وقىرمان نازارىنا قاسىم-جومارت توقايەۆتىڭ نەگىزگى دايەكسوزدەرىن ۇسىنامىز:
– ەلىمىزدىڭ ءاربىر ازاماتى ءوزىن ءقاۋىپسىز سەزىنۋگە ءتيىس. ول ءۇشىن قۇقىق قورعاۋ جۇيەسى ۇيلەسىمدى ءارى ءتيىمدى جۇمىس ىستەۋى قاجەت. ەڭ الدىمەن، مەملەكەتتە زاڭ تالاپتارى مۇلتىكسىز ورىندالۋى كەرەك. زاڭ بۇزعان كەز كەلگەن ادام جازاسىن الۋعا ءتيىس.
– حالقىمىزدىڭ دۇنيەتانىمىنا جات يدەولوگيا دا ەلىمىزگە زور ءقاۋىپ توندىرەدى. اسىرەسە، جاس ۇرپاق جاساندى يدەيالار مەن «جالعان باتىرلاردىڭ» جەتەگىنە ىلەسىپ كەتۋى مۇمكىن. الەۋمەتتىك جەلىدە جاستاردى زاڭسىز ىس-ارەكەت جاساۋعا شاقىراتىن ماتەريالدار تارالۋدا.ءتىپتى، زاڭ بۇزعان ادامداردى ۇلگى ەتىپ كورسەتەتىندەر بار.
– ءبىزدىڭ ازاماتتارىمىز كەز كەلگەن زاڭسىزدىققا قارسى بولۋى كەرەك، ياعني بىزگە زاڭ بۇزۋشىلىققا توتەپ بەرەتىن مىقتى يممۋنيتەت قاجەت. ەل ىشىنە ىرىتكى سالاتىن، ءقاۋىپ توندىرەتىن ارەكەتتەردى اقتاۋعا قاتاڭ توسقاۋىل قويۋ كەرەك. قۇقىقتىق نيگيليزمگە، ياعني زاڭ ۇستەمدىگىن جوققا شىعارۋعا جول بەرىلمەۋگە ءتيىس.
– ءبىراق بۇگىندە قىلمىستىڭ الدىن الۋ شارالارى ءتيىمدى جۇرگىزىلىپ جاتقان جوق. مۇنى مويىنداۋ كەرەك. سوندىقتان جۇيەنى تۇبەگەيلى جاڭارتۋ قاجەت. وسى رەتتە ءقاۋىپتى توپتارعا جاتاتىن ازاماتتاردىڭ باسىم بولىگى نازاردان تىس قالىپ قويادى.
– بۇدان بولەك، كامەلەتكە تولماعان ازاماتتاردىڭ قۇقىعىن قورعاۋ جۇيەسىن جاڭعىرتۋ – وتە وزەكتى ماسەلە. ۇكىمەت ازاماتتىق قوعام ينستيتۋتتارى مەن ساراپشىلاردى تارتا وتىرىپ، بۇل جۇمىسقا مۇقيات قاراۋى كەرەك.
– پوليسيا قاشاندا حالىققا ۇلگى-ونەگە بولۋى كەرەك. سوندا عانا جۇرت پوليسياعا سەنەدى، ونى قورعان كورەدى. وكىنىشكە قاراي، ءتارتىپ ساقشىلارىنىڭ ءبارى بىردەي سونداي دەپ ايتا المايمىز.
– سوڭعى كەزدە مۇنداي وقيعالار جيىلەپ كەتتى. بۇعان جول بەرمەۋىمىز كەرەك جانە ونداي ارەكەتتەردى مۇلدەم اقتاۋعا بولمايدى. وسىنداي جاعدايلار بۇكىل جەكە قۇرامنىڭ جۇمىسىن ءبىر ساتتە جوققا شىعارادى. ونداي ادامداردى پوليسيا قاتارىنان شىعارۋ قاجەت. ولار بيلىكتىڭ ابىروي-بەدەلىن تۇسىرەدى. قىزمەتكەرلەرىن دەر كەزىندە تارتىپكە سالماعان باسشىلار ماسەلەسىن دە قاراۋ كەرەك
– الايدا اتتەستاسيا بىرەۋدەن ەسە قايتارۋدىڭ قۇرالى بولماۋعا ءتيىس. باستى ماقسات – جەكە قۇرامدى بىلىكسىز جانە جۇمىسىنا ادال ەمەس باسشىلاردان تازارتۋ، ياعني كاسىبي كادر رەزەرۆىن جاساقتاۋ. سوندا عانا احۋالدى تۇبەگەيلى وزگەرتە الامىز. پرەزيدەنت اكىمشىلىگى بۇل جۇمىستى باقىلاۋدا ۇستايدى.
– جاسوسپىرىمدەر بوس جۇرمەۋگە ءتيىس. ولاردىڭ شىعارماشىلىققا، سپورتقا قىزىعۋشىلىعىن ارتتىرۋ جاعىنا كوبىرەك كوڭىل ءبولۋ قاجەت. بالالاردى ەڭبەككە باۋلىپ، ۆولونتەرلىك قىزمەتكە جۇمىلدىرعان ابزال. كوزبوياۋشىلىق ءۇشىن جاسالاتىن جۇمىستى دوعارۋ كەرەك.
– سينتەتيكالىق ەسىرتكىنىڭ قولجەتىمدىلىگى جانە ونىڭ بارىنشا تەز تارالۋى جاستار اراسىندا ناشاقورلىقتىڭ بەلەڭ الۋىنا اكەپ سوقتىرادى. ولارعا ناشاقورلىقتىڭ قانشالىقتى قاتەرلى ەكەنىن ۇنەمى ءتۇسىندىرىپ وتىرۋ قاجەت. پوليسيا ەسىرتكى ءوندىرۋ، ونى ساتۋ جانە تاراتۋعا قارسى بەلسەندى كۇرەس جۇرگىزۋى كەرەك. ناۋقانشىلدىق، كوزبوياۋشىلىق جانە ستاتيستيكا ءۇشىن جۇمىس ىستەۋ دەگەندى توقتاتۋ قاجەت.
– ءبىز وزدەرىنىڭ قىزمەتتىك مىندەتتەرىن ادال اتقارىپ جۇرگەن پوليسەيلەردى ەسكەرۋسىز قالدىرماۋىمىز كەرەك. اسىرەسە ولاردىڭ ناعىز ەرلىك ىستەرىن (ال مۇنداي جاعدايلار از ەمەس)، جۇمىسىن لايىقتى باعالاپ، ەڭ جوعارى ناگرادالارمەن ماراپاتتاۋىمىز قاجەت. كاسىبيلىك، جاۋاپكەرشىلىك تانىتقان، ەرلىك كورسەتكەن ناقتى جاعدايلاردى ۇلگى ەتۋ، ىشكى ىستەر ورگاندارى قىزمەتىنىڭ تيىمدىلىگىن ارتتىرۋ ارقىلى پوليسيانىڭ وڭ ءيميدجىن قالىپتاستىرۋ ماڭىزدى
فوتو: اقوردا
