نازاربايەۆ ۋنيۆەرسيتەتىنىڭ ەكس رەكتورى شيگەو كاتسۋ باسشىلىقتان ساياسي قىسىمنىڭ كەسىرىنەن كەتكەنىن ايتتى، - دەپ حابارلايدى Dalanews.kz.

بۇل تۋرالى ول University World News باسىلىمىنا بەرگەن سۇحباتىندا ايتتى. شيگەو كاتسۋدىڭ سوزىنشە، وزگەرىستەر 2022 جىلى بولعان قاڭتار وقيعاسىنان كەيىن باستالعان.

سونىمەن قاتار، ەكس رەكتوردىڭ ايتۋىنشا، ۋنيۆەرسيتەتتىڭ اكادەميالىق ەركىندىگى مەن ينستيتۋسيونالدىق اۆتونومياسىنا ءقاۋىپ ءتونىپ تۇر. ول بىلتىر كۇزدە ساياسي قىسىمنىڭ كەسىرىنەن جۇمىستان كەتكەن كورىنەدى. شيگەو كاتسۋ ءالى دە ۋنيۆەرسيتەتتىڭ قامقورشىلىق كەڭەسىنىڭ مۇشەسى ەكەنىن اتاپ ءوتتى.

كاتسۋدىڭ سوزىنشە، 2022 جىلى ۇكىمەت اۋىسقاننان كەيىن ەكس پرەزيدەنت نازاربايەۆ قۇرعان نازاربايەۆ ۋنيۆەرسيتەتى مەن باسقا دا ۇيىمدارعا ءقاۋىپ تونگەن.

"ول "ارنايى اقشا العان بلوگەرلەر" ۋنيۆەرسيتەت پەن كاتسۋدى سىناي باستاعانىن ايتادى. كاتسۋ وعان شابۋىل جاسالدى دەپ سانايدى، سەبەبى ولارعا كاتسۋدىڭ ءمىنسىز بەدەلى كەدەرگى جاساعان"، - دەلىنگەن ماتەريالدا.

شيگەو كاتسۋدىڭ سوزىنشە، ءقازىردىڭ وزىندە ۋنيۆەرسيتەتتىڭ باسقارۋ كەڭەسىن قايتا قۇرىلىمداۋدا ساياسي ىقپال بايقالا باستاعان. سەبەبى ۋنيۆەرسيتەتتە ەكى دەڭگەيلى باسقارۋ جۇيەسى – قامقورشىلىق كەڭەس جانە ونىڭ ۇستىندەگى جوعارعى كەڭەس بار. جوعارى كەڭەستى بۇرىن سول كەزدەگى پرەزيدەنت نازاربايەۆ باسقارعان جانە ول "جالپى ستراتەگيالاردى بەكىتكەن".

"مەن وعان (نازاربايەۆقا) جىلىنا ەكى-ۇش رەت كەلىپ، نە ىستەپ جاتقانىمىز تۋرالى ەسەپ بەرىپ، دۇرىس جولدا كەلە جاتىرمىز با، جوق پا دەگەن جالپى تۇسىنىك الۋ ءۇشىن كەلەتىن ەدىم، ءبىراق ول ەشقاشان ەشتەڭەگە ءمان بەرىپ، ارالاسقان ەمەس"،  - دەيدى كاتسۋ.

ايتا كەتەيىك، وقۋ ورنىن 13 جىل باسقارعان شيگەو كاتسۋدىڭ باسشىلىق قىزمەتتەن كەتكەنى تۋرالى بىلتىر بەلگىلى بولعان ەدى.