جۇما كۇنگى بيرجادا دوللار قۇنى 382،22 تەڭگە بولعان، ال ۇلتتىق بانكتىڭ 9 ناۋرىزعا بەلگىلەگەن رەسمي باعامى – 382،05 تەڭگە.
دۇيسەنبىدە رەسەي ءرۋبلى دە 2016 جىلعى رەكوردتىق دەڭگەيىنە ءتۇسىپ، ءبىر دوللار 72،72 رۋبل بولدى. اشىق ساۋداداعى التىن باعاسى دا 20 پايىزعا ءتۇسىپ كەتتى.
وتكەن اپتانىڭ سوڭىندا ۆەنادا وپەك، ساۋد ارابياسى جانە رەسەي مۇناي باعاسىن ۇستاپ تۇرۋ ءۇشىن ءوندىرىستى ازايتۋعا قاتىستى كەلىسسوز جۇرگىزگەن. ءبىراق ۆەناداعى جيىندا تاراپتار كەلىسە المادى. كرەمل وپەك ۇسىنىسىن قولدامادى. ودان سوڭ ساۋد ارابياسى «باعا سوعىسىن» باستاپ، ءوزى وندىرەتىن مۇنايعا جەڭىلدىك جاريالادى.
9 ناۋرىزدا Brent ماركالى مۇناي باررەلىنە 36 دوللاردان ساتىلىپ جاتىر. 2014 جىلعى ساۋدا سوعىسى كەزىندە بۇل برەند باعاسى 30 دوللارعا دەيىن قۇلدىراعان.
