كەڭەستەن كەيىنگى ابىر-دابىر باسىلىپ، ەل اپتىعىن باسقاندا پرەزيدەنت قاسىم-جومارت توقايەۆ پەن ونىڭ كومانداسىن ارنايى قۇتتىقتاعىم كەلەدى: جاريالاعان ماڭىزدى شەشىمدەرى ءۇشىن!
بۇل رەتتە ءوز العىسىمدى بىلدىرەمىن. ويتكەنى قازىرگى جاعدايدا بۇل وڭايعا تۇسپەگەن شارۋا بولعانىن جاقسى بىلەمىن. ءبىراق بۇل شارالاردى وپپوزيسيا بىرنەشە ونجىلدىق بويىنا تالاپ ەتىپ كەلگەن، ۇزاققا سوزىلىپ كەتكەن ماسەلە ەدى.
ايتقانداي، ونى ايتاسىز، «وپپوزيسيا»، «وپپوزيسيونەر» دەگەن سوزدەردىڭ ءوزى وسى ونداعان جىلدار بويىنا بالاعات ءسوز سەكىلدى قابىلدانىپ كەلدى ەمەس پە. ءوز باسىمنان وتكەن، كەزىندە مەنىڭ وپپوزيسيالىق كوزقاراستارىم ءۇشىن كەيبىر ىسكەر دوستارىم مەنىمەن بايلانىسىن ۇزگەن، ال ءقازىر ولار مەنىڭ سول كەزدە ايتقاندارىمنىڭ دۇرىستىعىن مويىنداپ ءجۇر.
ءسىزدىڭ «قارسىلاستار جاۋ ەمەس» دەگەن جاڭا ساياسي مادەنيەت تۋرالى كوزقاراسىڭىزدى قولدايمىن.
«پارلامەنتتىك وپپوزيسيا تۋرالى» زاڭ جوباسىن ازىرلەۋگە قولداۋ كورسەتكەنىڭىز ءۇشىن قۋانىشتىمىن.
ءبىزدىڭ ماقساتىمىز - جاستار الدىندا ىڭعايسىز كۇيگە تۇسىرەتىن جالعان دۇنيەنى ەمەس، قازىرگى زامانعا لايىق تابىستى مەملەكەت قۇرۋ. ونىڭ ۇستىنە، نە ىستەسەڭىز دە ىستەگەنىڭىزدى جاراتپايتىن، سوگە جاماندايتىن وپپوزيسيا ءارقاشان بولادى.
مەنىڭ ءوزىمنىڭ دە ۆيرتۋالدى الەمدە وسىنداي ادال «جانكۇيەرلەرىم» بار، بۇل دا قالىپتى جاعداي. ادامداردىڭ بيلىكتى نەمەسە جەكە ءوزىڭدى جەك كورۋگە قۇقىعى بار، بۇل ولاردىڭ ءوز تاڭداۋى، جەكە قۇقىعى.
ۇلتتىق قوعامدىق سەنىم كەڭەسى مۇشەلەرىنىڭ قوعام الدىندا ۇلكەن جاۋاپكەرشىلىگى بارىن ءوزىڭىز دە جاقسى بىلەسىز، ءبىزدى دە اياپ جاتقان جوق، نەشە ءتۇرلى ايىپ تاعۋدا، اسىرەسە جازدا سولاي بولدى.
ءبىراق كەشە ءسىز ءبىزدىڭ كوپتەگەن ۇسىنىسىمىز قوعامنىڭ بيلىك الدىنا قويىپ، ونداعان جىلدار بويىنا كۇتكەن ماسەلەسىن وڭ شەشتى دەپ ايتتىڭىز.
مىنە، وسىدان كەيىن ءبىز ەلدىڭ كوزىنە ۇيالماي قاراي الامىز دەپ ويلايمىن، استانا تورىندە ءۇش اي ۋاقىتىمىزدىڭ بەكەر وتپەگەنىنىڭ كورسەتكىشى - بۇل.
