نازاربايەۆتىڭ "ءاميانى" ۆلاديمير كيمنىڭ ەكس پرەزيدەنتپەن بايلانىستى بيزنەس يمپەرياسى

كوركەم الدابەرگەنوۆا 01 ناۋ. 2024 16:17 3820

قازاقستانداعى ەڭ باي ادام ۆلاديمير كيمنىڭ بايلىعى 4،6 ملرد دوللارعا باعالانعان. قوعامدا كيم - نازاربايەۆتىڭ "ءاميانى" دەگەن ءسوز بار. كيمنىڭ نازاربايەۆپەن بايلانىستى قانداي كاسىبى بارى انىقتالدى، - دەپ حابارلايدى Dalanews.kz "جاس الاشقا" سىلتەپ.

ۆلاديمير كيم KAZ Minerals Ltd اكسيونەرى، پرەزيدەنتى جانە اتقارۋشى ەمەس ديرەكتورى. "قازاقمىس كورپوراسياسى" ج ش س، "Bank RBK" اق اكسيالارىنىڭ باسىم بولىگىن جانە "تاڭ" تەلەراديوكومپانياسىنىڭ اكسيالارىنىڭ ۇلەسىنە يەلىك ەتەدى. بيزنەس-سايكەستەندىرۋ نومىرلەرىنىڭ ۇلتتىق رەەسترىنىڭ مالىمەتتەرىنە سايكەس، وعان رەسمي "كسس فينانس"، DSFK، Holding DSFK، Kazakhmys Holding Limited، Trianon Limited جەكە كومپانيالارى عانا تيەسىلى.

ۆلاديمير سەرگەيەۆيچ كيم مىس بيزنەسىندەگى ەڭبەك جولىن 1995 جىلى "جەزقازعانسۆەتمەت" اق باسقارۋشى ديرەكتورى جانە باس اتقارۋشى ديرەكتورى لاۋازىمدارىنان باستادى.

2000 جىلدىڭ جەلتوقسانىندا كيم كورپوراسيانىڭ ەڭ ۇلكەن پاكەتىنىڭ (25،7%) يەگەرى اتانىپ، كومپانيانىڭ ديرەكتورلار كەڭەسىنىڭ ءتوراعاسى بولىپ سايلاندى. ونى كيم Cuprum Holding Limited كورپوراسياسى ارقىلى باسقاردى.

2005 جىلى لوندون قور بيرجاسىندا كومپانيانىڭ اكسيالارىن ورنالاستىرعاننان كەيىن "ەۋروازيالىق مىس مونوپولياسىنىڭ تۇتقاسىن كىم ۇستاپ وتىر" دەپ لوندوندىقتار ءبىزدىڭ كومپانياعا قىزىعا باستادى. بريتاندىق Global Witness ۇكىمەتتىك ەمەس ۇيىمى جۇرگىزگەن تەكسەرۋ بارىسىندا "قازاقمىس" اكسيونەرلەرى كيم مەن ەكس-پرەزيدەنت نۇرسۇلتان نازاربايەۆتىڭ تىعىز بايلانىسىن انىقتادى.

مىنە، وسىلايشا "نازاربايەۆتىڭ ءاميانى" اتانعان كيمنىڭ بيزنەسى ورگە دومالاپ، داۋلەتى جىلدان جىلعا كوبەيە بەردى. قازىرگى كۇندە ونىڭ بايلىعى مىس ساتۋدان ەسەلەپ ارتىپ وتىر.

"ليۋكس سەرۆيس KZ" جاۋاپكەرشىلىگى شەكتەۋلى سەرىكتەستىگى

استانا قالاسى بويىنشا تىركەۋ باسقارماسىنان 2022 جىلى 3 اقپاندا سوڭعى رەت تىركەۋدەن وتكەن. ءبىرىنشى باسشىسى ايۋپوۆ راۋحات ابىلايەۆيچ. جىلجىمايتىن مۇلىك پەن وپەراسيالار قىزمەت تۇرىمەن اينالىسادى.

رەسمي مالىمەتتە اتالعان كاسىپورىننىڭ تىكەلەي كيمگە قاتىسى بارى ايتىلمايدى. ءبىراق 2022 جىلدىڭ ماۋسىم ايىندا وليگارحتار ۆلاديمير كيم مەن ەدۋارد وگاي "ەلباسى قورىنا" تيەسىلى Lux Service KZ جشس-نىڭ 50 پايىز اكسياسىن 1،3 ملرد تەڭگەگە ساتىپ الدى.

قازىرگى قۇرىلتايشىلارى – "جىلجىمايتىن مۇلىكتى باسقارۋ ديرەكسياسى" جاۋاپكەرشىلىگى شەكتەۋلى سەرىكتەستىگى مەن "قازاقمىس كورپوراسياسى" جاۋاپكەرشىلىگى شەكتەۋلى سەرىكتەستىگى. كومپانيا جىلجىمايتىن مۇلىكتى پايدالانۋمەن، جىلجىمالى جانە جىلجىمايتىن مۇلىكپەن وپەراسيالار ورىنداۋ، دامىتۋ قىزمەتىمەن اينالىسادى.

كومپانيانىڭ ەكىنشى قۇرىلتايشىسى – "جىلجىمايتىن مۇلىكتى باسقارۋ ديرەكسياسى" ج ش س، ونىڭ قۇرىلتايشىسى – "ەلباسى" قورى، "ەلباسىنىڭ" قۇرىلتايشىسى – نۇرسۇلتان نازاربايەۆ.

ورنالاسقان جەرى – استانا قالاسى، ەسىل اۋدانى، وتپە جولى 77.

2023 جىلعى اقشا اينالىمى – 825 195 329 تەڭگە. تولەگەن سالىعى – 16 840 721 تەڭگە. مەملەكەتتەن العان كەلىسىمشارتتارى تۋرالى مالىمەت كەزدەسپەيدى.

"جاس الاش" مالىمەتىنشە، كيمدى "نازاربايەۆتىڭ ءاميانى" دەيتىن سەبەبىنىڭ ءبىرى – قازاقستاننىڭ ءىرى مىس ءوندىرۋشىسى نۇرسۇلتان نازاربايەۆ قۇرعان كوممەرسيالىق ەمەس ۇيىمدارعا تۇراقتى دەمەۋشى بولىپ كەلگەن.

مىسالى، 2018-2022 جىلدار ارالىعىندا اتالعان كومپانيا ونىڭ قورىنا 79،4 ملرد تەڭگە اۋدارعان. 


ۇسىنىلعان
سوڭعى جاڭالىقتار
x