ءماجىلىس دەپۋتاتى ەرمۇرات باپي بۇرىنعى ءماجىلىس سپيكەرى نۇرلان ءنىعماتۋليننىڭ ۇلى – نۇرجان نۇرلانوۆتىڭ رەيدەرلىك ءىس بويىنشا كۇدىكتى دەپ تانىلماۋىنا قۇقىق قورعاۋ ورگاندارىن كىنالادى، دەپ حابارلايدى Dalanews.kz KazTAG سايتىنا سىلتەمە جاساپ.

«ەگەر ول رەيدەرلىكپەن اينالىسقانىن دالەلدەي الماسا، وندا بۇل – ءبىزدىڭ قۇزىرلى ورگانداردىڭ كىناسى. بىزدە سوڭعى 30 جىلدا تامىر-تانىستىق پەن پانيبراتتىق جۇيەسى قالاي بولدى، سولاي جالعاسىپ كەلەدى. مۇندا مەنىڭ ويىمشا، ناقتى ازامات ناقتى ورگانعا ارىزدانسا، ول جايدان-جاي ەمەس شىعار؟ نەگە ول ءنىعماتۋليننىڭ ۇلىنا ارىزداندى؟ نەگە ماعان، نە باسقا بىرەۋگە ەمەس؟ دەمەك، مۇندا ءبىر گاپ بار»، – دەدى باپي ءماجىلىس كۋلۋارىندا.

ونىڭ ايتۋىنشا، بيزنەسىنەن ايىرىلعان ازاماتتىڭ ارى قاراي دا شاعىمدانۋعا، كاسساسيالىق جانە قاداعالاۋ ينستانسيالارىنا جۇگىنۋگە قۇقىعى بار.

«ەگەر ول ازامات پارلامەنتتەن قولداۋ ىزدەسە – ماعان جۇگىنە بەرسىن»، – دەدى دەپۋتات.

نۇرجان نۇرلانوۆ كىم؟

نۇرجان نۇرلانوۆ – بۇرىنعى ءماجىلىس سپيكەرى نۇرلان ءنىعماتۋليننىڭ ۇلى، 2019 جىلدىڭ اقپانىنان باستاپ «قازمۇنايگاز-اەرو» ءجشس-نىڭ باس ديرەكتورى قىزمەتىن اتقارعان. بۇعان دەيىن، 2018 جىلدىڭ قاڭتارىنان باستاپ «بايتەرەك» ۇلتتىق باسقارۋشى حولدينگىنىڭ باسقارما مۇشەسى بولعان. سونداي-اق، ونىڭ مانسابىندا قازاقستاندىق كۆازيمەملەكەتتىك سەكتورداعى ءبىرقاتار ماڭىزدى قىزمەتتەر بار.

نۇرلان نىعماتۋلين 2016 جىلدان 2022 جىلعى 1 اقپانعا دەيىن ءماجىلىس ءتوراعاسى بولدى. بۇل – ونىڭ وسى لاۋازىمداعى ەكىنشى مەرزىمى ەدى. بۇعان دەيىن 2012-2014 جىلدارى دا ءماجىلىس سپيكەرى بولعان. ول سونداي-اق پرەزيدەنت اكىمشىلىگىن باسقارعان جانە قاراعاندى وبلىسىنىڭ اكىمى قىزمەتىن اتقارعان.

ەرلان نىعماتۋلين – نۇرلاننىڭ ەگىز ءىنىسى، ول دا ءماجىلىس پەن سەناتتا دەپۋتات بولعان. ال ولاردىڭ اعاسى – ارعىن نىعماتۋلين بۇرىن قاراعاندى وبلىستىق ءماسليحاتىنىڭ دەپۋتاتى بولعان.

نىعماتۋليندەر وتباسىنا بۇعان دەيىن رەيدەرلىك باسىپ الۋ، قىلمىستىق قۇرىلىمدارعا قاتىسى بار دەگەن ايىپتار بىرنەشە رەت تاعىلعان. سونىمەن قاتار جالعان قىلمىستىق ىستەردى ۇيىمداستىردى دەگەن دە كۇدىك بولعان. الايدا بۇگىنگە دەيىن بۇل ايىپتار بويىنشا ولار جاۋاپقا تارتىلعان جوق، بارلىعى بوستاندىقتا ءجۇر.

Zara فرانشيزاسى جانە ەرلان نىعماتۋلينگە تاعىلعان ايىپ

Zara برەندى فرانشيزاسىنىڭ بۇرىنعى يەسى – قاراعاندىلىق ناتاليا وۆدەيچۋك پەن ونىڭ كۇيەۋى راميس يبراگيموۆ ەرلان ءنىعماتۋليندى رەيدەرلىك جاسادى دەپ ايىپتاعان. 19 ناۋرىزدا KazTAG يبراگيموۆتىڭ ارىزى نەگىزىندە بوپسالاۋ فاكتىسى بويىنشا قىلمىستىق ءىس قوزعالعانىن حابارلادى.