بۇل تۋرالى تەليەۆيدەنيا مامانى ارمان سقابىل ۇلى NUR.KZ پورتالىنا بەرگەن سۇقباتىندا ءمالىم ەتتى.
— … جالپى جۇلدىزدىڭ جۇلدىز بولۋىنا تەلەارنالار تىكەلەي سەبەپشى. تەلەارنالاردا مەرەكەلىك باعدارلامالار نەمەسە ءتۇرلى جوبالار بار. وندا ەفيرگە شىعۋ ءۇشىن سۇمدىق تالاس-تارتىس. ءبارى كورىنىپ قالۋى كەرەك، ءبىر جەرىنە ءىلىنىپ قالۋى ءتيىس. ءارقايسىسىنىڭ قولىندا ءبىر-بىر فونوگرامما. كەيبىرىنىڭ تەليەۆيدەنيەدە تامىر-تانىستارى بار دەگەندەي.
ال ديماش سياقتى تانىسى جوق، فونوگرامماعا جۇگىنبەيتىن ون شاقتى ادام ەسىكتىڭ سىرتىندا قالىپ قويادى. وكىنىشكە قاراي، بۇل راس…
مەن بىر-ەكى رەت فونوگراممامەن جۇرگەن كەرەمەت انشىلەردىڭ جاندى داۋىسپەن ايتقانىنىڭ كۋاسى بولعانمىن. مۇلدە داۋىس جوق، ءبارى فالش.
كوردىڭىز بە، بىزدە كورەرمەندى، تىڭدارماندى الداۋ ءالى جالعاسىپ جاتىر.
بۇل ماسەلەگە تەرەڭ بويلاپ، ءبىراز زەرتتەپ كوردىم. مىسالى، مىنا كورشى وزبەكستان مەن تۇركىمەنستاندا فونوگرامماعا مۇلدە تىيىم سالىنعان. ال ەۋروپا ەلدەرىندە فونوگراممامەن ايتاتىن بولسا، وندا كونسەرتتىڭ افيشاسىندا ءانشىنىڭ فونوگراممامەن ايتاتىنى تۋرالى ەسكەرتۋ جازىلادى. دەمەك، كورەرمەن مۇنداي كونسەرتكە الداپ-ارباۋسىز، سانالى تۇردە كەلەدى. ال رەسەيدىڭ دۋماسى وسىمەن ءتورتىنشى جىل تالاس-تارتىسپەن وسىعان قاتىستى زاڭدى قابىلداي الماي كەلە جاتىر. وعان ول جەردەگى شوۋ بيزنەس وكىلدەرى، اسىرەسە انشىلەر قارسى. زاڭدى قابىلداتپايتىن ءيا، كادۋىلگىدەي الۋەتتى توپ.
فونوگراممامەن ايتاتىن انشىلەردىڭ قاپتاپ كەتكەنى، ولاردىڭ تەلەەفيرلەردى جاۋلاپ الۋى ديماش سياقتى تالانتتاردىڭ شىعۋىنا بوگەت بولىپ وتىر. فونوگراممامەن ايتسا ايتسىن، ءبىراق حالىقتى الداماسىن، ەسكەرتسىن. تەلەارنالاردا دا تۋرا سونداي ساياسات. ولار ستۋديادا مۇلتىكسىز تازا ورىندالىپ جازىلعان ءاندى عانا بەرگىسى كەلەدى. ال جاندى داۋىسپەن ايتاتىن بالالارعا جول جوق.
ەگەر فونوگراممامەن ءان ايتۋدى زاڭدى تۇردە رەتكە كەلتىرسەك، ەل اراسىنان 10 ەمەس 100 ديماشتىڭ شىعاتىنىنا مەن سەنەمىن.
