استانا قالاسىنىڭ مامانداندىرىلعان اۋدانارالىق اكىمشىلىك سوتى ءبىلىم گرانتىن الا الماعانى ءۇشىن عىلىم جانە جوعارى ءبىلىم مينيسترلىگىن سوتقا بەرگەن تالاپكەردىڭ ءىسى بويىنشا شەشىم شىعاردى، دەپ حابارلايدى Dalanews.kz.
سوت مالىمەتىنشە، ارىزدانۋشى ۇبت-دان 119 بالل جيناعان. 2024 جىلدىڭ 16 شىلدەسىندە ول نارحوز ۋنيۆەرسيتەتىنىڭ “B049 – قۇقىق” ماماندىعىنا مەملەكەتتىك گرانت الۋ كونكۋرسىنا قۇجات تاپسىرعان.
ۇلتتىق تەستىلەۋ ورتالىعىنىڭ دەرەگىنە سۇيەنسەك، 2024-2025 وقۋ جىلىنا بۇل ماماندىق بويىنشا 150 گرانت بولىنگەن. الايدا 2024 جىلعى 2 تامىزدا ءمينيستردىڭ بۇيرىعىمەن 30 گرانت “توتەنشە جاعدايداعى وڭىرلەردىڭ” تالاپكەرلەرىنە كۆوتا بويىنشا بەرىلگەن. وسى سەبەپتى ارىزدانۋشى م. مەملەكەتتىك گرانتقا ىلىگە الماعان.
كەيىن، 2024 جىلعى 27 تامىزدا مينيسترلىكتىڭ بۇيرىعىمەن يگەرىلمەي قالعان گرانتتاردى قايتا ءبولۋ ناتيجەسىندە ارىزدانۋشى نارحوز ۋنيۆەرسيتەتىنىڭ “قۇقىق” ماماندىعى بويىنشا گرانتقا يە بولدى. دەگەنمەن ول مينيسترلىكتىڭ 2024 جىلعى 2 تامىزداعى بۇيرىعىن زاڭسىز دەپ تاۋىپ، سوتقا جۇگىنگەن.
2024 جىلعى 17 جەلتوقساندا سوت تالاپكەردىڭ ارىزىن قاناعاتتاندىرمادى.
سوتتىڭ حابارلاۋىنشا، مينيسترلىك بۇيرىعى تالاپكەردىڭ قۇقىقتارىن بۇزباعان.
"استانانىڭ مامانداندىرىلعان اۋدانارالىق اكىمشىلىك سوتىنىڭ 2024 جىلعى 17 جەلتوقسانداعى شەشىمىمەن م.-نىڭ تالاپ قويۋى قاناعاتتاندىرۋسىز قالدىرىلدى. داۋلى بۇيرىقپەن تالاپ قويۋشىنىڭ قانداي دا ءبىر قۇقىقتارى بۇزىلعان جوق. سوت سۇرالىپ وتىرعان گرانتتى العان تالاپ قويۋشىنىڭ ىس-ارەكەتىندە قۇقىقتى تەرىس پايدالانۋ بار دەپ قاراستىرىپ، تالاپ قويۋدى قاناعاتتاندىرۋدان باس تارتتى”، – دەلىنگەن سوت حابارلاماسىندا.
ەسكە سالايىق، بۇعان دەيىن گرانتسىز قالعان 200-دەن استام تۇلەك ءمينيستردى سوتقا بەرگەن ەدى.
بەلگىلى ادۆوكات حاليدا ءاجىعۇلوۆا ErtenMedia.kz-كە گرانتتان قاعىلعان تۇلەكتەر عىلىم جانە جوعارى ءبىلىم مينيسترلىگىنە قارسى ارىز جازىپ جاتقانىن ايتقان بولاتىن.
"مينيسترلىك ءوز گرانتتارىنان زاڭسىز ايىرىلعان تالاپكەرلەردى ۇنەمى ەلەمەي قالا المايدى. سۋ تاسقىنىنان زارداپ شەككەندەر تۇلەكتەرگە كومەكتەسۋ ماقساتىندا جىلدار بويى گرانتقا قول جەتكىزۋ ءۇشىن تىنباي دايىندالعان باسقا بالالاردىڭ قۇقىقتارىن شەكتەي المايمىز. باسقا بىرەۋدىڭ ەسەبىنەن قايىرىمدىلىق جاساۋعا بولمايدى.
وكىنىشكە قاراي، بيىل كەيبىر تۇلەكتەر ۋنيۆەرسيتەتكە بارا المايدى، سەبەبى وقۋ ورىندارى ۇبت-دان جوعارى بالل العانىنا قاراماستان ولارعا ىشكى گرانتتاردى بەرۋدەن باس تارتقان. ال ولاردىڭ وتباسىلارى وقۋ اقىسىن تولەۋ شامالارى جەتپەيتىنىن ايتىپ وتىر"، — دەدى ادۆوكات.
ول بۇل ىسكە بەي-جاي قارامايتىنداردان قولداۋ سۇرادى. ادۆوكات گرانتتان قاعىلعاندار سوتتا قۇقىعىن قورعاعانعا دەيىن ولاردىڭ وقۋ اقىسىن تولەۋگە كومەكتەسەتىن جاندار تابىلسا دەگەن تىلەگىن ءبىلدىردى.
حاليدا ءاجىعۇلوۆاعا 200-دەن استام بالا جۇگىنگەن، ولار ەندى ءوز قۇقىقتارىن ۇلتتىق جانە حالىقارالىق ورگانداردا قورعاۋ ءۇشىن كاسىبي ءبىلىم الۋعا ءماجبۇر.
