شاحتاداعى شىرعالاڭعا قاتىستى ءماجىلىس دەپۋتاتى ەرلان سايىروۆ نە دەيدى؟
– ەرلان بياحمەت ۇلى، قاۋىسىزدىككە سالعىرتتىق، مەنەدجمەنت السىزدىگى كوستەنكوداعى اپاتقا سەبەپ. شەتەلدىك كومپانيا ينۆەستيسيالىق جانە وزگە دە مىندەتتەمەلەرىن ورەسكەل بۇزعانىن كورسەتتى. ءوزىڭىز دە بۇعان دەيىن قازاقستان بيلىگى «ارسەلورميتتالتەمىرتاۋ»-دى جازالاۋدا دارمەنسىزدىك تانىتىپ وتىر دەپ دابىل قاققان ەدىڭىز...
– بىرىنشىدەن، شاحتادا قازا تاپقان بارشا كەنشىلەردىڭ جاقىندارىنا قايعىرا كوڭىل ايتامىن. بۇگىن شاحتاداعى بىتپەيتىن شيكىلىكتەن كەيىن پرەزيدەنت ۇكىمەتكە «ارسەلورميتتال تەمىرتاۋ» كومپانياسىمەن ينۆەستيسيالىق ىنتىماقتاستىقتى توقتاتۋدى تاپسىردى. بۇل – وڭ شەشىم.
سەبەبى بۇگىنگى وقيعا «ارسەلورميتتالدىڭ» جاۋاپسىزدىقتىڭ سيمۆولى ەكەنىن تاعى ءبىر كورسەتتى. ءقازىر «ارسەلورميتتال تەمىرتاۋ» اق كومپانياسىنا تيەسىلى 8 شاحتانىڭ جۇمىسى ۋاقىتشا توقتاتىلعان.
جالپى، بۇعان دەيىن دە كومپانياعا بىرنەشە مارتە ايىپپۇل سالىنىپ، قاۋىپسىزدىك تالاپتارىنىڭ ساقتالماعانىنا قاتىستى سىن تاعىلدى. بىرنەشە ميلليون دوللار ايىپپۇل سالىنعانمەن بۇل جاعداي دا دۇرىس شەشىم تاپپادى.
قاراعاندى وبلىسىنىڭ ەكولوگيا دەپارتامەنتىنىڭ ولارعا 1،2 ملرد تەڭگە كولەمىندە ايىپپۇل ارقالاتقانى ساباق بولمادى. سوندىقتان بۇعان دەيىن دە مەن حالقىمىزدى قويشا قىرعان ميتتالدىڭ بىزگە كەرەك ەمەس ەكەنىن ايتتىم.
– وسى ورايدا ەلگە كەلەتىن ينۆەستورلارعا تالاپتى كۇشەيتۋ، ءوندىرىس سالاسىنداعى ەڭبەك قاۋىپسىزدىگى مەن جۇمىسشىلاردىڭ قۇقىعىن قورعاۋدىڭ جاڭا ءادىسى قاجەت دەپ سانامايسىز با؟
– مۇنداي قايعىلى جايتتار 1995 جىلدان بەرى بايقالىپ كەلەدى. ماسەلەن، «ارسەلورميتتال تەمىرتاۋ» جۇمىس ىستەگەن جىلدارى كاسىپورىندا جۇزدەن استام كەنشى مەزگىلسىز اجال قۇشقان. سول سەبەپتى ءبىز حالىقارالىق ەڭبەك جانە جۇمىسشىلاردى قورعاۋ ۇيىمدارى ارقىلى ەلىمىز بەن ازاماتتارىمىز ءۇشىن مورالدىق جانە ماتەريالدىق وتەماقى تالاپ ەتۋىمىز قاجەت! ميتتال مىرزاعا بۇكىل الەمدە جاريا سانكسيا بەرۋدى قامتاماسىز ەتۋىمىز كەرەك! وندىرىستىك قىزمەت تەك جۇمىسشىلاردىڭ قاۋىپسىزدىگىن عانا ەمەس، سونىمەن قاتار كاسىپورىننىڭ جانىندا تۇراتىن ازاماتتاردىڭ قاۋىپسىزدىگىن دە قامتيدى.
كاسىپورىن قىزمەتىندەگى نەگىزگى بۇزۋشىلىقتار قاتارىندا ازاماتتاردىڭ ءال-اۋقاتىنا تەرىس اسەر ەتەتىن شەكتى رۇقسات ەتىلگەن شىعارىندىلار بويىنشا بەلگىلەنگەن نورماتيۆتەردەن اسىپ كەتۋ دە بار.
جۇزدەگەن ادام ولىمىنە قاراماستان، كومپانيا وسى كەزگە دەيىن ءوز كاسىپورىندارىنداعى ءولىم-جىتىم دەڭگەيىن تومەندەتۋ بويىنشا پارمەندى شارا قولدانبادى، بۇل كورپوراسيا مەنەدجمەنتى جايىندا تەرىس پىكىر قالىپتاستىرادى، ولاردىڭ قازاقستاندىقتارعا نەمقۇرايلىلىعىن راستايدى.
سول سەبەپتى الداعى ۋاقىتتا ەلدەگى ينۆەستورلارعا دەگەن تالاپتى مايشاممەن قاراۋ قاجەت.
سونداي-اق، ينۆەستورلاردىڭ وزدەرىن دە قازاقستان زاڭناماسىنا سايكەس قىلمىستىق جاۋاپكەرشىلىككە تارتقان دۇرىس.
– ءوزىڭىز بىلەسىز، ينۆەستورلارمەن جاساسقان شارتتار قۇپيا. بۇل رەتتە ەسكى-جاڭا كەلىسىمدەردى قاراۋعا دەپۋتاتتار اتسالىسا الا ما؟
– اقشا تابۋعا تىرىساتىن كومپانيا باسشىلىعى بيزنەستىڭ الەۋمەتتىك جاۋاپكەرشىلىگى مەن جۇمىسشىلاردىڭ قۇقىقتارىن قامتاماسىز ەتۋ ماسەلەلەرىنە نازار اۋدارماي، جۇمىسشىلارىنىڭ باسىن تاۋەكەلگە تىگىپ جاتادى. سوندىقتان بۇل كۇرەس ۇلتتىق مۇددە ءۇشىن ماڭىزدى، جوعارىدا ايتقانىمداي، ءبىز حالاقارالىق دەڭگەيدە قۇقىقتىق تالاپ قويۋمىز كەرەك، ال كەلىسىمدەردى قايتا قاراۋدى كۇن تارتىبىنە قويامىز.
ميتتال قازاقستانعا "كىرۋ" ءۇشىن 100 ملن دوللار پارا بىرگەن. تولىعىراق: https://t.me/dalainside/1552