ارينە، ءبىز ءوز كوزقاراسىمىزدى ۇسىنىپ، ونى بەلسەندى تۇردە دالەلدەۋگە تىرىستىق، ءبىراق، ارينە، سوڭعى شەشىمدى ءوزىڭىز كومانداڭىزبەن قابىلدادىڭىز. سوندىقتان وسى اتقارىلعان جۇمىستار مەن تاۋەكەلگە باس تىككەن ءسىزدىڭ كومانداڭىزدىڭ مۇشەلەرى - ەرلان قوشانوۆقا، قىرىمبەك كوشەربايەۆقا، دارحان كالەتايەۆقا جانە ارينە، ەرلان قارينگە العىس ايتقىم كەلەدى.
ولار وسى ۋاقىت بويىنا اقوردا مەن ءبىزدىڭ ارامىزدى ءتيىمدى بايلانىستىرۋشى زۆەنو بولا ءبىلدى.
جاڭا قىزمەتكە تاعايىندالعان ماۋلەن اشىمبايەۆ قولعا العان رەفورمانى ارى قاراي جالعاستىرادى دەپ سەنەمىن. سونداي-اق بارلىق اۋىر جۇمىستى اتقارعان مەملەكەتتىك ورگانداردىڭ قىزمەتكەرلەرىنە العىس ايتامىن، ولاردىڭ جۇمىسىنسىز كەشەگى ناتيجەگە ءبىز وڭايشىلىقپەن قول جەتكىزە الماس ەدىك.
سونىمەن قاتار، ءسىزدىڭ كومانداڭىزداعى ادامدارعا مەيىلىنشە اشىق بولۋدى تىلەيمىن، حالىققا جاقىنداپ، كوپ سۇقبات بەرىپ، ءوڭىر-وڭىردى ارالاپ، جەرگىلىكتى تۇرعىندارمەن كەزدەسىپ دەگەندەي.
تەك Nurotan جينالىستارىندا عانا ەمەس، سونىمەن قاتار حالىقپەن جۇزبە-جۇز كەزدەسۋلەرگە قاتىسسا، كورىپ وتىرعانىمىزداي، بيلىك پەن قوعام اراسىنداعى ديالوگتىڭ كەڭەيۋىنەن بارلىعى پايدا تاپپاسا، ودان ەشكىم ۇتىلمايدى.
كەشە جينالىستا ايتقانىمداي، حالىق بىزدەن ناقتى ارەكەتتەردى كۇتەدى.
كەشە جاريالانعان بارلىق قاجەتتى شەشىمدەر زاڭدى بولعان كەزدە عانا ونى حالىق ناقتى سەزىنەدى: پارتيالار، ميتينگتەر تۋرالى، قىلمىستىق كودەكستىڭ 130 جانە 174-باپتارىنا قاتىستى وزگەرىستى، پارلامەنتتىك وپپوزيسيانى جانە تاعى باسقاسىن.
ارينە، كەڭەستىڭ بارلىق مۇشەلەرى وسى جانە ءوزىمىزدىڭ وزگە دە ۇسىنىستارىمىزدى ۇكىمەت، ءماجىلىس جانە سەنات قابىرعاسىندا بارىنشا قورعاۋعا دايىن ەكەنىنە بەك سەنىمدىمىن. بىزگە، شىن مانىندە، ەلدە ناقتى وزگەرىستەر بولعانى قاجەت، سوندىقتان ءبىز ودان سايىن كۇشىمىزدى سالۋعا دايىنبىز.
سوندىقتان، كەشەگى، ياعني 2019 جىلدىڭ 20 جەلتوقسانى قازاقستان تاريحىنا ءبىزدىڭ حالقىمىزعا باق-قۋاتتىلىق اكەلگەن، ەل كوپتەن كۇتكەن ساياسي جانە ەكونوميكالىق قايتا قۇرۋلاردىڭ باستاماسى بولعان كۇن رەتىندە كىرەدى دەپ سەنەمىن.
ءبىزدىڭ حالقىمىز مۇنى ۇزاق كۇتتى، وعان ابدەن لايىق! ونىڭ ۇستىنە، ءسىز بۇل قابىلدانعان رەفورمالاردىڭ العاشقى لەگى دەپ ايتىپ وتىرسىز. ەندەشە بارلىعىمىزعا 2020 جىل ساتتىلىك اكەلسىن! امان بولايىق!
