بۇل جولداۋدىڭ اتى ايتىپ تۇرعانداي، قازىرگى ءححى عاسىرداعى وزگەرمەلى ۋاقىتتا، الەمنىڭ قارىشتاپ، كۇن سايىن جاڭا يننوۆاسيالىق تەحنولوگيالاردىڭ جاڭا تۇرلەرى قولدانىسقا ەنىپ جاتقان كەزەڭدە، حالقىمىزدىڭ وسى كوشكە ەرىپ قانا قويماي، تۇرمىس ساپاسىن ارتتىرىپ، تابىسقا قول جەتكىزە ءبىلۋى مەملەكەتىمىزدىڭ باستى مىندەتى. پرەزيدەنت بۇل جولداۋىندا ءبىزدىڭ ەلىمىزدىڭ جاھاندىق داعدارىس قىسپاعىنان جول تاۋىپ، مەملەكەتتى العا سۇيرەريتىن باستى باعىتتاردى اتاپ كورسەتتى.
جالپى، ەلىمىز تاۋەلسىزدىك العالى بەرى ۇلت كوشباسشىسىنىڭ جىل سايىنعى حالىققا ارناعان جولداۋلارى ەلىمىزدىڭ جارقىن بەلەستەردى باعىندىرىپ، الەمدىك ساياساتتا وزىندىك ورنى بار ىرگەلى مەملەكەتكە اينالۋىنىڭ باستى باعدارى بولدى. ن.نازاربايەۆتىڭ جىل سايىنعى ەلىمىزدىڭ باستى قۇجاتى سانالاتىن بۇل جولداۋلارى ەل دامۋىنىڭ جولدارىن ايقىنداپ، تاۋەلسىز قازاقستاندى گۇلدەنگەن ەلگە اينالدىردى دەسەك ارتىق ايتقاندىعىمىز ەمەس. ەلباسىنىڭ بيىلعى جولداۋى دا ەلىمىزدىڭ الەمدىك ارەنادا ءوز ورنىن ايقىنداپ قانا قويماي، وزگەلەر ۇلگى تۇتار مەملەكەت دەڭگەيىنەن تومەندەمەۋىنە دە ءوز سەپتىگىن تيگىزەرى اقيقات. بيىلعى جولداۋ ەل ەكونوميكاسىنىڭ ءار تاراپتانىپ، حالقىمىزدىڭ تۇرىمىس-تىرشىلىگىنىڭ دە جاقسارۋىن، قازاقستاندىقتاردىڭ بولاشاقتا دا قالاي داميتىنىن انىقتاپ بەردى. جولداۋداعى «حالىق تابىسىنىڭ ءوسۋى»، «تۇرمىس ساپاسىن ارتتىرۋ»، «ءومىر سۇرۋگە جايلى ورتا قالىپتاستىرۋ»، «ازاماتتاردىڭ سۇرانىسىنا بەيىمدەلگەن مەملەكەتتىك اپپارات»، «ءتيىمدى سىرتقى ساياسات» دەپ اتالاتىن باعىتتارى جاڭا قازاقستاننىڭ العا قادام باسارداعى باستى باعدارشامى. بۇل، ارينە، ەلىمىزدىڭ الداعى ۋاقىتتا قاي باعىتتا قۇلاش سەرمەۋىنە جول كورسەتەدى دەسە دە، ءبىز ءبىلىم سالاسىنىڭ قىزمەتكەرلەرى بولعاندىقتان وسى ءبىلىم سالاسىنا قانداي تىڭ باستامالار مەن جاڭالىقتار ەنەدى دەپ قۇلاق ءتۇرىپ وتىرامىز.
بيىلعى جولداۋدىڭ باسقادان ەرەكشەلىگى بۇل جولى ەلباسىمىز پەداگوگ مارتەبەسىنە كەڭىنەن توقتالعان. ويتكەنى قازىرگى تاڭدا مۇعالىمدەردىڭ مارتەبەسى مەن ولاردىڭ ولشەۋسىز ەڭبەگى زاڭ اياسىندا قورعالۋ كەرەكتىگىن قوعامنىڭ ءوزى انىقتاپ بەردى. اسىرەسە، پرەزيدەنتتىڭ «5 جىل ىشىندە ءبىلىم، عىلىم، دەنساۋلىق ساقتاۋ سالالارىنا بارلىق كوزدەردەن جۇمسالاتىن قاراجاتتى ىشكى جالپى ءونىمنىڭ 10 پايىزىنا دەيىن جەتكىزۋ قاجەت»،– دەپ ايتقانى ءبىلىم سالاسىنا دەگەن ۇلكەن جاناشىرلىق قامقورلىعى دەپ بىلەمىز. ەلباسىمىزدىڭ مەكتەپكە دەيىنگى ءبىلىم بەرۋ ساپاسىن تۇبەگەيلى وزگەرتۋ كەرەك دەگەنى بولاشاق ۇرپاقتىڭ جان-جاقتى دامىعان، كەز-كەلگەن ورتاعا ءوزىن بەيىمدەي الۋىنا جول اشارى ءسوزسىز.
