مۇرات ءابدىلدا سوت زالىنان قايتا قاماۋعا الىندى، - دەپ حابارلايدى Dalanews.kz.
تۇركىستان سوتى تانىمال بلوگەر ءارى ءانشى مۇرات ءابدىلداعا قاتىستى جازانى قاتاڭداتتى. شارتتى تۇردە مەرزىمىنەن بۇرىن بوساتۋدىڭ كۇشى جويىلىپ، قالعان مەرزىمى ەكى جىل 11 كۇن ناقتى باس بوستاندىعىنان ايىرۋ جازاسىنا اۋىستىرىلدى.
تۇركىستان قالاسىنىڭ اۋدانارالىق سوتىندا قازاقستان رەسپۋبليكاسىنىڭ قىلمىستىق كودەكسىنىڭ 174-بابىنىڭ 1-بولىگىمەن 2022 جىلى سوتتى بولعان بلوگەرگە قاتىستى ۇسىنىم قارالدى.
ۇسىنىمدا ساۋران اۋداندىق پوليسيا ءبولىمى ءا.ء-نىڭ مەرزىمىنەن بۇرىن شارتتى تۇردە بوساتۋدىڭ كۇشىن جويىپ، جازانىڭ قالعان وتەلمەگەن بولىگىن باس بوستاندىعىنان ايىرۋ تۇرىندەگى جازاعا اۋىستىرۋدى سۇراعان.
"سوتتالعان ءا. 2024 جىلى سوتتىڭ قاۋلىسى نەگىزىندە مەرزىمىنەن بۇرىن بوساتىلىپ، تۇركىستان وبلىسىنىڭ پوليسيا دەپارتامەتىنىڭ ساۋران اۋداندىق پوليسيا بولىمىنە پروفيلاكتيكالىق ەسەپكە الىنعان. پروفيلياكتيكالىق ەسەپتە تۇرعانىنا قاراماستان، ءا. 2024 جىلى ورتاق پايدالانۋ ورنىن لاستاعانى ءۇشىن اقبتك 434-2 بابىنىڭ 1-بولىگىمەن اكىمشىلىك جاۋاپتىلىققا تارتىلىپ، وعان ايىپپۇل سالىنعان. سونىمەن قاتار، 2025 جىلدىڭ اقپان-ناۋرىز ايلارىندا 5 رەت تىركەلۋگە كەلمەگەنى جانە 4 رەت تۇنگى ۋاقىتتا تۇرعىلىقتى مەكەنجايىندا بولماعانى انىقتالعان"، - دەپ جازىلعان حابارلامادا.
تۇركىستان وبلىسى پوليسيا دەپارتامەنتىنىڭ ساۋران اۋداندىق پوليسيا باسقارماسىنىڭ ۇسىنىمى قاناعاتتاندىرىلىپ، مۇرات ءابدىلدانى مەرزىمىنەن بۇرىن شارتتى تۇردە بوساتۋدىڭ كۇشى جويىلىپ، جازانىڭ قالعان وتەلمەگەن بولىگى، ياعني 2 جىل 11 كۇنى باس بوستاندىعىنان ايىرۋ تۇرىندەگى جازاعا اۋىستىرىلدى.
مۇرات ءابدىلدا سوت زالىنان قاماۋعا الىندى. قاۋلى زاڭدى كۇشىنە ەنگەن جوق.
