Eske sala ketsek, 2016 jyly Tuńǵysh prezident kúnine orai ornatylǵan Taldyqorǵan qalasyndaǵy Nursultan Nazarbaevtyń eskertkishi Qańtar kóterilisi kezinde qulatylǵan bolatyn. Onsyz da elimizdi jyldar boiy tonap kelgen bilikke narazy halyqtyń ashýǵa býlyqqan áreketi osyǵan alyp keldi.
Eń soraqysy, óz eskertkishiniń bólshek-bólshek bolyp qulaǵanyn kórgennen artyq qandai qorlyq bar? Bilikti tizginine myqtap ustap, ýysynan shyǵarmaǵan talai basshy ózine bir emes, birneshe eskertkish qoiǵyzyp, aqyr aiaǵynda abyroidan jurdai qalǵan. Sonyń biri Túrkimenstannyń burynǵy prezidenti Saparmurat Niiazov, sosyn Qazaqstannyń eks-prezidenti Nursultan Nazarbaev. Eki eldiń qoǵamynda da jeke basqa tabynýshylyq, jaǵympazdyq jailap ketti. Sol siiaqty Irak kóshbasshysy bolǵan Saddam Hýseinniń eskertkishin 2003 jyly bilik basyna kelgender aqyry qulatyp tyndy.
Al Nazarbaevtyń Taldyqorǵannan keiingi ekinshi eskertkishin kim qulatty? Shamasy, bul joly bul iske «búlikshilerdiń» qatysy joq.
Áleýmettik jelide qoimanyń bir jerinde jatqan Nazarbaevqa uqsaityn eskertkishtiń sýreti taralyp ketti.
Ilespe mátinde onyń buǵan deiin Astanadaǵy Qorǵanys ýniversitetinde turǵany jáne keshe túnde buzylǵany jazylǵan.
Tipti, aqparattyń mán-jaiyn anyqtaý úshin keibir áriptes ýniversitetke habarlasyp kórgen. Telefon qońyraýyna jaýap bergen kezekshi eskertkishtiń joqtyǵyn rastasa da, biraq muny kim jáne qashan alǵanyn naqty aita almady.
Aita ketý kerek, dál osy eskertkish tuńǵysh prezident Nazarbaevtyń 80 jyldyq mereitoiy qarsańynda Qorǵanys ýniversitetiniń aldyna ornatylǵan bolatyn. Onyń ashylý saltanatyna qazirgi prezident Qasym-Jomart Toqaevtyń ózi qatysqany da belgili. Alaida, bul joly eskertkish kimniń pármenimen alyndy eken?
Jalpy, kez kelgen eskertkishti buzý da ony ornatqan kezdegidei tiisti qujattary bolýy kerek emes pe?
Nursultan Nazarbaevtyń eskertkishi biraz qalada bar. Onyń atyndaǵy kóshe iri qalalardan bólek, aýdan, aýylda da jeterlik. Al mynaý Taldyqorǵannan keiingi ekinshi eskertkishtiń ornynan eleýsiz alynǵany bárine qyzyq. Taǵy qai qaladaǵy eskertkish orny bosap qalady eken, a?
