نەلسوننىڭ سوزىنشە، 2024 جىلعا جەيىن استروناۆتاردى ايعا قوندىرۋعا تەحنيكالىق جاقتان مۇمكىندىك بولماي جاتىر.
– بۇدان بولەك «ارتەميدا» باعدارلاماسىنىڭ باسقا كەزەڭدەرى دە كەيىنگە شەگەرىلىپ جاتىر. اتاپ ايتقاندا، سپۋتنيكتىڭ ەكيپاجسىز ايدى اينالۋى 2021 جىلدان 2022 جىلدىڭ جاز ايلارىنا جىلجىسا، ەكيپاجدىڭ Orion كەمەسىمەن ايدى اينالۋى 2023 جىلدان 2024 جىلعا جىلجىعان، – دەدى نەلسون.
ونىڭ سوزىنشە، بۇعان كوروناۆيرۋس پاندەمياسى، سونىمەن بىرگە سوت پروسەسى سەبەپ بولعان. وسىعان دەيىن دجەفف بەزوسقا تيەسىلى Blue Origin كومپانياسى يلون ماسكتىڭ SpaceX كومپانياسىنا بەرىلگەن ايعا قونۋ ءمودۋلىن ىستەپ شىعۋى بويىنشا سوتقا شاعىمدانعان.
– سوت پروسەسىنە جەتى اي ۋاقىتىمىزدى جوعالتتىق. وسى ارالىقتى ميسسياعا دايىندىق جۇمىسىمىزدى باستاۋىمىز كەرەك ەدى، – دەدى نەلسون.
«ارتەميدا» اقش ۇكىمەتى قارجىلاندىراتىن ايعا ادامداردى جونەلتۋ بويىنشا NASA باعدارلاماسى. وعان امەريكالىق جەكە كومپانيالار، ەۋروپانىڭ عارىش اگەنتتىگى، جاپونيا، كانادا، اۆستراليا، ۇلىبريتانيا، يتاليا، بىرىككەن اراب ەميراتتارى، ليۋكسەمبۋرگ جانە ۋكراينا كىرەدى.
وسىعان دەيىن NASA نەگىزگى ماقسات ادامدى ايعا قىتايدان ءبىرىنشى بولىپ قوندىرۋ ەكەنىن بىرنەشە رەت ايتقان. بۇگىندە عارىش باعدارلاماسىن بەلسەندى تۇردە دامىتىپ جاتقان بەيجىڭ وسىعان دەيىن مارس بەتىنە زەرتتەۋ اپپاراتتارىن قوندىرىپ، ايعا زوندتارىن جونەلتكەن.
