"قازاقستان وپەك + بەكىتكەن مۇناي ءوندىرىسى بويىنشا كۆوتانى ساقتاماي، ونى جۇيەلى تۇردە بۇزىپ كەلەدى. بۇل جاعىمسىز جايت كەلەسى جىلى تەڭىزدەگى ءوندىرىس كولەمىنىڭ ۇلعايۋى اياسىندا اسقىنا ءتۇسۋى مۇمكىن". وسىلاي دەگەن ەكونوميست عالىمجان ايتقازين جاعدايدىڭ تىم قيىن ەكەنىن ايتادى، دەپ حابارلايدى Dalanews.kz.

"قازاقستان قازان ايىندا مۇناي ءوندىرىسىن تاۋلىگىنە 1،29 ملن باررەلگە (قىركۇيەكتە  - 290 مىڭ باررەل) دەيىن ايتارلىقتاي تومەندەتتى، الايدا جالپى ءوندىرىس كولەمى وپەك+ بەكىتكەن كۆوتادان 87 مىڭ باررەلگە جوعارى بولدى" ، دەپ جازادى Bloomberg. ونىڭ ۇستىنە قازاقستان ماقساتتى ءوندىرىس كولەمىن ءار اي سايىن جىل بويىنا ارتىق وندىرىلگەن كولەمدى وتەۋ ءۇشىن ازايتۋمەن كەلەدى. 

Bloombergء-تىڭ ەسەپتەۋى بويىنشا، قازاقستاندا جالپى ارتىق وندىرىلگەن مۇناي كولەمى اعىمداعى جىلدىڭ العاشقى 10 ايىندا 1،11 ملن باررەلدەن استى. ونىڭ ۇستىنە، كەلەسى جىلى تەڭىزدەگى كەڭەيتۋ جوباسىنىڭ ارقاسىندا ءوندىرىس كولەمى تاۋلىگىنە 260 مىڭ باررەلگە ارتتىرۋدىڭ كوزدەلىپ وتىرۋىمەن جاعداي ودان سايىن كۇردەلەنە تۇسەدى، ياعني 2025 جىلدىڭ ءىى-توقسانىندا.

"شىنىندا دا، بۇل جوباعا شامامەن 50 ملرد دوللار ينۆەستيسيا سالعان ۇكىمەت پەن شەتەلدىك ينۆەستورلار مۇناي ءوندىرىسىن ۇلعايتۋعا نيەتتى. سونىمەن قاتار، ءبىز الەۋمەتتىك ەكونوميكالىق دامۋ بولجامىندا دا، بيۋدجەت سيفرلارىنان دا وسى ۇلعايتىلعان وندىرىستەن تۇسەتىن كىرىستەر ەسەپتەلىپ قويعانىن كورىپ وتىرمىز. ءبىراق Bloomberg دۇرىس اتاپ كورسەتكەندەي، مۇنداي جاعدايدا قازاقستاندى وپەك+ ء-تىڭ باسقا مۇشەلەرى الدىندا ءوزىن شيەلەنىستى ىڭعايسىز جاعدايعا قالدىرماق. ءبىزدىڭ ويىمىزشا، بۇل قازاقستان ەكونوميكاسى مەن مۇناي ءوندىرىسى بويىنشا بولجامدار ءۇشىن ەلەۋلى تاۋەكەل فاكتورى بولىپ تابىلادى، ايتقانداي، بيىلعى بيۋدجەت تاپشىلىعى ماسەلەسىندە قىلاڭ بەرگەندەي. ۇكىمەت تەڭىزدەگى مۇناي ءوندىرىسى بويىنشا ۋاقىتتىڭ كەيىنگە شەگەرىلەتىنىن، وپەك+ الدىنداعى مىندەتتەمەلەرى تۋرالى ءبىلىپ وتىرسا دا، مۇناي ءوندىرىسىنىڭ نەعۇرلىم جوعارى كورسەتكىشىنە ءۇمىت ارتىپ، تيىسىنشە بيۋدجەتكە كوبىرەك ديۆيدەند تۇسەدى دەپ اسىرە ەسەپ جاساعانىن تاعى دا ەسكە سالامىز"، دەپ جازادى عالىمجان ايتقازين Telegram-داعى پاراقشاسىندا.

ايتا كەتسەك، وپەك+ ەلدەرى مۇناي ءوندىرۋدى شەكتەۋ تۋرالى كەلىسىمدى بۇزعان ەلدەرگە ءوز نارازىلىقتارىن بىلدىرگەن. اتاپ ايتقاندا، يراك پەن قازاقستانعا. دەگەنمەن 2 قازاندا وتكەن وپەك+ وتىرىسىندا يراك رەسپۋبليكاسى، قازاقستان رەسپۋبليكاسى جانە رەسەي فەدەراسياسى قىركۇيەك ايىندا ۇسىنىلعان وتەماقى جوسپارلارىنا سايكەس ءوز مىندەتتەمەلەرىن تولىعىمەن ورىنداعاندارىن راستادى.