بۇگىن ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى ءومىرزاق شوكەيەۆ تۇركىستان وبلىسىنا جاساعان جۇمىس  ساپارى كەزىندە ماقتاارال اۋدانىنا دا ات باسىن بۇردى.

ماقتالى ولكەدەگى اۋىل شارۋاشىلىعى سالاسىنىڭ دامۋ بارىسىمەن تانىسقان مينيستر بىرنەشە نىسانداردى ارالاپ كوردى.

ەڭ الدىمەن مينيستر دوستىق اۋىلدىق وكرۋگى، گۇلىستان اۋىلىنداعى «دارمون» شارۋا قوجالىعىنىڭ جۇمىسىمەن تانىستى. قوجالىق باسشىسى داۆرون تۋيماتوۆ بيىل 46،38 گەكتار جەرگە ەگىن ەككەن. ونىڭ 5 گەكتارى داندىك جۇگەرى بولسا، قالعان 41،38 گەكتارى ماقتالىق القاپ. 15 ادامدى جۇمىسپەن قامتىپ وتىرعان «داۆرون» شارۋا قوجالىعىنىڭ تەحنيكالىق جاعدايى دا جاقسى. اتاپ ايتقاندا، 2 دانا التاي (ت-4)، 2 دانا متز، 1 دانا ماقتا تەرۋ كومباينى، 3 دانا تىركەمەسى بار.

جالپى ماقتاارال اۋدانىندا 38 593 گەكتاردان اسا جەرگە ماقتا ءشيتى سەبىلگەن. بيىل ورتاشا ەسەپپەن گەكتارىنان 21-24 سەنتنەردەن ءونىم الۋ كوزدەلىپ وتىر. بۇگىندە اۋدانداعى ماقتا قابىلداۋ بەكەتتەرىنە 20 مىڭ توننادان استام اق التىن كەلىپ تۇسكەن بولسا، ديقاندار تەرىم بىتكەنشە 80 مىڭ توننا اق ۇلپا جيناپ الۋدى جوسپارلاۋدا. ول ءۇشىن 365 تەرىمشىلەر بريگاداسى، 100-گە جۋىق كومباين ماقتا تەرۋ ناۋقانىنا جۇمىلدىرىلعان.

ماقتانىڭ تەزىرەك اشىلۋى ءۇشىن اۋداندا ءقازىردىڭ وزىندە 33 مىڭ گەكتاردان استام ماقتالىق القاپقا دەفولاسيا شارالارى جاسالعان. «دروب پليۋس»، «اۆگۋرون ەكسترا»، «كوتتون»، «رەگلون-سۋپەر» حيميكاتتارىنىڭ ماقتا جاپىراعىن تۇسىرۋگە ءتيىمدى اسەر ەتەدى.

مۇنان سوڭ مينيستر ءو.شوكەيەۆ قازاقستان - وزبەكستان رەسپۋبليكالارىنىڭ شەكاراسىندا ورنالاسقان «دوستىق» كانالىنداعى №73ء-شى سۋ رەتتەگىش كولدەنەڭ توسپاسىنىڭ جاعدايىمەن جانە اۋداندا جۇزەگە اسقالى تۇرعان پۋيد-2 باعدارلاماسىنىڭ بارىسىمەن تانىستى.

ماقتاارال اۋدانىندا 40 مىڭعا جۋىق گەكتار جەر پۋيد-2 باعدارلاماسىنا ەنگەن. جوبانىڭ ءبىرىنشى ەتاپى بويىنشا ەڭبەكشى جانە جاڭاجول اۋىلدىق وكرۋگىنە قاراستى 8 مىڭ گەكتار جەردە تىك درەناجدى ۇڭعىمالاردى سالۋ، كوللەكتورلىق جۇيەلەر مەن كانالداردى رەتتەۋ جۇمىستارى باستالعالى تۇر. ول ءۇشىن مەردىگەر انىقتالىپ، دايىندىق جۇمىستارى جاسالعان. سونداي-اق، جوبانىڭ ەكىنشى كەزەڭى ءيىرجار مەن جامبىل اۋىلدىق وكرۋگتەرىنىڭ 16 مىڭ گەكتارىن قامتىسا، ءۇشىنشى كەزەڭى بويىنشا اتاكەنت كەنتى، ماقتاارال جانە ا.قالىبەكوۆ اۋىلدىق وكرۋگتەرىنىڭ 15 مىڭ گەكتاردان استام ەگىستىك القابى جەر استى سۋلارىنان ارىلىپ، تۇزدانۋدان ساقتالماقشى.

تۇركىستان وبلىسى اكىمىنىڭ باسپا ءسوز قىزمەتى