كەزدەسۋ بارىسىندا ەاەو-عا قاتىسۋشى مەملەكەتتەردىڭ وداق اياسىنداعى كەلىسىمدەردىڭ ورىندالۋىن قامتاماسىز ەتۋدىڭ وزەكتى ماسەلەلەرى مەن ەۋرازيالىق وداق ەلدەرىمەن ساۋدا بارىسىندا قازاقستاندىق بيزنەس تاپ بولاتىن كەدەرگىلەر تالقىلاندى.
سەنات باسشىسى بۇگىنگى تاڭدا ەاوە-نىڭ ىشكى نارىعى اياسىنداعى كەدەرگىلەردى جويۋ ءۇشىن جوسپارلى تۇردە ىلگەرىلەۋ كەرەكتىگىن اتاپ ءوتتى.
"اتقارىلعان جۇمىستارعا قاراماستان، كەدەرگىلەر مەن توسقاۋىلدار ازايعان جوق، قايتا كوبەيە تۇسۋدە. بۇگىندە كەلىسىلگەن كەدەرگىلەر ءتىزىلىمى 66 تارماقتان تۇرادى. كەزىندە بۇل ءتىزىلىم 60-تان باستالاتىن. بۇل كورسەتكىشتى ازايتۋدىڭ ورنىنا، ءبىز جىل ساناپ جاڭا كەدەرگىلەر جاساپ نەمەسە بۇرىنعىلاردى جويا الماي، سانىن كوبەيتىپ وتىرمىز"، - دەدى نازاربايەۆا.
قازاقستان تاۋارلارىنىڭ رەسەي نارىعىنا قول جەتكىزۋدەگى كەدەرگىلەر، قازاقستاندىق ءبىرقاتار تاۋار ونىمدەرى ترانزيتىنە تىيىم نەمەسە شەكتەۋ قويۋ، ەلەكتروندى دەكلاراسيالاۋ قاعيداتىنىڭ ساقتالماۋى، بەلگىلى ءبىر تاۋارلاردى جەتكىزۋدە ءتۇرلى تالاپ قويۋ ارقىلى كەدەرگىلەردى تەحنيكالىق رەتتەۋمەن بۇركەمەلەۋ ماسەلەسى وتاندىق بيزنەستىڭ الدىنداعى نەگىزگى قيىندىقتاردىڭ ءبىرى رەتىندە اتاپ ءوتىلدى.
ميحايل مياسنيكوۆيچ ەۋرازيالىق ەكونوميكالىق وداق اياسىندا قول قويىلعان 25-كە جۋىق كەلىسىم مەن شارتتار بۇگىنگى كۇنگە دەيىن راتيفيكاسيالانباي وتىرعانىنا نازار اۋداردى. سونىمەن قاتار القا باسشىسى ەكونوميكالىق داۋلاردى شەشۋ ءۇشىن ەاەك-نىڭ سوتقا جۇگىنۋ قۇقىعىنىڭ بولۋى كەرەكتىگىن جانە ەاەك اربيتراجىن قۇرۋ قاجەتتىگىن اتاپ ءوتتى.
داريعا نازاربايەۆا اتالعان باستاماعا قولداۋ ءبىلدىردى جانە شەشىمدەردى قابىلداۋ ءراسىمى تىم بيۋروكراتيالانعانى مەن ونىڭ ۇزاق ۋاقىتقا سوزىلاتىنىن ايتتى.
سەنات ءتوراعاسى سونداي-اق قازاقستاندىق اۋىر جۇك كولىكتەرىن جۇرگىزۋشىلەردىڭ رەسەي-بەلارۋس شەكاراسىنداعى پروبلەمالارىنا ەرەكشە توقتالدى.
"وداقتىق مەملەكەتتەردىڭ ءىس-قيمىلى بويىنشا بۇل شەكارادا حالىقارالىق تەكسەرۋ بەكەتىنىڭ بولماۋىنا بايلانىستى شەكارادان تەك رەسەي جانە بەلارۋس ەلىنىڭ ازاماتتارى عانا وتە الادى. بۇگىنگى كۇنى قازاقستاندىق جۇرگىزۋشىلەرگە شەكارادان وتۋگە ۋاقىتشا رۇقسات بار، دەگەنمەن ونىڭ ءوزى رەتتەلمەگەن تۇردە"، - دەدى د.نازاربايەۆا.
