نازاربايەۆ: «ءبىزدىڭ حالىق قاسىق قانى قالعانشا وسى جەردى قورعايدى دەپ بىلەمىن»

Dalanews 26 ءساۋ. 2016 22:43 102

اعايىننىڭ جەرگە دەگەن كوڭىلى وسىنداي بولىپ قالا بەرسە، وندا حالقىمىز قاسىق قانى قالعانشا جەرىمىزدى قورعايدى دەپ بىلەمىن. بۇگىن «تاۋەلسىزدىك. كەلىسىم. بولاشاعى ءبىرتۇتاس ۇلت» كۇن تارتىبىمەن ءوتىپ جاتقان قازاقستان حالقى اسسامبلەياسىنىڭ XXIV سەسسياسىندا ەلباسى نۇرسۇلتان نازاربايەۆ وسىلاي دەدى. بۇل تۋرالى قازاقپارات جازدى.

«جەر — اتا-بابامىزدان بىزگە ميراس بولىپ قالعان ەڭ باستى قازىنامىز، ۇلتىمىزدىڭ ۇلى بايلىعى. قازاقتىڭ دالاسى — حالىقتىڭ مەنشىگى. قازاقستاننىڭ 14 مىڭ شاقىرىم شەكاراسىن شەگەندەۋ ءۇشىن مەن 8 جىل ءار جەردە، ءار ادامدارمەن، ءار باسشىلارمەن كەلىسسوزدەر جۇرگىزدىم، قيىن-قيىن جەرلەردەن وتتىك.  كەلىستىك. تۇڭعىش رەت قازاقستاننىڭ ءوز تەرريتورياسى بار. شەكارانى شەگەندەدىك. نە ءۇشىن؟ جەردىڭ تۇتاستىعى ءۇشىن جاساپ وتىرمىز ونى. جەر تۋرالى كودەكستەگى وزگەرىستەر اۋىل شارۋاشىلىعىمەن اينالىسىپ جۇرگەن شارۋاقور ادامدارعا جەڭىلدىك جاساۋدى كوزدەيدى. ولار جەردىڭ قوجاسى بولسا، جەردىڭ قادىرلەيدى. كۇتەدى»، — دەدى ەلباسى.

وسى رەتتە ق ر پرەزيدەنتى جەردى جالعا بەرۋ الەمنىڭ بارلىق ەلدەرىندە بار ەكەندىگىن اتاپ ءوتىپ، ناقتى مىسالدار دا كەلتىرە كەتتى.

«توڭىرەكتەگى ءارتۇرلى الىپقاشپا اڭگىمەلەر مەن پىكىرلەر — ارانداتۋشىلاردىڭ بۇگىنگى ارەكەتىنىڭ ءبىرى. ونىڭ ىشىندە باياعى قاشقىندار دا بار، بوسقىندار دا بار. بىلەمىز بارلىعىن. دەگەنمەن، وسى ماسەلەگە كوڭىل بولگەنى ءۇشىن مەن ءبىر جاعىنان اعايىنعا قۋانامىن. لايىم، ءارقاشان جەرگە دەگەن قاسيەتتى كوڭىل وسىنداي بولسا، ءبىزدىڭ حالىق قاسىق قانى قالعانشا وسى جەردى قورعايدى دەپ بىلەمىن»، — دەدى ن.نازاربايەۆ.

 

«ۇلت اقپارات»


ۇسىنىلعان
سوڭعى جاڭالىقتار
x