Májilis depýtaty Ermurat Bapi burynǵy Májilis spikeri Nurlan Nyǵmatýlinniń uly – Nurjan Nurlanovtyń reiderlik is boiynsha kúdikti dep tanylmaýyna quqyq qorǵaý organdaryn kinálady, dep habarlaidy Dalanews.kz KazTAG saityna silteme jasap.
«Eger ol reiderlikpen ainalysqanyn dáleldei almasa, onda bul – bizdiń quzyrly organdardyń kinási. Bizde sońǵy 30 jylda tamyr-tanystyq pen panibrattyq júiesi qalai boldy, solai jalǵasyp keledi. Munda meniń oiymsha, naqty azamat naqty organǵa aryzdansa, ol jaidan-jai emes shyǵar? Nege ol Nyǵmatýlinniń ulyna aryzdandy? Nege maǵan, ne basqa bireýge emes? Demek, munda bir gáp bar», – dedi Bapi Májilis kýlýarynda.
Onyń aitýynsha, biznesinen aiyrylǵan azamattyń ary qarai da shaǵymdanýǵa, kassatsiialyq jáne qadaǵalaý instantsiialaryna júginýge quqyǵy bar.
«Eger ol azamat Parlamentten qoldaý izdese – maǵan júgine bersin», – dedi depýtat.
Nurjan Nurlanov kim?
Nurjan Nurlanov – burynǵy májilis spikeri Nurlan Nyǵmatýlinniń uly, 2019 jyldyń aqpanynan bastap «QazMunaiGaz-Aero» JShS-niń bas direktory qyzmetin atqarǵan. Buǵan deiin, 2018 jyldyń qańtarynan bastap «Báiterek» ulttyq basqarýshy holdinginiń basqarma múshesi bolǵan. Sondai-aq, onyń mansabynda qazaqstandyq kvazimemlekettik sektordaǵy birqatar mańyzdy qyzmetter bar.
Nurlan Nyǵmatýlin 2016 jyldan 2022 jylǵy 1 aqpanǵa deiin Májilis tóraǵasy boldy. Bul – onyń osy laýazymdaǵy ekinshi merzimi edi. Buǵan deiin 2012-2014 jyldary da Májilis spikeri bolǵan. Ol sondai-aq Prezident ákimshiligin basqarǵan jáne Qaraǵandy oblysynyń ákimi qyzmetin atqarǵan.
Erlan Nyǵmatýlin – Nurlannyń egiz inisi, ol da Májilis pen Senatta depýtat bolǵan. Al olardyń aǵasy – Arǵyn Nyǵmatýlin buryn Qaraǵandy oblystyq máslihatynyń depýtaty bolǵan.
Nyǵmatýlinder otbasyna buǵan deiin reiderlik basyp alý, qylmystyq qurylymdarǵa qatysy bar degen aiyptar birneshe ret taǵylǵan. Sonymen qatar jalǵan qylmystyq isterdi uiymdastyrdy degen de kúdik bolǵan. Alaida búginge deiin bul aiyptar boiynsha olar jaýapqa tartylǵan joq, barlyǵy bostandyqta júr.
Zara franshizasy jáne Erlan Nyǵmatýlinge taǵylǵan aiyp
Zara brendi franshizasynyń burynǵy iesi – qaraǵandylyq Natalia Ovdeichýk pen onyń kúieýi Ramis Ibragimov Erlan Nyǵmatýlindi reiderlik jasady dep aiyptaǵan. 19 naýryzda KazTAG Ibragimovtiń aryzy negizinde bopsalaý faktisi boiynsha qylmystyq is qozǵalǵanyn habarlady.
