بۋلىققان ارەكەتى وسىعان الىپ كەلدى.
ەڭ سوراقىسى، ءوز ەسكەرتكىشىنىڭ بولشەك-بولشەك بولىپ قۇلاعانىن كورگەننەن ارتىق قانداي قورلىق بار؟ بيلىكتى تىزگىنىنە مىقتاپ ۇستاپ، ۋىسىنان شىعارماعان تالاي باسشى وزىنە ءبىر ەمەس، بىرنەشە ەسكەرتكىش قويعىزىپ، اقىر اياعىندا ابىرويدان جۇرداي قالعان. سونىڭ ءبىرى تۇركىمەنستاننىڭ بۇرىنعى پرەزيدەنتى ساپارمۇرات نيازوۆ، سوسىن قازاقستاننىڭ ەكس-پرەزيدەنتى نۇرسۇلتان نازاربايەۆ. ەكى ەلدىڭ قوعامىندا دا جەكە باسقا تابىنۋشىلىق، جاعىمپازدىق جايلاپ كەتتى. سول سياقتى يراك كوشباسشىسى بولعان ساددام حۋسەيننىڭ ەسكەرتكىشىن 2003 جىلى بيلىك باسىنا كەلگەندەر اقىرى قۇلاتىپ تىندى.
ال نازاربايەۆتىڭ تالدىقورعاننان كەيىنگى ەكىنشى ەسكەرتكىشىن كىم قۇلاتتى؟ شاماسى، بۇل جولى بۇل ىسكە «بۇلىكشىلەردىڭ» قاتىسى جوق.
الەۋمەتتىك جەلىدە قويمانىڭ ءبىر جەرىندە جاتقان نازاربايەۆقا ۇقسايتىن ەسكەرتكىشتىڭ سۋرەتى تارالىپ كەتتى.
ىلەسپە ماتىندە ونىڭ بۇعان دەيىن استاناداعى قورعانىس ۋنيۆەرسيتەتىندە تۇرعانى جانە كەشە تۇندە بۇزىلعانى جازىلعان.
ءتىپتى، اقپاراتتىڭ ءمان-جايىن انىقتاۋ ءۇشىن كەيبىر ارىپتەس ۋنيۆەرسيتەتكە حابارلاسىپ كورگەن. تەلەفون قوڭىراۋىنا جاۋاپ بەرگەن كەزەكشى ەسكەرتكىشتىڭ جوقتىعىن راستاسا دا، ءبىراق مۇنى كىم جانە قاشان العانىن ناقتى ايتا المادى.
ايتا كەتۋ كەرەك، ءدال وسى ەسكەرتكىش تۇڭعىش پرەزيدەنت نازاربايەۆتىڭ 80 جىلدىق مەرەيتويى قارساڭىندا قورعانىس ۋنيۆەرسيتەتىنىڭ الدىنا ورناتىلعان بولاتىن. ونىڭ اشىلۋ سالتاناتىنا قازىرگى پرەزيدەنت قاسىم-جومارت توقايەۆتىڭ ءوزى قاتىسقانى دا بەلگىلى. الايدا، بۇل جولى ەسكەرتكىش كىمنىڭ پارمەنىمەن الىندى ەكەن؟
جالپى، كەز كەلگەن ەسكەرتكىشتى بۇزۋ دا ونى ورناتقان كەزدەگىدەي ءتيىستى قۇجاتتارى بولۋى كەرەك ەمەس پە؟
نۇرسۇلتان نازاربايەۆتىڭ ەسكەرتكىشى ءبىراز قالادا بار. ونىڭ اتىنداعى كوشە ءىرى قالالاردان بولەك، اۋدان، اۋىلدا دا جەتەرلىك. ال مىناۋ تالدىقورعاننان كەيىنگى ەكىنشى ەسكەرتكىشتىڭ ورنىنان ەلەۋسىز الىنعانى بارىنە قىزىق. تاعى قاي قالاداعى ەسكەرتكىش ورنى بوساپ قالادى ەكەن، ا؟
