وقۋ-اعارتۋ ءمينيسترى عاني بەيسەمبايەۆتىڭ وتستاۆكاعا كەتۋىنە قاتىستى ماسەلە قوعامدا ءجيى تالقىلانادى. مينيستر بۇل ماسەلەنىڭ نۇكتەسىن قويدى، - دەپ حابارلايدى Dalanews.kz.  

بىلتىر ءبىر توپ ءمۇعالىم بەيسەمبايەۆتىڭ وتستاۆكاعا كەتۋىن تالاپ ەتتى. ءتيىستى ۇندەۋ سول كەزدەگى ق ر پرەمەر-مينيسترى بولعان ءاليحان سمايىلوۆقا، ق ر پارلامەنتى ءماجىلىسىنىڭ ءتوراعاسى ەرلان قوشانوۆقا جانە دەپۋتاتتارعا باعىتتالدى.

وقۋ-اعارتۋ مينيسترلىگىنىڭ باسشىسىنىڭ سوزىنشە، وتستاۆكا ءوزىنىڭ قۇزىرەتىندەگى ماسەلە ەمەس.

«مەنىڭ مينيستر بولۋ-بولماۋىمدى مەملەكەت باسشىسى شەشەدى. مەنىڭ دە قۇزىرەتىمدەگى دۇنيە ەمەس. مەن تاڭعالاتىن دۇنيە: ءبىلىم جۇيەسىنىڭ ساپاسىن ارتتىرۋعا، ونى الەمنەن كەم ەمەس ەتۋگە بۇكىل وي-جىگەرىمىزدى جۇمىلدىرۋدىڭ ورنىنا، كەرەك ەمەس، ماڭىزدى ەمەس دۇنيەلەرگە قوعامدى الاڭداتۋعا اۋەسپىز. بۇل جەردە جۋرناليستەر دە سۇراقتى دۇرىس، ماقساتتى قويۋى كەرەك پە دەپ ويلايمىن. سەبەبى بارلىعىمىزدىڭ قوياتىن سۇراعىمىز، تالابىمىز بالالارىمىزدىڭ ءبىلىمى مەن تاربيەسى تۋرالى بولسا، ءمينيستردىڭ كەلۋ-كەتۋىندە تۇرعان ماسەلە جوق. ول زاڭدى قۇبىلىس ەكەنىن جاقسى بىلەمىن. ويتكەنى مينيستر قىزمەتىنە تاعايىندالعاننان باستاپ بارلىق مينيسترگە قويىلاتىن ءداستۇرلى، ابدەن بەلگىلى سۇراق. ودان مەن دە قالىس قالا المايمىن»، — دەدى مينيستر «ازاتتىق رۋحىنا».

ايتا كەتەيىك، عاني بەيسەمبايەۆ 2023 جىلعى قاڭتاردان باستاپ قازاقستان رەسپۋبليكاسىنىڭ وقۋ-اعارتۋ ءمينيسترى قىزمەتىنە تاعايىندالدى. بۇعان دەيىن مينيستر قىزمەتىن اسحات ايماعامبەتوۆ اتقاردى.