سونىمەن قاتار، جوعارى وقۋ ورىندارىنداعى ءبىلىم ساپاسىنىڭ جاقسارۋىن كۇشەيتۋ، جوعارى وقۋورىندارىن ىرىلەندىرۋ دەگەن ۇسىنىستارى ەلىمىزدەگى ءبىلىم باسەكەسىنىڭ ارتۋىنا جول اشادى دەپ بىلەمىن. ويتكەنى، مامان دايارلاۋدا قازىرگى زاماناۋي سۇرانىسقا قاراي قازاقستاندى دامىتۋعا جاعداي جاساپ، ادامي كاپيتالدىڭ ساپاسىن ارتتىرۋعا كۇش سالا بىلەتىن وقۋ ورىندارى عانا جۇمىس جاساۋىنا تولىق مۇمكىندىك بەرىپ وتىر. ۇلت كوشباسشىسىنىڭ الەمدىك ەلدەردىڭ تاجىريبەسىنەن قۇرالعان نازاربايەۆ ۋنيۆەرسيتەتىنىڭ ۇلگىسىمەن جاڭا جوعارى وقۋ ورىندارىن قۇرۋ قاجەت دەگەن مىندەتتەرى بۇدان بىلاي ءبىلىم سالاسىنا جاۋاپكەرشىلىكتى ارتتىراتىنى ءسوزسىز.
بۇل سالادا 90 جىلدىق تاريحى بار اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە دە ناقتىلى مىندەتتەر ارتىلاتىنى اقيقات. ءبىزدىڭ ۋنيۆەرسيتەتىمىز رەكتور تاكير بالىقبايەۆتىڭ باستاماسىمەن كوپتەگەن تىڭ باستامالاردىڭ باستاۋشىسى بولىپ ەلىمىزدەگى پەداگوگيكالىق جوعارى وقۋ ورىندارىنىڭ كوشباسشىسى دەگەن اتتان اينىماي كەلە جاتىر. بيىلعى جىلعى پرەزيدەنتتىڭ جارلىعىمەن مەملەكەتتىك گرانتتاردىڭ سانى ارتقانى بارشامىزعا ءمالىم. سول گرانتتاردىڭ كوپشىلىگىن ءبىزدىڭ وقۋ ورنىمىز يەلەنىپ وتىر. بۇل دا ءبىزدىڭ وقۋ ورنىمىزدىڭ تالاپقا ساي ءبىلىم بەرەتىنىنىڭ ايعاعى. بيىلعى وقۋ جىلىنىڭ وزىندە-اق كوپتەگەن جاڭا باعدارلامالار قۇرىلىپ، ستۋدەنتتەرىمىزدىڭ باسەكەگە قابىلەتتى مامان بولۋىنا ءبىرشاما جۇمىستار جۇرگىزىلدى. وقۋ ۇدەرىسىنە جاڭا يننوۆاسيالىق تەحنولوگيالار كەڭىنەن ەنگىزىلۋدە. وقىتۋشى-پروفەسسورلاردىڭ جاۋاپكەرشىلىگى ارتتىرىلدى. ءبىلىمدى باعالاۋدىڭ كريتەرييلىك ۇلگىسى ەنگىزىلىپ جاتىر. سونداي-اق ءبىزدىڭ وقۋ اكادەميالىق ۇتقىرلىق باعدارلاماسى بويىنشا ءبىزدىڭ ستۋدەنتتەرىمىز شەتەلدىك جەتەكشى جوعارى وقۋ ورىندارىندا وقىپ كەلسە، شەتەلدىك پروفەسسورلاردى دا وزىمىزدەگى وقۋ ۇدەرىسىنە كوپتەپ تارتىپ وتىرمىز. بۇگىندە الەمنىڭ 23 مەملەكەتتەرىنىڭ 130 ۋنيۆەرسيتەتتەرىمەن ارىپتەستىك قىزمەت اتقارىپ كەلە جاتقان وقۋ ورنىمىز بۇدان بىلاي دا ءورىسىن كەڭەيتە بەرەدى دەپ ويلايمىن.
قىسقاسى، جولداۋ ناقتىلى مىندەتتەر بەلگىلەندى. ەندى ونى جۇزەگە اسىرۋعا اتسالىسۋ بارشامىزعا سىن.
حايرۋللا جانبەكوۆ، اباي اتىنداعى قازۇپۋ اكادەميالىق ماسەلەلەر جونىندەگى دەپارتامەنت ديرەكتورى
